ମହାରାଷ୍ଟ୍ରରେ ବିରୋଧୀ ମହାବିକାଶ ଆଘାଡି ମେଣ୍ଟ ର ୪୮ଟି ଲୋକସଭା ଆସନ ପାଇଁ ବୁଝାମଣା

ମୁମ୍ବାଇ: ମହାରାଷ୍ଟ୍ରରେ ବିଜେପି ପ୍ରଚାର ଜୋରଦାର କରିଛି । ସେପଟେ  ବିରୋଧୀଙ୍କ ମଧ୍ୟରେ ନିର୍ବାଚନକୁ ନେଇ ପ୍ରଚାର ଆରମ୍ଭ ହୋଇଯାଇଛି ।  ବିରୋଧୀ ମହାବିକାଶ ଆଘାଡି ମେଣ୍ଟ ନିର୍ବାଚନ ଆରମ୍ଭ ହେବାର ୧୦ ଦିନ ପୂର୍ବରୁ ରାଜ୍ୟର ୪୮ଟି ଲୋକସଭା ଆସନ ପାଇଁ ବୁଝାମଣା ଚୂଡ଼ାନ୍ତ କରିଛି। ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ନେତୃତ୍ବାଧୀନ ଶିବସେନା ଗୋଷ୍ଠୀ ୨୧ଟି ଆସନ ପାଇଥିବା ବେଳେ କଂଗ୍ରେସ ୧୭ ଓ ଶରଦ ପାୱାରଙ୍କ ଏନ୍‌ସିପି ୧୦ଟି ଆସନରେ ଲଢ଼ିବା ସ୍ଥିର ହୋଇଛି।ଠାକରେଙ୍କ ଶିବସେନା ମୁମ୍ବାଇର ୬ଟି ଆସନ ମଧ୍ୟରୁ ୪ଟି ଆସନ- ଉତ୍ତର ପଶ୍ଚିମ, ଦକ୍ଷିଣ କେନ୍ଦ୍ରୀୟ, ଦକ୍ଷିଣ ଏବଂ ଦକ୍ଷିଣ ପୂର୍ବ ଆସନରେ ଲଢ଼ିବ। ଅନ୍ୟ ଦୁଇଟି ଉତ୍ତର ଓ ଉତ୍ତର କେନ୍ଦ୍ରୀୟ ନିର୍ବାଚନରେ କଂଗ୍ରେସ ଲଢ଼ିବ। ୨୦୧୯ ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି) ଏବଂ ତତ୍କାଳୀନ (ଅବିଭକ୍ତ) ଶିବସେନା ୩ଟି ଲେଖାଏଁ ଆସନରେ ଜିତିଥିଲେ। ସେତେବେଳେ ଦୁହେଁ ସହଯୋଗୀ ଥିଲେ କିନ୍ତୁ ସେହି ବର୍ଷ ଶେଷରେ ବିଧାନସଭା ନିର୍ବାଚନ ପରେ ନାଟକୀୟ ଢଙ୍ଗରେ ଅଲଗା ହୋଇଯାଇଥିଲେ।