ଦୀପାବଳି ପୂର୍ବଦିନ ଆଗ୍ରା-ଲକ୍ଷ୍ନୌ ଏକ୍ସପ୍ରେସୱେର, ଫତେହାବାଦ ଟୋଲ୍ ପ୍ଲାଜାରେ କେହି କର୍ମଚାରୀ ନଥିଲେ । ସେହି ରାସ୍ତା ଦେଇ ଯାଉଥିବା ଯାନବାହନର ଚାଳକମାନେ କିଛି ବୁଝିପାରୁନଥିଲେ । କାରଣ ରାସ୍ତାରେ ବୁମ୍ ବ୍ୟାରିଅର ନଥିଲା । କାହାକୁ ରୋକାଯାଉନଥିବାରୁ ଯାତ୍ରୀମାନେ ଟ୍ୟାକ୍ସ ନଦେଇ ଚାଲିଯାଉଥିଲେ । ତେବେ କାହିଁକି ଟୋଲ କର୍ମଚାରୀ ଗାଡ଼ିମାନଙ୍କଠାରୁ ଟୋଲ ଟ୍ୟାକ୍ସ ଆଦାୟ କରୁନଥିଲେ । ତାହା ଜାଣିବା ପାଇଁ ପୋଲିସ ଆସିବାକୁ ପଡ଼ିଥିଲା । ପୋଲିସ ଆସିବା ପରେ ଜଣାପଡିଥିଲା ଯେ, କର୍ମଚାରୀଙ୍କ ଦାବି ମୂତାବକ ବୋନସ କମ୍ପାନି ଦେଇନଥିଲା । ଟୋଲ କର୍ମଚାରୀମାନେ ଅଧିକ ବୋନସ ଟଙ୍କା ପାଇଁ କାମ ନକରି ଧାରଣାରେ ବସିଥିଲେ । ଦାବି ମୁତାବକ ଦୀପାବଳି ବୋନସ ନଦେବାରୁ ଟୋଲ କର୍ମଚାରୀମାନେ ଏଭଳି କରିବା ପାଇଁ ବଡ଼ ନିଷ୍ପତ୍ତି ନେଇଥିଲେ ।
ହଜାର ହଜାର ଗାଡ଼ି ଦୀପାବଳି ପୂର୍ବ ରାତିରେ ଟୋଲ ଟ୍ୟାକ୍ସ ନଦେଇ ଆଗ୍ରା- ଲକ୍ଷ୍ନୈା- ଏକ୍ସପ୍ରେସ ଓ୍ବେରେ ଯିବା ଆସିବା କରିଥିଲେ । ୨୧ ଜଣ ଟୋଲ୍ କର୍ମଚାରୀ ଶନିବାର ରାତିରୁ ନିଜର ଅସନ୍ତୋଷ ପ୍ରକାଶ କରି ଏଭଳି କରିଥିଲେ । ରବିବାର ସକାଳ ପର୍ଯ୍ୟନ୍ତ ପ୍ରାୟ ୧୦ ଘଣ୍ଟା ଧରି ସବୁ ବୁମ୍ ବ୍ୟାରିଅର୍ ଉଠାଇ ଦେଇଥିଲେ କର୍ମଚାରୀ। ଫଳରେ ୫ ହଜାରରୁ ଅଧିକ ଗାଡ଼ି ମାଗଣାରେ ରାସ୍ତା ପାର୍ ହୋଇଯାଇଛି। ଟୋଲ୍ ପରିଚାଳନା କରୁଥିବା ଶ୍ରୀ ସାଇନ୍ ଓ ଡାଟାର କମ୍ପାନୀ ଏଥର ପ୍ରତ୍ୟେକ କର୍ମଚାରୀଙ୍କୁ ମାତ୍ର ୧,୧୦୦ ଟଙ୍କା ବୋନସ୍ ଦେଇଥିଲା । ଗତ ବର୍ଷ ପୂର୍ବ କମ୍ପାନୀ ଅଧୀନରେ ସେମାନେ ୫,୦୦୦ ଟଙ୍କା ଲେଖାଏଁ ପାଇଥିଲେ। ସେଥିପାଇଁ ଏଥର କର୍ମଚାରୀମାନେ ନିଜର ଅସନ୍ତୋଷ ପ୍ରକାଶ କରିଥିଲେ । ପ୍ଲାଜାରୁ ଲକ୍ଷ ଲକ୍ଷ ଟଙ୍କା ଆୟ ହେଉଛି, କିନ୍ତୁ ଆମକୁ ୧,୧୦୦ ଟଙ୍କା ଦେଇ ଦୀପାବଳି ପାଳନ କରିବାକୁ କୁହାଯାଉଛି ବୋଲି ଜଣେ କର୍ମଚାରୀ କହିଥିଲେ ।
କମ୍ପାନୀ ପକ୍ଷରୁ କୁହାଯାଇଥିଲା ଯେ, ମାର୍ଚ୍ଚ ୨୦୨୫ରୁ ନୂଆ ଚୁକ୍ତି ହୋଇଛି । ତେଣୁ ପୂର୍ଣ୍ଣ ବର୍ଷର ବୋନସ୍ ଦେବା କମ୍ପାନି ପକ୍ଷେ ସମ୍ଭବ ନୁହେଁ । ପୋଲିସ୍ ଓ ପ୍ରଶାସନ ଘଟଣାସ୍ଥଳରେ ପହଞ୍ଚି ଆଲୋଚନା କରିଥିଲେ। ଅବଶେଷରେ କମ୍ପାନୀ ୧୦% ଦରମା ବୃଦ୍ଧି ଓ ଅନ୍ୟ ସୁବିଧା ଘୋଷଣା କରିବା ପରେ କର୍ମଚାରୀମାନେ କାର୍ଯ୍ୟରେ ଯୋଗ ଦେଇଥିଲେ। ତେବେ ଏହି ଘଟଣା ଯୋଗୁଁ ସରକାରଙ୍କୁ ଲକ୍ଷାଧିକ ଟଙ୍କାର ରାଜସ୍ୱ କ୍ଷତି ହୋଇଛି । କିନ୍ତୁ ସେଦିନ ଯାତ୍ରା କରିଥିବା ଗାଡି ମାଲିକମାନେ ଦୀପାବଳି ଏଭଳି ଅଚାନକ ଉପହାର ପାଇ ଖୁସି ଅନୁଭବ କରିଥିଲେ ।
