କ୍ୟାନସର ପେସେଣ୍ଟଙ୍କ ପୋଷ୍ଟ ପଢ଼ିଲେ, ଆଖିରେ ଲୁହ ଆସିଯିବ

ଜଣେ 21 ବର୍ଷୀୟ ଯୁବକଙ୍କ ସୋସିଆଲ ମିଡିଆରେ ସେୟାର କରାଯାଇଥିବା ଦୁଃଖଦ ପୋଷ୍ଟ ଏବେ ଭାଇରାଲ ହେଉଛି । ତାଙ୍କ ମୃତ୍ୟୁକୁ ନେଇ ସେ କେଇ ଧାଡ଼ି ହୃଦୟରୁ ଶେଷ କଥା ଲେଖିଛନ୍ତି । ଯାହା ପଢ଼ିଲେ ଆପଣଙ୍କ ଆଖିରେ ମଧ୍ୟ ଲୁହ ଆସିଯିବ । ଯୁବକ ଜଣଙ୍କ ଷ୍ଟେଜ୍ 4 କୋଲୋରେକ୍ଟଲ କ୍ୟାନସରରେ ପୀଡ଼ିତ ଅଛନ୍ତି ।  ଜୀବନ-ମୃତ୍ୟୁ ସହ ସେ ପ୍ରତି ମୁହୂର୍ତ୍ତରେ ସଂଗ୍ରାମ କରି ଲଢ଼ୁଛନ୍ତି । ତାଙ୍କ କୋହଭରା ପୋଷ୍ଟ  Reddit ରେ ସେ ସେୟାର କରିଛନ୍ତି । ଯିଏ ବି ତାଙ୍କ ପୋଷ୍ଟ ପଢ଼ୁଛି ସେ ସମବେଦନା ଦେବା ସହ ସାହସ ଦେଉଛନ୍ତି । ତାଙ୍କ ଜୀବନ ପାଇଁ ହଜାର ହଜାର ପ୍ରାର୍ଥନା ଏବଂ ସମବେଦନା ବାର୍ତ୍ତା ଆସୁଛି । TwentiesIndia subreddit ନାମକ ୟୁଜର ଆକାଉଣ୍ଟରେ ସେୟାର କରାଯାଇଥିବା  ପୋଷ୍ଟରେ ସେ ଲେଖିଛନ୍ତି ଯେ ଡାକ୍ତରଙ୍କ କହିବା ଅନୁସାରେ ତାଙ୍କ ଜୀବନ ଆଉ ବହୁଦିନ ନାହିଁ । ଗୋଟିଏ ବର୍ଷ ଭିତରେ ସେ ସମସ୍ତଙ୍କୁ ଛାଡି ଚାଲିଯିବେ । ଦୀପାବଳି ପାଖେଇ ଆସୁଥିବା ବେଳେ ଆରବର୍ଷ ଦୀପାବଳି ସେ ଦେଖିପାରିବେ କି ନାହିଁ ସେନେଇ କୋହଭରା ପୋଷ୍ଟ କରିଛନ୍ତି ।  ଷ୍ଟେଜ୍ 4 କୋଲୋରେକ୍ଟଲ୍ କର୍କଟ ରୋଗ ଷ୍ଟେଜ୍ -4 ଅବସ୍ଥାରେ ଥିବାରୁ ସେ ଏପରି ଦୁଃଖରେ ଲେଖିଛନ୍ତି ।

ଯୁବକ ଜଣକ ତାଙ୍କ କର୍ଟକ ରୋଗ ବିଷୟରେ ଲେଖିଛନ୍ତି ଯେ ମାସ ମାସ ଧରି ସେ କେମୋଥେରାପି ନେଉଛନ୍ତି । ସେ ପ୍ରତିଦିନ ସକାଳ ହେଲେ  କିଛି ଭୟଙ୍କର ଭାବନାକୁ ନେଇ ସମୟ ବିତାଉଛନ୍ତି ।  ଡାକ୍ତରମାନେ ତାଙ୍କୁ ବଞ୍ଚାଇବାକୁ ସମସ୍ତ ଚିକିତ୍ସା ଶେଷ କରିଦେଇଛନ୍ତି । ଯାହା ତାଙ୍କୁ ଏକ ଭୟଙ୍କର ମୃତ୍ୟୁର ପୂର୍ବାନୁମାନ କରୁଛି । ଏବେ ଦୀପାବଳି ଆସୁଛି । ଆଉ ଦୀପାବଳି ପୂର୍ବରୁ ସେ ଦୁଃଖ ମନରେ ଏ ବର୍ଷ ଦୀପାବଳି ତାଙ୍କର ଶେଷ ଆଲୋକ ପର୍ବ ହେବ ବୋଲି  ଅନୁଭବ କରି ଭୟଙ୍କର ଯନ୍ତ୍ରଣା ଭୋଗୁଛନ୍ତି ।

ସେ ଲେଖିଛନ୍ତି ଯେ “ଦୀପାବଳି ଶୀଘ୍ର ଆସୁଛି,  ରାସ୍ତାରେ ଆଲୋକ ଲାଗିଲାଣି । କିନ୍ତୁ ମୁଁ ଶେଷ ଥର ପାଇଁ ଏହି ଦୀପାବଳିର ଆଲୋକକୁ ଦେଖିବି । ଏହା ଜାଣିଥିବାରୁ ମୋତେ ଗଭୀର କଷ୍ଟ ହେଉଛି । ଅନେକ ଦିନ ଧରି ଯେଉଁ ଖୁସି ମୁଁ ଦେଖୁଥିଲି, ତାହା ଆଉ ଦେଖିପାରିବି ନାହିଁ, ସେହି ଆଲୋକ, ସମସ୍ତଙ୍କ ହସ ଏବଂ କଥାକୁ ମୁଁ ମିସ୍ କରିବି। ମୋର ଏ ଜୀବନ ନୀରବରେ ଶେଷ ହୋଇଯିବ । କେଉଁଦିନ, କେତେବେଳେ ମୋ ଜୀବନ ଚାଲିଯିବ, ଏକଥା ଭାବିବା ବେଳେ ମୋତେ ଆଶ୍ଚର୍ଯ୍ୟ ଲାଗୁଛି । ମୁଁ ଜାଣେ ଯେ ଆସନ୍ତା ବର୍ଷକୁ ମୁଁ ନଥିବି ।  ମୁଁ କେବଳ ଏକ ସ୍ମୃତିରେ ରହି ଯାଇଥିବି । କାରଣ ମୋତେ ଦିଆସିଲିରେ କେହି ଜଳାଇ ଦେଇଥିବେ । ଏଭଳି କଥା ସେ ଯୁବକ ଲେଖିଛନ୍ତି  ।

ସେ ଯୁବକ ଆହୁରି ଲେଖିଛନ୍ତି ଯେ ତାଙ୍କ ହୃଦୟରେ ଅନେକ ସ୍ବପ୍ନ ରହିଛି । ଯାହାକୁ ନେଇ ସେ ଯାତ୍ରା ଆରମ୍ଭ କରିଥିଲେ । ସେ କୁକୁରକୁ ପୋଷ୍ୟ ଭାବରେ ଗ୍ରହଣ କରି ତାକୁ ଅନେକ ସ୍ନେହ ଦେଇଥିଲେ । ଅତୀତର ସବୁ ଘଟଣା ଏବେ ମନେପଡ଼ୁଛି ।  ମୋର ସମୟ ସରିଯାଉଛି । ମୋର ସବୁ ଚିନ୍ତାଧାରା ଫିକା ପଡ଼ିଯାଉଛି। ଏବେ ମୁଁ ଘରେ ଅଛି  । ମୃତ୍ୟୁକୁ ଅପେକ୍ଷା କରିଛି ।  ମୁଁ ମୋ ବାପା, ମାଙ୍କ ମୁହଁରେ ଦୁଃଖ ଦେଖିପାରୁଛି। ମୁଁ ପ୍ରକୃତରେ ଜାଣିନାହିଁ ଯେ ମୁଁ ଏହା କାହିଁକି ପୋଷ୍ଟ କରୁଛି। ଆପଣମାନେ ଜାଣିଲେ ମୋର କଣ ହେବ ? ହୁଏତ କେବଳ ଉଚ୍ଚସ୍ୱରରେ କହିବା ପାଇଁ ଚାହୁଁଛି ଯେ ହଜିବା ପୂର୍ବରୁ ଏକ ଛୋଟ ଚିହ୍ନ ଛାଡିଯାଉଛି ।”

ଯୁବକଙ୍କର ଏହି ପୋଷ୍ଟଟି Reddit ରେ ହଜାର ହଜାର ଲୋକଙ୍କ ହୃଦୟକୁ ଛୁଇଁଛି । ଅନେକ ୟୁଜର ଗଭୀର ଦୁଃଖ ପ୍ରକାଶ କରିଛନ୍ତି । ସୁସ୍ଥ ହେବା ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରିଛନ୍ତି । ହଜାର ହଜାର ଲୋକ ସହାନୁଭୂତି ପ୍ରକାଶ କରିଛନ୍ତି । ଜଣେ ଲେଖିଛନ୍ତି, “ମୁଁ ଆଶା କରୁଛି ଏକ ଚମତ୍କାର ଘଟିବ ।  ତୁମର କର୍କଟ ରୋଗ ଅଛି, କିନ୍ତୁ ଭଲ ହୋଇଯିବ । ଶରୀରର  ସବୁକିଛି କାମ କରିବ । ସେଠାରେ ରୁହ, ବନ୍ଧୁ। ତୁମର ଯାହା ଅଛି ତାହାର ସର୍ବାଧିକ ଲାଭ ନିଅ। ସୁନ୍ଦର ପୃଥିବୀର ଅନୁଭବ ନିଅ । ସକାଳ, ସନ୍ଧ୍ୟାରେ ଚାଲିବାକୁ ଯାଅ। ସକାଳେ ଗୀତ ଗାଉଥିବା ପକ୍ଷୀମାନଙ୍କର ରାବକୁ ଉପଭୋଗ କର। କିଛି ସୁନ୍ଦର ସଙ୍ଗୀତ ଶୁଣ । ଯାହା ତୁମ ମନରେ ନୂତନ ସ୍ପନ୍ଦନ ଆଣିବ । ଯାହା ତୁମକୁ ନାଚିବାକୁ ଆହ୍ବାନ ଦେବ । ଭଲ ଲାଗୁଥିବା ଖାଦ୍ୟ ଖାଅ  । ତୁମର ପରିବାର ଏବଂ ବନ୍ଧୁମାନଙ୍କ ସହ ମିଶି ଖୁସିକୁ ଉପଭୋଗ କର। ଏମିତି ଅନେକ କଥା ୟୁଜରମାନେ ଲେଖିଛନ୍ତି ।

ଆଉ ଜଣେ ଲେଖିଛନ୍ତି “ତୁମେ ଶବ୍ଦ ଅପେକ୍ଷା ଅଧିକ ଶକ୍ତି ଦେଖାଇଛ। ତୁମର ବାର୍ତ୍ତା ଏତେ ହୃଦୟସ୍ପର୍ଶୀ ଯାହା ମନକୁ ଗଭୀର ଶାନ୍ତି ଦେଉଛି । ତୁମକୁ କିଛି କହିବା ପାଇଁ ଭାବି ପାରୁନି,କିନ୍ତୁ ମଙ୍ଗଳ କାମନା କରୁଛି । ଆଉ ଜଣେ ଲେଖିଛନ୍ତି “ଭାଇ, ମୁଁ ତୁମକୁ ଜାଣିନାହିଁ, କିନ୍ତୁ ଏହା ପଢ଼ି ମୋତେ ବହୁତ ଆଘାତ ଲାଗିଲା। ତୁମେ ଲେଖିଛ ଯେ, ତୁମେ ବର୍ଷର ଶେଷ ପର୍ଯ୍ୟନ୍ତ ବଞ୍ଚିପାରିବ ନାହିଁ ।  ଦୀପାବଳି ପାଳନ କରିପାରିବ ନାହିଁ, ଏହା ପଢ଼ିବା ବହୁତ କଷ୍ଟକର। କେବଳ ଏହି ସତ୍ୟକୁ ଜାଣ ଯେ ତୁମେ ଏବେ ବି ଲଢ଼ୁଛ, ଆଉ ଏହା ସମସ୍ତଙ୍କୁ ଶକ୍ତି ଯୋଗାଉଛି ।  ଦୃଢ଼ ରୁହ, ଭାଇ।” ସବୁ ମଙ୍ଗଳ ହେବ ।