ବଲିଉଡର ବିଶିଷ୍ଟ ଅଭିନେତା ତଥା ‘ହି-ମ୍ୟାନ୍’ ଭାବରେ ପରିଚିତ ଧର୍ମେନ୍ଦ୍ର ଅସୁସ୍ଥତା କାରଣରୁ ମୁମ୍ବାଇର ଏକ ଘରୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ତାଙ୍କର ସ୍ୱାସ୍ଥ୍ୟଗତ ଅସୁବିଧା ନେଇ ଖବର ପ୍ରକାଶ ପାଇବା ପରେ ତାଙ୍କ ପ୍ରଶଂସକ ଏବଂ ବଲିଉଡ ତାରକାମାନଙ୍କ ମଧ୍ୟରେ ଚିନ୍ତା ପ୍ରକାଶ ପାଇଛି। ଗତକାଲି ରାତିରେ ସେ ସାମାନ୍ୟ ଅସୁସ୍ଥତା ଅନୁଭବ କରିଥିଲେ। ସତର୍କତାମୂଳକ ପଦକ୍ଷେପ ଭାବରେ ତାଙ୍କୁ ଡାକ୍ତରଖାନାକୁ ନିଆଯାଇଛି। ଡାକ୍ତରଖାନା କର୍ତ୍ତୃପକ୍ଷଙ୍କ ଅନୁଯାୟୀ, ଅଭିନେତା ଧର୍ମେନ୍ଦ୍ରଙ୍କ ସ୍ୱାସ୍ଥ୍ୟାବସ୍ଥା ବର୍ତ୍ତମାନ ସ୍ଥିର ରହିଛି। ଡାକ୍ତରମାନେ ତାଙ୍କୁ ସମ୍ପୂର୍ଣ୍ଣ ଆରୋଗ୍ୟ ପାଇଁ କିଛି ଦିନ ବିଶ୍ରାମ ନେବାକୁ ପରାମର୍ଶ ଦେଇଛନ୍ତି। ତାଙ୍କ ଅସୁସ୍ଥତା ଖବର ମିଳିବା ପରେ ପ୍ରଶଂସକମାନେ ସୋସିଆଲ ମିଡିଆରେ ତାଙ୍କର ଆଶୁ ଆରୋଗ୍ୟ କାମନା କରି ବାର୍ତ୍ତା ପଠାଇବାରେ ଲାଗିଛନ୍ତି। ତାଙ୍କ ପୁଅ ସନ୍ନି ଦେଓଲ୍ ଏବଂ ବବି ଦେଓଲ୍ ଡାକ୍ତରଖାନାରେ ତାଙ୍କ ସହ ଅଛନ୍ତି।
ଅଭିନେତା ଧର୍ମେନ୍ଦ୍ର ବର୍ତ୍ତମାନ ଭେଣ୍ଟିଲେଟର ସପୋର୍ଟରେ ଅଛନ୍ତି। ପ୍ରାୟ ଏକ ସପ୍ତାହରୁ ଅଧିକ ସମୟ ଧରି ଶ୍ୱାସକ୍ରିୟାରେ ଅସୁବିଧା ଅଭିଯୋଗ କରିବା ପରେ ଧର୍ମେନ୍ଦ୍ରଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଡିସେମ୍ବର ୮, ୨୦୨୫ ରେ ସେ ୯୦ ବର୍ଷରେ ପଦାର୍ପଣ କରିବାକୁ ଯାଉଛନ୍ତି। ଏପ୍ରିଲ ମାସରେ ତାଙ୍କର ଏକ ଚକ୍ଷୁ ପ୍ରତିରୋପଣ ଅସ୍ତ୍ରୋପଚାର କରାଯାଇଥିଲା। ୧୯୬୦ ମସିହାରେ ‘ଦିଲ୍ ଭି ତେରା ହମ୍ ଭି ତେରେ’ ଚଳଚ୍ଚିତ୍ରରୁ ଡେବ୍ୟୁ କରିଥିଲେ। ସେ ୧୯୬୦ ଦଶକରେ ‘ଅନପଢ଼’, ‘ବନ୍ଦିନୀ’, ‘ଅନୁପମା’ ଏବଂ ‘ଆୟା ସାୱନ୍ ଝୁମ୍ କେ’ ଭଳି ଚଳଚ୍ଚିତ୍ରରେ ସାଧାରଣ ଲୋକଙ୍କ ଭୂମିକାରେ ଅଭିନୟ କରି ପ୍ରଶଂସା ପାଇଥିଲେ। ପରବର୍ତ୍ତୀ ସମୟରେ ‘ଶୋଲେ’, ‘ଧରମ୍ ବୀର’, ‘ଚୁପ୍କେ ଚୁପ୍କେ’, ‘ମେରା ଗାଁଓ ମେରା ଦେଶ’, ଏବଂ ‘ଡ୍ରିମ୍ ଗର୍ଲ’ ଭଳି ଚଳଚ୍ଚିତ୍ରରେ ମୁଖ୍ୟ ଭୂମିକାରେ ନଜର ଆସିଥିଲେ।
ତାଙ୍କୁ ଶେଷ ଥର ପାଇଁ ଶାହିଦ କପୁର ଏବଂ କ୍ରିତି ସାନନ୍ ଅଭିନୀତ ‘ତେରି ବାତୋଁ ମେଁ ଐସା ଉଲ୍ଝା ଜିୟା’ ରେ ଦେଖିବାକୁ ମିଳିଥିଲା। ତାଙ୍କର ପରବର୍ତ୍ତୀ ଚଳଚ୍ଚିତ୍ର ହେଉଛି ଅମିତାଭ ବଚ୍ଚନଙ୍କ ନାତି ଅଗସ୍ତ୍ୟ ନନ୍ଦାଙ୍କ ଅଭିନୀତ ‘ଇକ୍କିସ୍’ (Ikkis), ଯାହା ଡିସେମ୍ବର ୨୫ରେ ମୁକ୍ତିଲାଭ କରିବାକୁ ଯାଉଛି।
