ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିବୃତ୍ତି ସମଗ୍ର ବିଶ୍ୱରେ ପରମାଣୁ ଅସ୍ତ୍ରଶସ୍ତ୍ର ପ୍ରତିଯୋଗିତାକୁ ନେଇ ପୁଣି ଥରେ ଉତ୍ତେଜନା ସୃଷ୍ଟି କରିଛି। ଆମେରିକୀୟ ଟେଲିଭିଜନ ଚ୍ୟାନେଲକୁ ଦେଇଥିବା ସାକ୍ଷାତକାରରେ ଟ୍ରମ୍ପ ଦାବି କରିଛନ୍ତି ଯେ ପାକିସ୍ତାନ, ରୁଷ , ଚୀନ୍ ଏବଂ ଉତ୍ତର କୋରିଆ ପରମାଣୁ ଅସ୍ତ୍ରଶସ୍ତ୍ର ପରୀକ୍ଷଣ କରୁଛନ୍ତି। ଏହି ଦେଶଗୁଡ଼ିକ ଏହି ପରୀକ୍ଷଣ ବିଷୟରେ କୌଣସି ଘୋଷଣା କରୁନାହାଁନ୍ତି । ଗୁପ୍ତରେ ମାଟିତଳେ ପରୀକ୍ଷଣ କରୁଥିବାରୁ କେହି ସୂଚନା ଜାଣିପାରୁନାହାଁନ୍ତି । ସାମାନ୍ୟ ଭୂମିକମ୍ପ ହେଉଛି , ଯାହା କିଛି ଗୁପ୍ତ ରହୁଛି ।
ଆମେରିକା ଯାହା ପରୀକ୍ଷଣ କରୁଛି ସମସ୍ତେ ଜାଣୁଛନ୍ତି । କାରଣ ସେଠି ଗଣମାଧ୍ୟମରେ ସବୁ ପ୍ରଚାର, ପ୍ରସାର କରାଯାଉଛି । ପାକିସ୍ତାନ ଏବଂ ଉତ୍ତର କୋରିଆ ନିୟମିତ ପରୀକ୍ଷଣ କରୁଥିବା ଟ୍ରମ୍ପ ଦାବି କରିଛନ୍ତି।
ଟ୍ରମ୍ପ କହିଛନ୍ତି ଯେ ଆମେରିକା ତୁରନ୍ତ ପରମାଣୁ ଅସ୍ତ୍ରଶସ୍ତ୍ରର ପରୀକ୍ଷଣ ପୁନଃ ଆରମ୍ଭ କରିବ। ପ୍ରାୟ ୩୩ ବର୍ଷରୁ ଅଧିକ ସମୟ ଧରି ଆମେରିକା ସ୍ୱେଚ୍ଛାକୃତ ଭାବରେ ପରମାଣୁ ପରୀକ୍ଷଣରୁ ବିରତ ରହିଥିବା ସେ କହିଛନ୍ତି । ଟ୍ରମ୍ପ କହିଛନ୍ତି ଆମେ ପରୀକ୍ଷଣ କରିବାକୁ ଯାଉଛୁ, କାରଣ ସେମାନେ ଏବଂ ଅନ୍ୟମାନେ ପରୀକ୍ଷଣ କରୁଛନ୍ତି। ଆମେ ଏକମାତ୍ର ଦେଶ ହୋଇ ରହିବାକୁ ଚାହୁଁନାହୁଁ ଯିଏ ପରୀକ୍ଷଣ କରୁନାହିଁ। ଆମର ଅସ୍ତ୍ରଶସ୍ତ୍ରର ବିଶ୍ୱସନୀୟତା ଯାଞ୍ଚ କରିବା ପାଇଁ ଏହା ଅତ୍ୟନ୍ତ ଜରୁରୀ।
ଯଦି ଟ୍ରମ୍ପଙ୍କ ଦାବି ସତ ହୁଏ ତେବେ ଭାରତ ମଧ୍ୟ ଏଥିପ୍ରତି ସତର୍କ ରହିବା ଆବଶ୍ୟକ । ପାକିସ୍ତାନ ଏବଂ ଚୀନ୍ ଗୁପ୍ତରେ ପରମାଣୁ ପରୀକ୍ଷଣ କରୁଛନ୍ତି ଯାହା ଭାରତ ପାଇଁ ବିପଦ । ଭବିଷ୍ୟତରେ ଏହି ଦୁଇ ଦେଶ ଭାରତ ପାଇଁ ଚ୍ୟାଲେଞ୍ଜ ସୃଷ୍ଟି କରିବେ ।
