ଆମେ ହ୍ୱାଟସ୍ଆପ୍ ଚାଟ କେତେ ସୁରକ୍ଷିତ ? କମ୍ପାନୀ ଦାବି କରେ ଯେ ଏହା ‘ଏଣ୍ଡ-ଟୁ-ଏଣ୍ଡ ଏନକ୍ରିପ୍ଟେଡ୍’, ଅର୍ଥାତ୍ ପ୍ରେରକ ଏବଂ ଗ୍ରାହକଙ୍କ ବ୍ୟତୀତ ତୃତୀୟ ପକ୍ଷ ଏହାକୁ ପଢ଼ିପାରିବେ ନାହିଁ। କିନ୍ତୁ ଏବେ ଏକ ନୂଆ ବିବାଦ ସାମ୍ନାକୁ ଆସିଛି, ଯାହା ହ୍ୱାଟସ୍ଆପ୍ର ଏହି ଦାବି ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ଆମେରିକା ଏଜେଣ୍ଟଙ୍କୁ ମିଳିଲା ‘ପ୍ରମାଣ’
ରିପୋର୍ଟ ଅନୁଯାୟୀ, ଆମେରିକା ସରକାରଙ୍କ ଏକ ସ୍ୱତନ୍ତ୍ର ଏଜେନ୍ସି ହ୍ୱାଟସ୍ଆପ୍ର ଗୋପନୀୟତାକୁ ନେଇ ଏକ ତଦନ୍ତ ଆରମ୍ଭ କରିଥିଲା। ଏହି ତଦନ୍ତକାରୀ ଟିମ୍ର ଜଣେ ଏଜେଣ୍ଟ ହ୍ୱାଟସ୍ଆପ୍ରେ ବ୍ୟକ୍ତିଗତ ମେସେଜ୍ ଲିକ୍ ହେଉଥିବା ବା କମ୍ପାନୀ ଦ୍ୱାରା ପଢ଼ାଯାଉଥିବା ନେଇ କିଛି ଗୁରୁତ୍ୱପୂର୍ଣ୍ଣ ପ୍ରମାଣ ପାଇଥିଲେ। କିନ୍ତୁ ଆଶ୍ଚର୍ଯ୍ୟଜନକ ଭାବେ, ଏହି ପ୍ରମାଣ ମିଳିବା ପରେ ପରେ ହିଁ ସମ୍ପୂର୍ଣ୍ଣ ତଦନ୍ତ ପ୍ରକ୍ରିୟାକୁ ହଠାତ୍ ବନ୍ଦ କରିଦିଆଯାଇଛି।
କାହିଁକି ବନ୍ଦ ହେଲା ତଦନ୍ତ?
ଏହି ତଦନ୍ତ କାହିଁକି ବନ୍ଦ ହେଲା, ସେନେଇ କୌଣସି ସ୍ପଷ୍ଟ କାରଣ ଦର୍ଶାଯାଇ ନାହିଁ। ତେବେ ଚର୍ଚ୍ଚା ହେଉଛି ଯେ, ଯଦି ଏହି ତଦନ୍ତର ରିପୋର୍ଟ ସର୍ବସାଧାରଣ ହୋଇଥାନ୍ତା, ତେବେ ଟେକ୍ ଦୁନିଆରେ ବଡ଼ ଧରଣର ବିସ୍ଫୋରଣ ହୋଇଥାନ୍ତା। ଅନ୍ୟପକ୍ଷରେ, ହ୍ୱାଟସ୍ଆପ୍ ପୂର୍ବଭଳି ନିଜର ପ୍ରାଇଭେସି ପଲିସିକୁ ନେଇ ଦୃଢ଼ ରହିଛି ଏବଂ ମେସେଜ୍ ପଢ଼ିବା କଥାକୁ ଅସ୍ୱୀକାର କରିଛି।
ହ୍ୱାଟସ୍ଆପ୍ର ପ୍ରତିକ୍ରିୟା:
ହ୍ୱାଟସ୍ଆପ୍ ସବୁବେଳେ କହିଆସିଛି ଯେ, ୟୁଜର୍ସଙ୍କ ସୁରକ୍ଷା ସେମାନଙ୍କ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ। ଏପରିକି ସରକାର ଚାହିଁଲେ ମଧ୍ୟ ସେମାନେ ମେସେଜ୍ ଦେଖାଇପାରିବେ ନାହିଁ ବୋଲି କମ୍ପାନୀ ଦାବି କରିଆସୁଛି। କିନ୍ତୁ ଆମେରିକୀୟ ଏଜେଣ୍ଟଙ୍କ ଏହି ଦାବି ଏବେ କୋଟି କୋଟି ୟୁଜର୍ସଙ୍କ ମନରେ ସନ୍ଦେହ ସୃଷ୍ଟି କରିଛି।
ସତର୍କତା: ଯଦିଓ ଏହି ରିପୋର୍ଟ ଏକ ନିର୍ଦ୍ଦିଷ୍ଟ ତଦନ୍ତ ଉପରେ ଆଧାରିତ, ତଥାପି ସୋସିଆଲ ମିଡିଆରେ ଅତ୍ୟନ୍ତ ବ୍ୟକ୍ତିଗତ ତଥା ସମ୍ବେଦନଶୀଳ ତଥ୍ୟ ସେୟାର କରିବା ସମୟରେ ସତର୍କ ରହିବାକୁ ବିଶେଷଜ୍ଞମାନେ ପରାମର୍ଶ ଦେଉଛନ୍ତି।
