ବରିଷ୍ଠ ବିଜେପି ନେତା ଗୋପିନାଥ ସାହୁଙ୍କୁ ଆଇ.ଟି.ଆଇ ଲିମିଟେଡ ବୋର୍ଡରେ ସ୍ୱାଧୀନ ନିର୍ଦ୍ଦେଶକ ଭାବରେ ନିଯୁକ୍ତ କରାଯାଇଛି । ଏହା ଭାରତ ସରକାରଙ୍କ ଯୋଗାଯୋଗ ମନ୍ତ୍ରଣାଳୟର ଦୂରସଂଚାର ବିଭାଗ ଅଧୀନରେ ଏକ ପ୍ରମୁଖ କେନ୍ଦ୍ରୀୟ ସରକାରୀ କ୍ଷେତ୍ର ଉଦ୍ୟୋଗ ଅଟେ I
୧୯୪୮ ମସିହାରେ ପ୍ରତିଷ୍ଠିତ ITI ଲିମିଟେଡ ହେଉଛି ଭାରତର ସର୍ବପୁରାତନ ଦୂରସଂଚାର ଉତ୍ପାଦନକାରୀ ରାଷ୍ଟ୍ରାୟତ୍ତ କମ୍ପାନୀ । ଯାହା ଦେଶର ଦୂରସଂଚାର ଏବଂ ଡିଜିଟାଲ୍ ଭିତ୍ତିଭୂମି କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ଏହାର ମୁଖ୍ୟାଳୟ ବେଙ୍ଗାଲୁରୁ ଠାରେ ଅବସ୍ତିତ I
ଭଞ୍ଜନଗରରୁ ଛାତ୍ର ରାଜନୀତି ଆରମ୍ଭ କରିଥିବା ସାହୁଙ୍କୁ ଓଡ଼ିଶାରେ ବିଜେପିର ପ୍ରମୁଖ ସାଂଗଠନିକ ରଣନୀତିକାରକଙ୍କ ମଧ୍ୟରୁ ଜଣେ ଭାବରେ ବିବେଚନା କରାଯାଏ। ୨୦୧୮ ମସିହାରୁ, ସେ ରାଜ୍ୟ ବିଜେପିର ଯୋଗାଯୋଗ ଏବଂ ତଥ୍ୟ ବିଭାଗର ନେତୃତ୍ୱ ନେଉଛନ୍ତି । ୨୦୧୯ ଏବଂ ୨୦୨୪ ସାଧାରଣ ନିର୍ବାଚନ ସମୟରେ ନିର୍ବାଚନ ପରିଚାଳନାରେ ମଧ୍ୟ ତାଙ୍କର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି । ତୀକ୍ଷ୍ଣ ପରିଚାଳନାଗତ ବୁଦ୍ଧି ଏବଂ ଵିଚାରିକ ସ୍ପଷ୍ଟତା ପ୍ରତି ପ୍ରତିବଦ୍ଧତା ପାଇଁ ସେ ଖୁବ ଜଣାଶୁଣା।
୧୯୯୧ ମସିହାରୁ ଶ୍ରୀ ସାହୁ ରାଷ୍ଟ୍ରୀୟ ସ୍ୱୟଂସେବକ ସଂଘର ଉତ୍ସର୍ଗୀକୃତ ସ୍ୱୟଂସେବକ ଭାବେ କାର୍ଯ୍ୟ କରି ଆସୁଛନ୍ତି । ଶ୍ରୀ ସାହୁ ୧୯୯୪ ରୁ ୨୦୦୯ ପର୍ଯ୍ୟନ୍ତ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏ.ବି.ଭି.ପି.) ର ପୂର୍ଣ୍ଣକାଳୀନ ଭାବେ କାର୍ଯ୍ୟ କରିଥିଲେ। ଏ.ବି.ଭି.ପି. ରେ ତାଙ୍କର ତାଙ୍କର ଦୀର୍ଘ କାର୍ଯ୍ୟକାଳ ମଧ୍ୟରେ, ସେ ରାଜ୍ୟ ସମ୍ପାଦକ, ରାଜ୍ୟ ସଂଗଠନ ସମ୍ପାଦକ ଏବଂ ଏ.ବି.ଭି.ପି. କେନ୍ଦ୍ରୀୟ ସମିତିର ସଦସ୍ୟ ସମେତ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରିଥିଲେ। ଏ.ବି.ଭି.ପି. କାର୍ଯ୍ୟକାଳ ମଧରେ ସେ ୨୦୦୪ ରୁ ୨୦୦୮ ପର୍ଯ୍ୟନ୍ତ ସଂଘର ପ୍ରଚାରକ ଭାବରେ ମଧ୍ୟ କାର୍ଯ୍ୟ କରି ପ୍ରଶଂସା ସାଉଁଟିଥିଲେ।
ସମଗ୍ର ଓଡ଼ିଶାରେ ଅନେକ ପ୍ରଭାବଶାଳୀ ଛାତ୍ର ଆନ୍ଦୋଳନକୁ ଗୁରୁତ୍ୱପୂର୍ଣ୍ଣ ନେତୃତ୍ୱ ପ୍ରଦାନ କରି ବିଭିନ୍ନ ପିଢ଼ିର କାର୍ଯ୍ୟକର୍ତ୍ତାଙ୍କୁ ସେ ମାର୍ଗଦର୍ଶନ ଦେଇଛନ୍ତି । ସେମାନଙ୍କୁ ମଧରୁ ଅନେକ ଆଜିର ଦିନରେ ବିଧାୟକ, ବି.ଜେ.ପି. ଜିଲ୍ଲା ସଭାପତି ଏବଂ ଦଳର ପଦାଧିକାରୀ ହୋଇଛନ୍ତି ।
୨୦୧୮ ମସିହାରେ ଆନୁଷ୍ଠାନିକ ଭାବରେ ଭାରତୀୟ ଜନତା ପାର୍ଟିରେ ଯୋଗ ଦେଇଥିବା ସାହୁଙ୍କର ଦୀର୍ଘ ଦଶନ୍ଧିର ସାଂଗଠନିକ ଅଭିଜ୍ଞତା ଏବଂ ଆଦର୍ଶଗତ ପ୍ରତିବଦ୍ଧତାକୁ ନେଇ ଏକ ସ୍ବତନ୍ତ୍ର ପରିଚୟ ରହିଛି।
ଉତ୍କଳ ବିଶ୍ୱ ବିଦ୍ୟାଳୟରୁ ଉଭୟ ଓଡ଼ିଆ ଭାଷା ଏବଂ ସାହିତ୍ୟରେ ସ୍ନାତକୋତ୍ତର ଏବଂ ଆଇନରେ ସ୍ନାତକ, ଶ୍ରୀ ସାହୁ, ୨୦୧୫ ରୁ ୨୦୨୧ ପର୍ଯ୍ୟନ୍ତ କେନ୍ଦ୍ର ଶିକ୍ଷା ମନ୍ତ୍ରଣାଳୟର ଭାରତବାଣୀ ପ୍ରକଳ୍ପର ରିସୋର୍ସ ପର୍ସନ ଭାବେ କାର୍ଯ୍ୟ କରିଥିଲେ। ୨୦୧୧ ରୁ ୨୦୧୫ ପର୍ଯ୍ୟନ୍ତ ସେ ବିଜ୍ଞାପନ ସଂସ୍ଥା ମ୍ୟାଗନମ୍ ଇଣ୍ଟରଗ୍ରାଫିକ୍ସର ଓଡ଼ିଶା ମୁଖ୍ୟ ଭାବେ କାର୍ଯ୍ୟ କରିଥିଲେ । ୨୦୧୦ ରୁ ୨୦୧୧ ପର୍ଯ୍ୟନ୍ତ ଜାତୀୟ ଯୁବ ସମବାୟ ସଂସ୍ଥା (NYCS) ର ରାଜ୍ୟ ସଂଯୋଜକ ଭାବେ କାର୍ଯ୍ୟ କରିଥିଲେ ।
