ନୂଆଦିଲ୍ଲୀ : ଦିଲ୍ଲୀର ଇଣ୍ଡିଆ ଗେଟ୍ ନିକଟରେ ବାୟୁ ପ୍ରଦୂଷଣ ବିରୋଧରେ ଚାଲିଥିବା ଏକ ପ୍ରଦର୍ଶନ ହଠାତ୍ ବିବାଦୀୟ ରୂପ ନେଇଛି। କିଛି ପ୍ରଦର୍ଶନକାରୀ ନକ୍ସଲ୍ କମାଣ୍ଡର ହିଡ୍ମାଙ୍କ ପୋଷ୍ଟର୍ ଏବଂ ତାଙ୍କ ସପକ୍ଷରେ ନାରାବାଜି କରିବା ପରେ ଏହି ବିବାଦ ବଢ଼ି ଯାଇଛି। ହିଡ୍ମାଙ୍କର ନିକଟରେ ଆନ୍ଧ୍ରପ୍ରଦେଶରେ ଏକ ପୋଲିସ୍ ଏନକାଉଣ୍ଟରରେ ମୃତ୍ୟୁ ହୋଇଥିଲା। ପରିସ୍ଥିତିକୁ ଦେଖି ଦିଲ୍ଲୀ ପୋଲିସ୍ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି ଘଟଣାରେ ମୋଟ୍ ୨୩ ଜଣଙ୍କୁ ଗିରଫ କରାଯାଇଛି।
ଏହି ଘଟଣାରେ ଦିଲ୍ଲୀର ଦୁଇଟି ଥାନାରେ ଦୁଇଟି ପୃଥକ ମାମଲା ରୁଜୁ କରାଯାଇଛି। କର୍ତ୍ତବ୍ୟପଥ ଥାନାରେ ୬ ଜଣ ପୁରୁଷଙ୍କ ବିରୋଧରେ ମାମଲା ରୁଜୁ ହୋଇଛି। ପାର୍ଲିଆମେଣ୍ଟ ଷ୍ଟ୍ରିଟ୍ ଥାନାରେ ଆଉ ୧୭ ଜଣଙ୍କୁ ଗିରଫ କରାଯାଇଛି। ପ୍ରଦର୍ଶନକାରୀଙ୍କ ବିରୋଧରେ ହିଂସା ଏବଂ ବେଆଇନ ବିରୋଧ ପ୍ରଦର୍ଶନ ସହିତ ଆଇପିସିର ବିଭିନ୍ନ ଗୁରୁତ୍ୱପୂର୍ଣ୍ଣ ଧାରା ଲାଗୁ କରାଯାଇଛି। ଦିଲ୍ଲୀରେ ପ୍ରଦର୍ଶନ ପାଇଁ ନିର୍ଦ୍ଧାରିତ ସ୍ଥାନ ଜନ୍ତରମନ୍ତର ଥିବାବେଳେ ପ୍ରଦର୍ଶନକାରୀମାନେ ଟ୍ରାଫିକ୍ ଅଟକାଇବାକୁ ଚେଷ୍ଟା କରିଥିଲେ। ସେମାନଙ୍କୁ ହଟାଇବାକୁ ଯାଇଥିବା ପୋଲିସ୍ ଉପରେ କିଛି ଲୋକ ପେପର ସ୍ପ୍ରେ କରିଥିବା ଅଭିଯୋଗ ହୋଇଛି। ପ୍ରଦୂଷଣ ଆନ୍ଦୋଳନ ନାମରେ ନକ୍ସଲ୍ବାଦକୁ ପ୍ରୋତ୍ସାହିତ କରିବାକୁ ଚେଷ୍ଟା କରାଯାଉଥିବା ନେଇ ରାଜନୈତିକ ମହଲରେ ସମାଲୋଚନା ପ୍ରକାଶ ପାଇଛି।
