ଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବହୁ ପ୍ରତିକ୍ଷିତ ଭାରତ ଗସ୍ତ ଆରମ୍ଭ ହେବାକୁ ଯାଉଛି । ଦୁଇ ଦିନିଆ ଗୁରୁତ୍ୱପୂର୍ଣ୍ଣ ଗସ୍ତରେ ଭାରତ ଆସୁଛନ୍ତି ପୁଟିନ । ଆଜି ଅପରାହ୍ନ ପ୍ରାୟ ୪:୩୦ରେ ସେ ଦିଲ୍ଲୀରେ ପହଞ୍ଚିବେ। ଏହି ଗସ୍ତର ମୁଖ୍ୟ ଉଦ୍ଦେଶ୍ୟ ହେଉଛି ୨୩ତମ ଭାରତ-ରୁଷ ଶିଖର ସମ୍ମିଳନୀରେ ଯୋଗ ଦେବା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଦ୍ୱିପାକ୍ଷିକ ଆଲୋଚନା କରିବା। ଦୁଇ ଦେଶ ମଧ୍ୟରେ ସଂପର୍କକୁ ଆହୁରି ସଶକ୍ତ କରିବା । ପ୍ରତିରକ୍ଷା ଚୁକ୍ତି କରିବା ।
ବର୍ତ୍ତମାନର ରୁଷ-ୟୁକ୍ରେନ ଯୁଦ୍ଧ ଓ ଆମେରିକା ସହ ଚାଲିଥିବା ଟାରିଫ ବିବାଦ ସମୟରେ ଏହି ଭେଟଘାଟ ବିଶ୍ୱ ପାଇଁ ବେଶ୍ ଗୁରୁତ୍ୱ ବହନ କରୁଛି। ଦୁଇ ଦେଶ ମଧ୍ୟରେ ଏକ ବଡ଼ ପ୍ରତିରକ୍ଷା ଚୁକ୍ତି ସ୍ୱାକ୍ଷରିତ ହେବାର ସମ୍ଭାବନା ରହିଛି। ଏହା ବ୍ୟତୀତ, କ୍ରେମଲିନକୁ ପୁଣିଥରେ ଶାନ୍ତି ପ୍ରସ୍ତାବ ଦେଇ ଯୁଦ୍ଧ ବନ୍ଦ କରିବା ଦିଗରେ ବଡ଼ ପଦକ୍ଷେପ ନିଆଯାଇପାରେ।
କାର୍ଯ୍ୟକ୍ରମ ଅନୁଯାୟୀ, ଆଜି ରାତିରେ ମୋଦୀଙ୍କ ସହ ପୁଟିନଙ୍କର ରାତ୍ରିଭୋଜନ କାର୍ଯ୍ୟକ୍ରମ ରହିଛି। ଆସନ୍ତାକାଲି ଭାରତମଣ୍ଡପମ୍ରେ ୨୩ତମ ଶିଖର ସମ୍ମିଳନୀ ଅନୁଷ୍ଠିତ ହେବ, ଯେଉଁଥିରେ ଭାରତ-ରୁଷ ବିଜନେସ୍ ଫୋରମ୍କୁ ମଧ୍ୟ ସମ୍ବୋଧିତ କରାଯିବ।
ପୁଟିନଙ୍କ ଗସ୍ତକୁ ଦୃଷ୍ଟିରେ ରଖି ଦିଲ୍ଲୀରେ ଅତ୍ୟାଧୁନିକ ପାଞ୍ଚ-ସ୍ତରୀୟ ସୁରକ୍ଷା ବଳୟ ସହ ହାଇ ଟାଇଟ୍ ସିକ୍ୟୁରିଟି ବ୍ୟବସ୍ଥା କରାଯାଇଛି। NSG, SPG ଏବଂ ରୁଷ ସୁରକ୍ଷା ଅଧିକାରୀମାନେ ମିଳିତ ଭାବେ ସୁରକ୍ଷା ଦାୟିତ୍ୱ ତୁଲାଉଛନ୍ତି। ଏହି ସମୟରେ, ଆର୍ମର୍ଡ ଲିମୁଜିନ୍ ‘ସେନାଟ୍’ ଏବଂ ପରୀକ୍ଷା କରାଯାଇଥିବା ସ୍ୱତନ୍ତ୍ର ଭୋଜନ/ପାନୀୟ ସମେତ ସମସ୍ତ କଡ଼ା ପ୍ରୋଟୋକଲ୍ ଅନୁସରଣ କରାଯାଉଛି।
