ରାମାୟଣ ଓ ମହାଭାରତ ଆମର ଜୀବନର ଅଂଶ। ସେଠାରୁ କିଛି ନେତା ଦଳର ନେତାଙ୍କୁ ନକାରାତ୍ମକ ଚରିତ୍ର ସହ ତୁଳନା କରି ଟାର୍ଗେଟ୍ କରୁଛନ୍ତି। ଏମିତି ବୁଲେଇ ନକରି ସିଧାସଳଖ ନାଁ ନେଇ କରନ୍ତୁ : ମନ୍ମଥ
ଓଡ଼ିଶାରେ ରାଜନୈତିକ ଦୃଶ୍ୟ ବଦଳିଛି । ଏବେ କ୍ଷମତାରେ ନାହିଁ ବିଜୁ ଜନତା ଦଳ (ବିଜେଡି) । ବିଜେଡି ଏବେ ବିରୋଧୀ ଆସନରେ । ୨୦୨୪ ସାଧାରଣ ନିର୍ବାଚନରେ ଦଳର ପରାଜୟ ପରେ, ଏବେ ଦଳରେ ଆଭ୍ୟନ୍ତରୀଣ କନ୍ଦଳ ଗଣମାଧ୍ୟମରେ ବେଶ ପ୍ରଚାରିତ ହେଉଛି । ନେତାମାନେ ବୟାନବାଜି କରୁଛନ୍ତି । କଂଗ୍ରେସର ବରିଷ୍ଠ ନେତା ସୁରେଶ କୁମାର ରାଉତରାୟଙ୍କ ପୁଅ ମନ୍ମଥ ରାଉତରାୟଙ୍କ କଥା ବହୁ ଆଲୋଚନା ସୃଷ୍ଟି କରିଛି ।
ମନ୍ମଥ, ଗତ କିଛି ବର୍ଷ ହେଲା ରାଜନୀତି କରୁଛନ୍ତି । ସେ କଂଗ୍ରେସ ଛାଡ଼ି ବିଜେଡିରେ ଯୋଗ ଦେଇ ଭୁବନେଶ୍ୱର ଲୋକସଭା ଆସନର ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିଲେ । ସେ ଏବେ ଦଳ ପାଇଁ ବାହାରି ବିଜେଡିର ଅସନ୍ତୁଷ୍ଟ ବରିଷ୍ଠ ନେତାମାନଙ୍କୁ ସିଧାସଳଖ ଟାର୍ଗେଟ୍ କରିଛନ୍ତି। ଏହା ରାଜନୀତି ମହଲରେ ବଡ଼ ଚର୍ଚ୍ଚାର ବିଷୟ ହୋଇଛି।
ମନ୍ମଥ ସମାଲୋଚନା କରିଛନ୍ତି ଶ୍ରୀମୟୀ ମିଶ୍ରଙ୍କୁ, ଅରୁଣ ସାହୁଙ୍କୁ, ଅଶୋକ ପଣ୍ଡାଙ୍କୁ । ସେମାନଙ୍କ ନାଁ ନନେଇ ମନ୍ମଥ କହିଛନ୍ତି, ” କିଛି ନେତା ଦଳ ବିରୋଧରେ ଏଣୁତେଣୁ ମନ୍ତବ୍ୟ ଦେଇ ଦେଉଛନ୍ତି। ଗୁରୁଦିବସ ଦିନ ନେତା ଗୁରୁଙ୍କ ଉପରେ ନକହି ଦଳ ବିରୋଧରେ କହୁଛନ୍ତି । ଦଳରେ ଶୃଙ୍ଖଳାଗତ କମିଟି ଅଛି, ସେଠାରେ ମତ ରଖୁନାହାଁନ୍ତି। ଯଦି କେହି ଶୁଣୁନାହାନ୍ତି, ତେବେ ଉପରେ କୁହନ୍ତୁ। ସର୍ବୋପରି, ଜନସେବା ହିଁ ମୂଳ ଉଦ୍ଦେଶ୍ୟ। ଯଦି ଦଳର ବିଚାରାଧାରା ସହ ମେଳ ନ ଖାଏ, ତେବେ ଅନ୍ୟଠାରେ ରାଜନୀତି କରନ୍ତୁ। କାହାକୁ ଆକ୍ଷେପ କରି ଅଭଦ୍ର ମତମନ୍ତବ୍ୟ ଦେବା ଠିକ୍ ନୁହେଁ, ଏହା ନିଜର କ୍ଷତି ଓ ସମାଜରେ ଅସମ୍ମାନ ଆଣେ। ଏହା ସେ ଅରୁଣ ସାହୁଙ୍କୁ କହିଛନ୍ତି । ଗୁରୁଦିବସ ଦିନ ଅରୁଣ ସାହୁ ଦଳର ନେତୃତ୍ବକୁ ନେଇ ଅନେକ ପ୍ରଶ୍ନ ଉଠାଇଥିଲେ । ଏହା ଅରୁଣ ସାହୁଙ୍କ ଉପରେ ସିଧାସଳଖ ଆକ୍ରମଣ ଭାବେ ଦେଖାଯାଉଛି, ଯିଏ ଦଳରେ ବରିଷ୍ଠ ନେତା ଅଛନ୍ତି । ମନ୍ମଥଙ୍କ ଏହି ମନ୍ତବ୍ୟ ଦଳରେ ଶୃଙ୍ଖଳା ଓ ଏକତାର ପ୍ରଶ୍ନ ଉଠାଇଛି।
ଭୁବନେଶ୍ୱର ଜିଲ୍ଲା ସଭାପତି ଅଶୋକ ପଣ୍ଡାଙ୍କୁ ମନ୍ମଥ ସିଧାସଳଖ ଆକ୍ଷେପ କରିଛନ୍ତି। ସେ ପଚାରିଛନ୍ତି, “ଅଶୋକ ପଣ୍ଡା ସେତେବେଳେ କ’ଣ ଦଳ ଚଳାଉଥିଲେ କି? ଦଳ ଶ୍ରୀମୟୀଙ୍କୁ ପ୍ରାର୍ଥୀ ଘୋଷଣା କରିଥିଲା ବୋଲି ଅଶୋକ ପଣ୍ଡାଙ୍କ ପାଖରେ କିଛି ଚିଠି ଅଛି କି। ଆନୁଷ୍ଠାନିକ ଘୋଷଣା କିଛି ହୋଇଥିଲା କି?” ଆହୁରି ଆଗକୁ ଯାଇ ସେ ଅଶୋକଙ୍କୁ ‘ରାସ୍ତାରେ ଥିବା ଅଭଦ୍ର ବ୍ୟକ୍ତି’ ସହ ତୁଳନା କରିଛନ୍ତି। ସେ କହିଛନ୍ତି, “ଅଭଦ୍ର ବ୍ୟକ୍ତିଙ୍କ କଥାରେ ବିଶ୍ୱାସ କରିବେ ନା ସଭ୍ୟ ଦଳର ଚିଠିରେ ବିଶ୍ୱାସ କରିବେ। ଯିଏ ଯାହା କହିଦେବ ତାହା କ’ଣ ହୋଇଯିବ କି?”
ଏହା ଅଶୋକ ପଣ୍ଡାଙ୍କ ଉପରେ ବ୍ୟକ୍ତିଗତ ଆକ୍ରମଣ ଭାବେ ଦେଖାଯାଉଛି, ଯାହା ଦଳରେ ପ୍ରାର୍ଥୀ ଚୟନ ଓ ଆଭ୍ୟନ୍ତରୀଣ ନିଷ୍ପତ୍ତି ଉପରେ ପ୍ରଶ୍ନବାଚୀ ଉଠାଇଛି। ଏହା ଦଳର ୨୦୨୪ ନିର୍ବାଚନୀ କ୍ଷୟକ୍ଷତିର ପରେ ଆହୁରି ଗଭୀର ହୋଇପଡ଼ୁଛି।
ବିଜେଡିର ନେତ୍ରୀ ଶ୍ରୀମୟୀ ମିଶ୍ରଙ୍କୁ ମନ୍ମଥ ନାଁ ନନେଇ ତୀବ୍ର ସମାଲୋଚନା କରିଛନ୍ତି। ସେ କହିଛନ୍ତି, “ଯେତେବେଳେ ଅନୁକୂଳ ସମୟ ଥିଲା, ନବୀନ ପଟ୍ଟନାୟକଙ୍କୁ ସେ ତାଙ୍କ ପିତାଙ୍କଠୁ ବଡ଼ ବୋଲି କହୁଥିଲେ। ମହିଳାଙ୍କୁ ନବୀନ ପଟ୍ଟନାୟକ କେତେ ଭଲ ପାଆନ୍ତି ବୋଲି କହୁଥିଲେ। କିନ୍ତୁ ପ୍ରତିକୂଳ ସମୟରେ ନିଜର ସ୍ୱାର୍ଥ ପାଇଁ ନିଜର ଅସଲ ଚିତ୍ର ପ୍ରକାଶ ପାଇଛି।” ସେ ଆହୁରି କହିଛନ୍ତି ଯେ, ଅନୁକୂଳ ସମୟରେ ଶ୍ରୀମୟୀଙ୍କୁ ମହିଳା ସମବାୟ ନିଗମ, ଓଟିଡିସି ଓ ନିର୍ମାଣ ଶ୍ରମିକ ବୋର୍ଡର ଅଧ୍ୟକ୍ଷା ଭଳି ପଦବୀ ଦିଆଯାଇଥିଲା । ପ୍ରତିକୂଳ ସମୟରେ ସେ ଧୃତରାଷ୍ଟ୍ର ଓ ଦୁର୍ଯ୍ୟୋଧନ ଭଳି ନକାରାତ୍ମକ ଚରିତ୍ର ସହ କାହାକୁ ତୁଳନା କରୁଛନ୍ତି।
ମନ୍ମଥ କହିଛନ୍ତି, “ରାମାୟଣ ଓ ମହାଭାରତ ଆମର ଜୀବନର ଅଂଶ। ସେଠାରୁ କିଛି ନେତା ଦଳର ନେତାଙ୍କୁ ନକାରାତ୍ମକ ଚରିତ୍ର ସହ ତୁଳନା କରି ଟାର୍ଗେଟ୍ କରୁଛନ୍ତି। ଏମିତି ବୁଲେଇ ନକରି ସିଧାସଳଖ ନାଁ ନେଇ କରନ୍ତୁ।” ସେ ଆହୁରି କହିଛନ୍ତି ଯେ, ଦଳରେ ଶୃଙ୍ଖଳାଗତ କମିଟିରେ ମତ ରଖନ୍ତୁ। ଶ୍ରୀମୟୀ ଏବେ ଦଳର ମୁଖପାତ୍ର, ସାଧାରଣ ସମ୍ପାଦକ ଅଛନ୍ତି । “ଏହି ମହିଳା ଏବେ ଦଳରେ ଅଛନ୍ତି କି ନାହାନ୍ତି, ସେ ଜାଣନ୍ତି ନାହିଁ।” ବୋଲି କହିଛନ୍ତି ମନ୍ମଥ । ମନ୍ମଥଙ୍କ ଏହି ମନ୍ତବ୍ୟ ବିଜେଡିରେ ନେତାଙ୍କ ଅସନ୍ତୋଷର ସ୍ପଷ୍ଟ ସୂଚନା ପ୍ରଦାନ କରୁଛି। ୨୦୨୪ ନିର୍ବାଚନରେ ଦଳର ପରାଜୟ ପରେ ଦଳର ଆଭ୍ୟନ୍ତରୀଣ ବିବାଦ ବଢ଼ିବଢ଼ି ଚାଲିଛି । ମନ୍ମଥଙ୍କ ଭଳି ନେତା ଅନ୍ୟ ନେତାକୁ ପ୍ରଶ୍ନ କରିବାକୁ ନେଇ ଦଳରେ ଦୁଇ ଗୋଷ୍ଠୀ ନିଜ ନିଜର ପ୍ରଭାବ ଦେଖାଉଥିବା ଚର୍ଚା ହେଉଛି । ବାସ୍ତବିକ କହିବାକୁ ଗଲେ ବିଜେଡି ସଭାପତି ନବୀନ ପଟ୍ଟନାୟକଙ୍କ ନେତୃତ୍ୱ ଉପରେ ନେତାମାନେ ପ୍ରଶ୍ନ ଉଠାଉଛନ୍ତି । ଆଗାମୀ ଦିନରେ ନବୀନ କଣ ନିଷ୍ପତ୍ତି ନେଉଛନ୍ତି ତାହାକୁ ଅପେକ୍ଷା ।
ଏହି ପରିସ୍ଥିତିରେ ବିଜେଡିର ଭବିଷ୍ୟତ୍ ଉପରେ ପ୍ରଶ୍ନବାଚୀ ଉଠିଛି। ଦଳ ଯଦି ଆଭ୍ୟନ୍ତରୀଣ କନ୍ଦଳ ନିୟନ୍ତ୍ରଣ ନକରିପାରେ, ତେବେ ଆଗାମୀ ସ୍ଥାନୀୟ ନିର୍ବାଚନରେ ଆହୁରି କ୍ଷତି ହୋଇପାରେ। ମନ୍ମଥଙ୍କ ମତମନ୍ତବ୍ୟ ଦ୍ୱାରା ଦଳର ଶୃଙ୍ଖଳାଗତ ବ୍ୟବସ୍ଥା ଉପରେ ମଧ୍ୟ ଆଲୋଚନା ଆରମ୍ଭ ହୋଇଛି। ଏହା ଓଡ଼ିଶା ରାଜନୀତିରେ ଏକ ନୂତନ ବିତର୍କର ବିଷୟ ହୋଇଛି।
