ସାରା ଦେଶରେ ଦୀପାବଳି ବହୁ ଧୁମଧାମରେ ପାଳନ କରାଯାଇଥିବା ବେଳେ ଦିଲ୍ଲୀର ବାୟୁ ପ୍ରଦୂଷଣ ସ୍ଥିତି ସଙ୍ଗୀନ ହୋଇପଡ଼ିଛି । ଗତକାଲି ରାତିରେ ବହୁ ସଂଖ୍ୟକ ଲୋକ ଆତସବାଜି ଫୁଟାଇ ଦୀପାବଳି ପାଳନ କରିଥିଲେ । ଯାହା ଫଳରେ ଦିଲ୍ଲୀର ବାୟୁ ବହୁତ ଖରାପ ହୋଇଯାଇଛି। ଆଜି ସକାଳେ ବାୟୁ ଗୁଣବତ୍ତା ବିପଦପୂର୍ଣ୍ଣ ବର୍ଗରେ ପହଞ୍ଚିଛି । ସକାଳ ୬ଟାରେ ସହରର ପ୍ରାୟ ସମସ୍ତ ଅଞ୍ଚଳରେ ବାୟୁ ଗୁଣବତ୍ତା ସୂଚକାଙ୍କ ( AQI) ଅତ୍ୟନ୍ତ ବିପଦପୂର୍ଣ୍ଣ ବର୍ଗରେ ରେକର୍ଡ କରାଯାଇଥିଲା, ଯାହା ସ୍ୱାସ୍ଥ୍ୟ ପାଇଁ ବହୁତ ବିପଦପୂର୍ଣ୍ଣ । ସେହିପରି ଦୀପାବଳି ପାଳନ ବେଳେ ବାଣ ଫୁଟାଇବାରୁ ଭୁବନେଶ୍ୱର ଏବଂ କଟକରେ ବାୟୁ ପ୍ରଦୂଷଣ ସ୍ତର ବୃଦ୍ଧି ପାଇଛି। ବାଣ ଫୁଟାଇବା ଯୋଗୁଁ ପ୍ରବଳ ପ୍ରଦୂଷଣ ହେତୁ ବାୟୁ ଗୁଣବତ୍ତା ସୂଚକାଙ୍କ (AQI) ହ୍ରାସ ପାଇଛି। ରିପୋର୍ଟ ଅନୁଯାୟୀ, ରାଜଧାନୀରେ AQI ୧୮୦ରେ ପହଁଚିଛି । ଭୁବନେଶ୍ୱରର ବିଭିନ୍ନ ସ୍ଥାନରେ ବାୟୁ ପ୍ରଦୂଷିତ ହୋଇଯାଇଛି। ଲକ୍ଷ୍ମୀସାଗର ଅଞ୍ଚଳରେ AQI ୧୮୫ ରେକର୍ଡ କରାଯାଇଥିବା ବେଳେ, ବାପୁଜୀ ନଗର ଅଞ୍ଚଳରେ AQI ୧୭୪ ରେକର୍ଡ କରାଯାଇଛି।
ଏଠାରେ ଉଲ୍ଲେଖଯୋଗ୍ୟ ଯେ ସାଧାରଣତଃ 150 ରୁ ଅଧିକ AQI କୁ unhealthy ବୋଲି ବିବେଚନା କରାଯାଏ। ଯଦି ବାୟୁମଣ୍ଡଳରେ ଧୂଳି କଣିକା ବୃଦ୍ଧି ପାଏ, ତେବେ ଶ୍ୱାସକ୍ରିୟା ସମସ୍ୟା ଏବଂ ଚର୍ମ ରୋଗ ହେବାର ସମ୍ଭାବନା ଥାଏ। 50 ଭିତରେ ଏକ୍ୟୁଆଇ ରହିଲେ ତାହାକୁ ଭଲ କୁହାଯାଏ । 100ରୁ ଅଧିକ ହେଲେ ତାହା ନିଶ୍ବାସନେବା ବେଳେ କଷ୍ଟ ହୁଏ । 200ରୁ ଅଧିକ ଏକ୍ୟୁଆଇ ରହିଲେ ତାହା ଶରୀର ପାଇଁ କ୍ଷତିକାରକ ହୋଇଥାଏ ।
ଦିଲ୍ଲୀର ଅଧିକାଂଶ ଅଞ୍ଚଳରେ AQI ଗମ୍ଭୀର ବର୍ଗରେ ଅଛି । ବାୟୁ ଗୁଣବତ୍ତା ଅତ୍ୟନ୍ତ ପ୍ରଦୂଷିତ ହୋଇଯାଇଛି । ଆଜି ସକାଳୁ ଚାଣକ୍ୟ ପ୍ଲେସରେ ଏକ୍ୟୁଆଇ ସ୍ତର ୯୭୯ରେ ପହଞ୍ଚିଥିଲା । ଆନନ୍ଦ ବିହାର: 500 , ବାୱାନା: 427 , ୱାଜିରପୁର: 408 , ଆଲିପୁର: 408 , ଜାହାଙ୍ଗୀରପୁରୀ: 407 , ବୁରାରୀ କ୍ରସିଂ: 402 ,ଅଶୋକ ବିହାର: 391, ପଟେଲ ନଗର ୬୧୮, ରଞ୍ଜିତ ନଗର ୬୦୯, ପଞ୍ଜାବୀ ବାଗ ୫୧୯ ଏବଂ ହରି ନଗର ୫୧୮ ଥିଲା। ଏହି ସମସ୍ତ ଅଞ୍ଚଳରେ AQI ଅତ୍ୟନ୍ତ ଖରାପ ବର୍ଗରେ ରହିଛି । ୱାଜିରପୁରରେ ୪୦୮, ଜାହାଙ୍ଗୀରପୁରୀରେ ୪୦୧ ଏବଂ ବାୱାନାରେ ୪୧୭ AQI ରେକର୍ଡ କରାଯାଇଥିଲା । ଯାହା ଗମ୍ଭୀର ବର୍ଗରେ ଅନ୍ତର୍ଭୁକ୍ତ। ସ୍ୱାସ୍ଥ୍ୟ ବିଭାଗ ପିଲା , ବୃଦ୍ଧ ଏବଂ ଅସୁସ୍ଥମାନଙ୍କୁ ବିଶେଷ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି।
ସେହିପରି ଭୁବନେଶ୍ବରରେ ପ୍ରଶାସନ ଗତକାଲି ଦୁଇଘଣ୍ଟା ବାଣଫୁଟାଇବାକୁ ନିୟମ କରିଥିଲା । ଯାହାକୁ ଫୁ କରିଦେଲେ ଲୋକେ। ଭୁବନେଶ୍ବରରେ ରାତି ୯ଟା ପରେ ବି ଫୁଟିଲା ଢୋ ଢା। ଧୂଆଁମୟ ହୋଇଥିଲା ରାତିର ରାଜଧାନୀ ଆକାଶ। ନିୟମକୁ ସାରା ରାଜ୍ୟରେ ଲାଗୁ କରିବାକୁ ପ୍ରଶାସନକୁ ଦିଆଯାଇଥିଲା ନିର୍ଦ୍ଦେଶ। କିନ୍ତୁ ସୋମବାର ଦୀପାବଳି ଉତ୍ସବ ପାଳନ ବେଳେ ଲୋକେ ଏହି ନିୟମକୁ ମାନିନାହାଁନ୍ତି ।
