ରାଜାଙ୍କୁ ଇନ୍ଦ୍ରଙ୍କ ସହ ତୁଳନା କରିବା । ଭଗବାନଙ୍କ ସହ ତୁଳନା କରିବା । ତାଙ୍କ ଇଙ୍ଗିତରେ ଦୁନିଆ ଚାଲୁଛି ବୋଲି ଗୀତ ମାଧ୍ୟମରେ ରାଜାଙ୍କୁ ଖୁସି କରାଇବା । ପୁରୁଣା ରାଜ ପରମ୍ପରାର ଅଂଶବିଶେଷ । ରାଜା ହିଁ ବାପା, ରାଜା ହିଁ ମା, । ତାଙ୍କ ଦୟାରେ ପ୍ରଜାମାନେ ବଂଚନ୍ତି । ଏଥିଲା ପୁରୁଣା କାଳିଆ ରାଜ୍ୟ ପରମ୍ପରାର ଏକ ପ୍ରଚଳିତ ପ୍ରଥା । ରାଜାଙ୍କ ଗୁଣଗାନ କରି କବିମାନେ କବିତା ଲେଖନ୍ତି । ସାହିତ୍ୟିକମାନେ ସାହିତ୍ୟ ଲେଖନ୍ତି । ଚାଟୁକାର ଆଉ ଭାଟମାନେ ସୁଯୋଗ ଖୋଜୁଥାନ୍ତି କେମିତି ରାଜାଙ୍କୁ ତେଲମାରି ଖୁସି କରିହେବ । ରାଜାଙ୍କୁ ନବକୋଟି କର୍ଣ୍ଣାଟ, ଉତ୍କଳ କଳବର୍ଗେଶ୍ୱର, ବିରାଧୀବୀରବର, ପ୍ରବଳ ପ୍ରତାପୀ, ସମରେ ସହସ୍ରବାହୁ, କ୍ଷତ୍ରିୟ କୁଳ ଧୂମକେତୁ ଭୂତ ଭୈରବ ଭାବେ ପ୍ରଶଂସା କରାଯାଉଥିଲା ।
ଏହି ବାକ୍ୟରେ ରାଜା କେତେ ମହାନ ଆଉ କେତେ ପ୍ରତାପଶାଳୀ ତାହା ସୂଚନା ମିଳେ । ରାଜତନ୍ତ୍ର ଯାଇଛି । ଆଉ ପ୍ରଜାତନ୍ତ୍ରରେ ଆଧୁନିକ ରାଜାମାନେ କିପରି ପ୍ରଶଂସାରେ ପୋତିହେବା ପାଇଁ ଭଲ ପାଆନ୍ତି । ତାହା ବିଶ୍ବର ସବୁଠାରୁ ଶକ୍ତିଶାଳୀ ଗଣତନ୍ତ୍ର ଦେଶରେ ପ୍ରମାଣ ମିଳୁଛି । ଟ୍ରମ୍ପଙ୍କୁ ଖୁସି କରାଇବା ପାଇଁ ବିଶ୍ବ ନେତାଙ୍କ ଧାଡି ଲମ୍ବୁଛି । ଟ୍ରମ୍ପଙ୍କୁ ତୋଷାମଦ କଲେ ହ୍ବାଇଟ୍ ହାଉସକୁ ଅବାଧ ପ୍ରବେଶର ସୁଯୋଗ ମିଳିବ । ବାଣିଜ୍ୟିକ ସୁଯୋଗ ମିଳିବ । ଟାରିଫ କମିବ । ଆଉ ଆମେରିକା କୋପରୁ ବଂଚିହେବ । ଏଥିପାଇଁ ଏବେ ଟ୍ରମ୍ପଙ୍କୁ ତେଲ ମାରିବା ସାଧାରଣ ଘଟଣା ହୋଇଛି । ଯେମିତି ପୁରୁଣା ରାଜାମାନଙ୍କ କ୍ଷେତ୍ରରେ ଘଟୁଥିଲା ।
ଦୁଇଦିନ ତଳେ ହ୍ବାଇଟ ହାଉସରେ ଟ୍ରମ୍ପଙ୍କ ସହ ୟୁରୋପୀୟ ନେତାମାନେ ଏକାଠି ଆଲୋଚନା କରୁଥିଲେ । ରୁଷ-ୟୁକ୍ରେନ ଯୁଦ୍ଧ ନେଇ ବୈଠକ ଚାଲିଥିଲା । ସେଠାରେ ଫ୍ରାନସ ରାଷ୍ଟ୍ରପତି, ବ୍ରିଟେନ ପ୍ରଧାନମନ୍ତ୍ରୀ , ଇଟାଲି ପ୍ରଧାନମନ୍ତ୍ରୀ, ୟୁକ୍ରେନ ରାଷ୍ଟ୍ରପତି ଯେଉଁଭଳି ଟ୍ରମ୍ପଙ୍କୁ ପ୍ରଶଂସା କରୁଥିଲେ । ଏଥିରୁ ମନେ ହେଉଥିଲା ଟ୍ରମ୍ପଙ୍କ ସ୍ତୁତି ଗାନ କଲାବେଳେ ଟ୍ରମ୍ପ ଭାବବିହ୍ବଳ ହୋଇଯାଉଥିଲେ । ଅନ୍ୟ ନେତାମାନଙ୍କ ଆଗରେ ଟ୍ରମ୍ପ ନିଜେ ହେଡମାଷ୍ଟର ଭଳି ବ୍ୟବହାର କରୁଥିଲେ । ସେହି ସମୟରେ ରୁଷ ୟୁକ୍ରେନରେ ଡ୍ରୋନ ଆକ୍ରମଣ କରୁଥିଲା । କିନ୍ତୁ ଏହି ନେତାମାନେ ସେ ବିଷୟରେ ଆଲୋଚନା କରିବା ବଦଳରେ ଟ୍ରମ୍ପଙ୍କ ପ୍ରଶଂସାରେ ମାତିଥିଲେ । ଟ୍ରମ୍ପଙ୍କ ନିକଟରେ ବସିଥିବା ଏହି ବିଶ୍ବ ନେତାମାନେ କେତେ ତୁଚ୍ଛ ତାହା ବାରି ହୋଇଯାଉଥିଲା ।
ନିକଟରେ ଆଫ୍ରିକୀୟ ନେତାମାନେ ଟ୍ରମ୍ପଙ୍କୁ ମାତ୍ରାଧିକ ପ୍ରଶଂସା କରିଛନ୍ତି । ଟ୍ରମ୍ପଙ୍କ ଗଲ୍ଫ ଖେଳକୁ ବିଶ୍ବସ୍ତରୀୟ କହିଛନ୍ତି । ଟ୍ରମ୍ପଙ୍କ ଖେଳିବାର କୌଶଳ ବିରଳ କହି ପ୍ରଶଂସା କରିଛନ୍ତି । ଆମେରିକାର ଅନ୍ୟ ରାଷ୍ଟ୍ରପତିଙ୍କ ଅପେକ୍ଷା ଟ୍ରମ୍ପ ଅନେକ ଯୁଦ୍ଧ ବନ୍ଦ କରିଥିବା କହିଛନ୍ତି । ତେଣୁ ଟ୍ରମ୍ପ ନୋବେଲ ପୁରସ୍କାର ପାଇଁ ସବୁଠୁ ଯୋଗ୍ୟ ନେତା ବୋଲି ସେମାନେ କହିଛନ୍ତି । ଏଭଳି ପ୍ରଶଂସା ପାଇଁ ଟ୍ରମ୍ପ ବହୁତ କସରତ କରିଥିବା ଚର୍ଚା ହେଉଛି ।
ପାକିସ୍ତାନ ସେନା ମୁଖ୍ୟ ଆସିମ ମୁନିର ଟ୍ରମ୍ପଙ୍କୁ ପ୍ରଶଂସା କରିବା ଆପଣ ଜାଣନ୍ତି । ଏଥିପାଇଁ ଟ୍ରମ୍ପ ତାଙ୍କୁ ବାରମ୍ବାର ଆମେରିକାକୁ ଡାକି ତାଙ୍କର ଗୁଣଗାନ କରିବାକୁ ସୁଯୋଗ ଦେଉଛନ୍ତି । ମୁନିରଙ୍କ ପ୍ରଶଂସାର ପତ୍ରକୁ ସେ ବାରମ୍ବାର ସୋସିଆଲ ମିଡିଆରେ ସେୟାର କରୁଛନ୍ତି । ଟ୍ରମ୍ପ କିଛି ନେତାଙ୍କ ପ୍ରଶଂସାକୁ ରାଜନୈତିକ ଓ ଅର୍ଥନୈତିକ ସୁବିଧା ହାସଲ କରିବାର ଉପାୟ ଭାବେ ବ୍ୟବହାର କରୁଛନ୍ତି।
ଆମେରିକା ସହ ଉତ୍ତର କୋରିଆ ସଂପର୍କ ଖରାପ ଥିବା ବେଳେ ,ଟ୍ରମ୍ପ ନିଜେ ଦାବି କରିଥିଲେ ଯେ କିମ ଜଙ୍ଗ-ଉନଙ୍କଠାରୁ ସେ “ଲଭ ଲେଟର” ପାଇଥିଲେ । ଚିଠିରେ କିମ ତାଙ୍କୁ ବହୁତ ପ୍ରଶଂସା କରିଥିଲେ । ଯାହାକି ସାରା ବିଶ୍ବର ଗଣମାଧ୍ୟମ ପ୍ରଥମ ପୃଷ୍ଠାରେ ନେଇଥିଲେ । ଏଭଳି କୂଟନୈତିକ କୌଶଳ ଟ୍ରମ୍ପ ଆପଣେଇଥାନ୍ତି । ଏହାଦ୍ବାରା ଆମେରିକା ବାଣିଜ୍ୟ ଚୁକ୍ତି କରି ଆର୍ଥିକ ଲାଭ ପାଇବା ସହଜ ହୋଇଥାଏ ।
ରାଜଦରବାରରେ କବିମାନଙ୍କ ସ୍ତୁତି ହେଉ କି ଆମେରିକା ରାଷ୍ଟ୍ରପତି ଭବନରେ ଟ୍ରମ୍ପଙ୍କ ଗୁଣଗାନ, ଏଥିରେ ସମାନ ଦୃଶ୍ୟ ରହିଛି । ଦିନେ ଅତ୍ୟଧିକ ପ୍ରଶଂସା ରାଜାଙ୍କୁ ଆନନ୍ଦିତ କରୁଥିଲା । ଆଜିକାଲି ଟ୍ରମ୍ପଙ୍କୁ ମହାଆନନ୍ଦ ପ୍ରଦାନ କରୁଛି । ସେ ନିଜକୁ ମହାରାଜା ଭାବୁଛନ୍ତି ।
ଡୋନାଲ୍ଡ ଟ୍ରମ୍ପଙ୍କର ପ୍ରଶଂସା ପ୍ରତି ଆଗ୍ରହ ଅନେକ ସମୟରେ ଭିଡିଓରେ ଦେଖାଯାଇଥାଏ । ତାଙ୍କୁ ଯିଏ ପ୍ରଶଂସା କରନ୍ତି ସେ ତାର ଭିଡିଓ ସୋସିଆଲ ମିଡିଆରେ ପ୍ରଚାର ପ୍ରସାର କରିଥାନ୍ତି । ପ୍ରଶଂସାକୁ ସେ ତାଙ୍କ ନେତୃତ୍ୱ ଶୈଳୀର ଏକ ମୁଖ୍ୟ ବୈଶିଷ୍ଟ୍ୟ ବୋଲି ପ୍ରଚାର କରିଥାନ୍ତି। ତାଙ୍କର ଏହି ପ୍ରବୃତ୍ତିକୁ ଗଜପତି ରାଜାମାନଙ୍କ ସହ ତୁଳନା କରାଯାଇପାରେ । ରାଜାମହାରାଜା ମାନେ ଯେପରି ନିଜର ପ୍ରଶଂସା ଶୁଣିବାକୁ କବି, ଚାଟୁକାର ରଖିଥାନ୍ତି । ତାଙ୍କର ସ୍ତୁତିଗାନ କରାଗଲେ ସେ ଉପହାର ଦେଇଥାନ୍ତି । ସେପରି ଏବେ ଟ୍ରମ୍ପ କରୁଛନ୍ତି । ସେ ଉପହାର ବଦଳରେ ଟାରିଫରେ କିଛି କମ କରିଦେଉଛନ୍ତି ।
ଟ୍ରମ୍ପଙ୍କର ପ୍ରଶଂସା ପ୍ରତି ଆଗ୍ରହ ଦିନକୁ ଦିନ ବଢ଼ିବାରେ ଲାଗିଛି । ଏବେ ସେ ଏହାକୁ ମଧ୍ୟ ନୋବେଲ ପୁରସ୍କାର ପାଇବା ପାଇଁ ଯୋଗ୍ୟତା ମାପଦଣ୍ଡର ଏକ କାରଣ ଭାବୁଛନ୍ତି । ଏହାଦ୍ବାର ତାଙ୍କର ଆତ୍ମସମ୍ମାନ ବୃଦ୍ଧି ପାଉଛି ବୋଲି ସେ ଦର୍ଶାଇଥାନ୍ତି । ଯେଉଁନେତାମାନେ ଆମେରିକା ଟ୍ରମ୍ପଙ୍କୁ ଭେଟିବାକୁ ଯାଆନ୍ତି । ସେମାନେ ଟ୍ରମ୍ପଙ୍କର ଅତ୍ୟଧିକ ପ୍ରଶଂସା କରୁଥିବା ଦେଖାଯାଏ । ଏହି ପ୍ରଶଂସାର ଚିଠିକୁ ସେ ତାଙ୍କ ସୋସିଆଲ ମିଡିଆରେ ସେୟାର ମଧ୍ୟ କରିଥାନ୍ତି । ଓଡ଼ିଶାର ରାଜାମାନଙ୍କୁ ଯେପରି କବିମାନେ ଜଗନ୍ନାଥଙ୍କ ପ୍ରତିନିଧି ଭାବେ କହି ସ୍ତୁତି କରିଥାନ୍ତି । ସେପରି ଟ୍ରମ୍ପଙ୍କୁ ବିଶ୍ବନେତାମାନେ ଅନେକ ସମୟରେ ସ୍ତୁତି କରୁଥିବା ଦେଖାଯାଏ । ସେ ପ୍ରତି ମିଟିଂରେ ନିଜକୁ ସତେ ଯେପରି ହେଡମାଷ୍ଟର ଭାବନ୍ତି ।
ତେବେ, ଅତ୍ୟଧିକ ଚାଟୁକାରିତା ପାଇଁ ଟ୍ରମ୍ପ ଏବେ ଉପହାସ ହେଉଛନ୍ତି । ଟ୍ରମ୍ପଙ୍କ କ୍ଷେତ୍ରରେ ମଧ୍ୟ ଏହା ସମାଲୋଚନାର କାରଣ ହେଉଛି । ବିଦେଶୀ ମିଡିଆମାନେ ଏହାକୁ ନେଇ ଟ୍ରମ୍ପଙ୍କୁ “cringe-inducing” ଲଜ୍ଜାଜନକ ସ୍ଥିତିରେ ପକାଉଥିବା କହୁଛନ୍ତି ।
ପ୍ରଶଂସା ମାଧ୍ୟମରେ ଟ୍ରମ୍ପ ଜନସାଧାରଣଙ୍କୁ ଏହା ଦେଖାଇବାକୁ ଚାହାଁନ୍ତି ଯେ ସେ ବହୁତ ଲୋକପ୍ରିୟ । ଯେମିତି କବିମାନେ ରାଜାଙ୍କୁ ପ୍ରଶଂସା କରି ଜନସାଧାରଣଙ୍କ ମନରେ ରାଜାଙ୍କ ପ୍ରତି ସମ୍ମାନ ବୃଦ୍ଧି କରୁଥିଲେ। ସେପରି ଟ୍ରମ୍ପ ପ୍ରଶଂସାକୁ ନିଜର ଇମେଜ ବଢ଼ାଇବା ପାଇଁ ବ୍ୟବହାର କରୁଛନ୍ତି । ତାଙ୍କ ଇମେଜ ଉଜ୍ଜ୍ୱଳ କରି ସେ ତାଙ୍କର ବ୍ୟକ୍ତିଗତ, ପାରିବାରିକ ବ୍ୟବସାୟର ଫାଇଦା କରୁଛନ୍ତି । ଏହା ସହ ଆମେରିକାର ଦବଦବା ଜାହରି କରୁଛନ୍ତି ।
ଟ୍ରମ୍ପ ଯେତେବେଳ ଦ୍ବିତୀୟ ଥର ପାଇଁ ରାଷ୍ଟ୍ରପତି ନିର୍ବାଚନ ଲଢ଼ି ପରାସ୍ତ ହେଲେ । ତାଙ୍କ ସମର୍ଥକମାନେ ରାସ୍ତାକୁ ବାହାରି ହିଂସା କଲେ । ଏପରିକି ୬ ଜାନୁୟାରୀ ୨୦୨୧ରେ କ୍ୟାପିଟାଲ ହିଲ ହିଂସାରେ ଟ୍ରମ୍ପଙ୍କ ଇମେଜ ମଳିନ ହେଲା । କୋର୍ଟ ତାଙ୍କୁ ଦୋଷ ଦେଲେ । ଏହା ପରଠୁ ଟ୍ରମ୍ପଙ୍କ ଟିମ୍ ପ୍ରଶଂସା କୌଶଳକୁ ଅଧିକ ଆପଣାଇଛି । ତାଙ୍କ ସମର୍ଥକମାନେ ହିଂସା କରୁଥିବା ବେଳେ ଯେତେବେଳେ କୋର୍ଟରେ ସେ ହାଜର ହୋଇ ପକ୍ଷ ରଖୁଥିଲେ । ସେତେବେଳେ ସୋସିଆଲ ମିଡିଆରେ ତାଙ୍କ ସମର୍ଥକମାନେ ଟ୍ରମ୍ପଙ୍କୁ ପ୍ରଶଂସାରେ ପୋତି ପକାଉଥିଲେ । ଏପରିକି ତାଙ୍କର ବନ୍ଧୁମାନେ ଏବଂ ବିଶ୍ବନେତାମାନେ ତାଙ୍କ ପଛରେ ରହି ପ୍ରଶଂସା କରୁଥିଲେ । ଯାହାକୁ ସେ ନିଜ ଭୋଟରଙ୍କ ସହ ସମ୍ପର୍କ ବଢ଼ାଇବା କାର୍ଯ୍ୟରେ ବ୍ୟବହାର କରୁଥିଲେ । ପୁଣି 2024ରେ ଦ୍ବିତୀୟବାର ରାଷ୍ଟ୍ରପତି ହେବା ପରେ ଟ୍ରମ୍ପ ଆମେରିକା ଫାଷ୍ଟ ନୀତିକୁ ଗ୍ରହଣ କରିଛନ୍ତି । ନୋବେଲ ଶାନ୍ତି ପୁରସ୍କାର ପାଇବାକୁ ତାଙ୍କର ଅସମ୍ଭବ ଇଚ୍ଛା ରହିଛି । ତେଣୁ ସେ ବିଶ୍ବନେତାଙ୍କ ସାମନାରେ ନିଜକୁ ମହାନ ନେତା ଦର୍ଶାଇବା ସହ ନିଜ କାମ ହାସଲ କରିବାକୁ ଚାପ ପକାଉଛନ୍ତି । ଏହାରି ମାଧ୍ୟମରେ ବାଣିଜ୍ୟ ଚୁକ୍ତି କିମ୍ବା ରାଜନୈତିକ ସମର୍ଥନ ପାଇଁ ସେ ଚେଷ୍ଟା କରୁଥିବା ଦେଖାଯାଉଛି ।
ତାଙ୍କୁ ଆଫ୍ରିକାର ନେତା, ୟୁରୋପ ନେତାମାନେ, ଏସିଆ ନେତାମାନେ ବାରମ୍ବାର ପ୍ରଶଂସା କରୁଥିବା ଦେଖାଯାଉଛି । ଆମେରିକା ଏକ ଶକ୍ତିଶାଳି ଦେଶ । ଟ୍ରମ୍ପ ବହୁ ଶକ୍ତିଶାଳୀ ନେତା । ତାଙ୍କର ଶକ୍ତି ଅନ୍ୟାମନଙ୍କ ଅପେକ୍ଷା ଅଧିକ । ଏହା ପ୍ରଦର୍ଶନ କରିବାକୁ ଚାହୁଁଛନ୍ତି ଟ୍ରମ୍ପ । ଆମେରିକାରେ ମଧ୍ୟ ଟ୍ରମ୍ପଙ୍କ ବିରୋଧୀ ରହିଛନ୍ତି । ତାଙ୍କୁ ଲଗାତାର ସମାଲୋଚନା କରନ୍ତି । ଆମେରିକାର କିଛି ଗଣମାଧ୍ୟମ ବର୍ଷ ବର୍ଷ ଧରି ଟ୍ରମ୍ପଙ୍କୁ ସମାଲୋଚନା କରୁଛନ୍ତି । ଏହି ସମାଲୋଚନାକୁ ଲୁଚାଇ ସେ ପ୍ରଶଂସାକୁ ଅଧିକ ପ୍ରଚାର କରୁଥିବା ଦେଖାଯାଉଛି । ଏଥିପାଇଁ ତାଙ୍କ ଟିମ୍ ଦିନ ରାତି ଏକ କରି କାମ କରୁଛନ୍ତି । ଯେତେବେଳେ ଅନେକ ବିଶ୍ବ ନେତା ଟ୍ରମ୍ପଙ୍କ କଥା ଶୁଣୁନାହାଁନ୍ତି । ଇରାନ ଟ୍ରମ୍ପଙ୍କୁ ଖାତିର କରୁନାହିଁ । ଇସ୍ରାଏଲ ଗାଜା ଉପରେ ବୋମା ବର୍ଷା କରୁଛି । ଭାରତ-ପାକିସ୍ତାନ ସିଜଫାୟାରରେ ମୋଦି ଟ୍ରମ୍ପଙ୍କୁ କ୍ରେଡିଟ ଦେଉନାହାଁନ୍ତି । ରୁଷ ୟୁକ୍ରେନ ଉପରେ ବୋମା ବର୍ଷଣ କରୁଛି । ବିଶ୍ବର ବିଭିନ୍ନ ପ୍ରାନ୍ତରେ ଅଘୋଷିତ ଯୁଦ୍ଧ ଲାଗି ରହିଛି । ସେତେବେଳେ ଟ୍ରମ୍ପ କହୁଛନ୍ତି ସେ ସବୁ ଯୁଦ୍ଧ ବନ୍ଦ କରିଦେଇଛନ୍ତି । ତେଣୁ ତାଙ୍କୁ ନୋବେଲ ପୁରସ୍କାର ମିଳିବା ଉଚିତ । ତାଙ୍କର ସମସ୍ତେ ଗୁଣଗାନ କରିବା ଉଚିତ ।
ପ୍ରଶଂସା ଟ୍ରମ୍ପଙ୍କୁ ଭଲ ଲାଗେ । କାରଣ ଏହା ତାଙ୍କୁ କୂଟନୈତିକ ଫାଇଦା ପ୍ରଦାନ କରୁଛି । ସେ ଅନ୍ୟ ଦେଶମାନଙ୍କ ଉପରେ ଚାପ ପକାଇ ନିଜର ସୁବିଧା ହାସଲ କରିବାକୁ ଚାହୁଁଛନ୍ତି । ଏପରିକି କୈାଣସି ଦେଶମୁଖ୍ୟଙ୍କଠାରୁ ପ୍ରଶଂସା ନପାଇଲେ ସେ ଦେଶ ଉପରେ ଅଧିକ ଟାରିଫ ଲଗାଇବାକୁ ଧମକ ଦେଉଛନ୍ତି । ଏପରିକି ବ୍ଲାକ୍ ମେଲ କରୁଛନ୍ତି । ପ୍ରଶଂସାକୁ ଟ୍ରମ୍ପ ଆଧୁନିକ ରାଜନୀତିରେ ଏକ ଶକ୍ତିଶାଳୀ ଅସ୍ତ୍ର ରୂପେ ବ୍ୟବହାର କରୁଛନ୍ତି । ତାଙ୍କ ଆଗରେ ନେତାମାନେ ମୁଣ୍ଡନୁଆଁଇ ପ୍ରଶଂସା କଲେ ସେ ନିଜକୁ କୃତ୍ୟ କୃତ୍ୟ ମନେ କରୁଛନ୍ତି ।
ସାମନ୍ତ ରାଜାମାନେ ଯେମିତି ଗଜପତି ରାଜାଙ୍କୁ ସ୍ତୁତି କରି ଯୁଦ୍ଧ ଏଡ଼ାଉଥିଲେ । ଅନେକ ବିଶ୍ବନେତା ସେହିଭଳି ଟ୍ରମ୍ପଙ୍କୁ ଟେକା ଟେକି କରି ପ୍ରଶଂସା କରି ଟ୍ରମ୍ପଙ୍କ ଟାରିଫ ଯୁଦ୍ଧରୁ ରକ୍ଷା ପାଇବାକୁ ଚାହୁଁଛନ୍ତି । କିଛି ଦେଶର ନେତାମାନେ ଟ୍ରମ୍ପଙ୍କୁ ପ୍ରଶଂସା କରି, ବାଣିଜ୍ୟ ଓ ରାଜନୈତିକ ସୁବିଧା ହାସଲ କରିବାକୁ ଚେଷ୍ଟା କରୁଛନ୍ତି। ସେମାନେ ଟ୍ରମ୍ପଙ୍କ ପ୍ରଶଂସା ପ୍ରତି ଆଗ୍ରହକୁ ବୁଝିଛନ୍ତି ।
ଟ୍ରମ୍ପଙ୍କର ପ୍ରଶଂସା ପ୍ରତି ଆଗ୍ରହକୁ ଦେଖିଲେ ଆପଣ ବୁଝିପାରିବେ ଏହା ତାଙ୍କର ଏକ ରଣନୀତି । କିଛି ବର୍ଷ ହେଲା ସେ କୂଟନୈତିକ ସୁବିଧା ହାସଲ ପାଇଁ ଏପରି କରୁଥିବା ଜଣାପଡୁଛି । ପ୍ରଶଂସା ଏକ ଶକ୍ତିଶାଳୀ କୌଶଳ । କିନ୍ତୁ ଏହାର ଅତ୍ୟଧିକ ବ୍ୟବହାର ଟ୍ରମ୍ପଙ୍କ ପାଇଁ କେଉଁଠି ନା କେଉଁଠି ଅପମାନର କାରଣ ହୋଇପାରେ।
ମନୋରଞ୍ଜନ ମିଶ୍ର
