ଆଳୁ ଖୋଳୁ ଖୋଳୁ ମହାଦେବ…ବ୍ୟାଙ୍କରୁ ସବୁ ମାରିନେଲେ ମ୍ୟାନେଜର

ମାଲକାନଗିରି ଜିଲ୍ଲା କେନ୍ଦ୍ର ସମବାୟ ବ୍ୟାଙ୍କରେ ଏକ ବଡ଼ ଧରଣର ସ୍କାମ୍‌ର ପର୍ଦ୍ଦାଫାଶ ହୋଇଛି। ବ୍ୟାଙ୍କ ମ୍ୟାନେଜର ଶୁଭେନ୍ଦୁ ଖରା ପ୍ରାୟ ୧ କୋଟି ୭ ଲକ୍ଷ ଟଙ୍କାର ହେରଫେର କରିଥିବା ଜଣାପଡ଼ିବା ପରେ ବିଭାଗ ପକ୍ଷରୁ ତାଙ୍କୁ ତୁରନ୍ତ ନିଲମ୍ବନ କରାଯାଇଛି।

କିଭଳି ହୋଇଥିଲା ଘୋଟାଲା?

• ମିଛ ରସିଦ ଦେଇ ଟଙ୍କା ହଡ଼ପ: ମାଲକାନଗିରି ଲ୍ୟାମ୍ପସର ବ୍ରାଞ୍ଚ ଇନଚାର୍ଜ ପ୍ରାୟ ୭୭ ଲକ୍ଷ ଟଙ୍କା ବ୍ୟାଙ୍କରେ ଜମା ନକରି ମ୍ୟାନେଜରଙ୍କୁ ହସ୍ତାନ୍ତର କରିଥିଲେ। ମ୍ୟାନେଜର ଶୁଭେନ୍ଦୁ ଖରା ତାଙ୍କୁ ଏକ ଜାଲ୍ (Fake) ରସିଦ ଦେଇ ସମସ୍ତ ଟଙ୍କା ନିଜ ପାଖରେ ରଖିଦେଇଥିଲେ।
• ପୋଟେରୁ ଲ୍ୟାମ୍ପସରୁ ମଧ୍ୟ ହେରଫେର: ସେହିପରି ପୋଟେରୁ ଲ୍ୟାମ୍ପସ ଇନଚାର୍ଜ ଦୁଇଟି ପର୍ଯ୍ୟାୟରେ (ପ୍ରଥମେ ୮ ଲକ୍ଷ ୧୦ ହଜାର ଏବଂ ପରେ ୨୧ ଲକ୍ଷ ୯୫ ହଜାର ଟଙ୍କା) ମ୍ୟାନେଜରଙ୍କୁ ଦେଇଥିଲେ।

କ୍ଲୋଜିଂ ସମୟରେ ଧରାପଡ଼ିଲା ଗୁମର

ମାର୍ଚ୍ଚ ମାସର ବାର୍ଷିକ ଆର୍ଥିକ ହିସାବ (Closing) ଚାଲିଥିବା ସମୟରେ ବ୍ୟାଙ୍କର ଜମା ଟଙ୍କା ଏବଂ କାଗଜପତ୍ର ମଧ୍ୟରେ ତାଳମେଳ ରହିନଥିଲା। ଲ୍ୟାମ୍ପସ୍ କର୍ତ୍ତୃପକ୍ଷ କ୍ୟାସିୟରଙ୍କ ନିକଟରେ ଟଙ୍କା ପୈଠ ନକରି କାହିଁକି ମ୍ୟାନେଜରଙ୍କୁ ଦେଲେ, ସେ ନେଇ ସନ୍ଦେହ ସୃଷ୍ଟି ହୋଇଥିଲା। ଏହାପରେ DRCS କାର୍ଯ୍ୟାଳୟ ପକ୍ଷରୁ ତଦନ୍ତ ଆରମ୍ଭ ହୋଇଥିଲା।

କାର୍ଯ୍ୟାନୁଷ୍ଠାନ

ଉଚ୍ଚସ୍ତରୀୟ ତଦନ୍ତରୁ ଜଣାପଡ଼ିଛି ଯେ ମ୍ୟାନେଜର ଏହି ବିପୁଳ ପରିମାଣର ଟଙ୍କାକୁ ନିଜର ବ୍ୟକ୍ତିଗତ କାର୍ଯ୍ୟରେ ଖର୍ଚ୍ଚ କରିଦେଇଛନ୍ତି।

ଅଭିଯୁକ୍ତ ମ୍ୟାନେଜର ଶୁଭେନ୍ଦୁ ଖରାଙ୍କ ବିରୋଧରେ ଥାନାରେ ଏତଲା ଦିଆଯିବା ସହ ତାଙ୍କୁ ନିଲମ୍ବିତ (Suspended) କରାଯାଇଛି।

ଏହି ଘଟଣା ସମବାୟ ବ୍ୟାଙ୍କର ସ୍ୱଚ୍ଛତା ଉପରେ ପ୍ରଶ୍ନବାଚୀ ସୃଷ୍ଟି କରିଥିବା ବେଳେ ଏଥିରେ ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ, ସେ ନେଇ ପୋଲିସ ଅଧିକ ଖୋଳତାଡ଼ ଜାରି ରଖିଛି।