ମାଓ ସଙ୍ଗଠନର ଅନେକ ବଡ ବଡ ନେତା ଏବେ ସୁରକ୍ଷା କର୍ମୀଙ୍କ ହାତରେ ନିପାତ ହୋଇଛନ୍ତି । ଅନେକ ମାଓନେତା ସଙ୍ଗଠନ ଛାଡିବାରେ ଲାଗିଛନ୍ତି । ଏହାରି ଭିତରେ ଏକ ଭିଡ଼ିଓ ଜାରି କରି ମାଓବାଦୀମାନଙ୍କୁ ଆତ୍ମସମର୍ପଣ କରିବା ପାଇଁ ଅପିଲ୍ କରିଛନ୍ତି ଟପ୍ ମାଓନେତା ଭୂପତି । ଦେଢ ମାସ ତଳେ ଗଡଚିରୋଲିରେ ଆତ୍ମସମର୍ପଣ କରିଥିଲେ ସିପିଆଇ ସଂଗଠନର ଟପ୍ ମାଓନେତା ବେଣୁ ଗୋପାଳ ଭୂପତି । ଭିଡିଓରେ ଭୂପତି କହିଛନ୍ତି ଯେ, ଅସ୍ତ୍ର ଛାଡି ମାଓବାଦୀମାନେ ଆତ୍ମସମର୍ପଣ କରନ୍ତୁ । ଏବେ ସମୟ ବଦଳିଛି, ଦେଶ ବଦଳିଛି, ପରିସ୍ଥିତି ମଧ୍ୟ ବଦଳୁଛି । ତେଣୁ ଅସ୍ତ୍ର ଛାଡି ଲୋକଙ୍କ ପାଖକୁ ଯିବାକୁ ପଡିବ । ଭୂପତି କହିଛନ୍ତି ଯେ ପରିବର୍ତ୍ତିତ ପରିସ୍ଥିତିରେ ଅସ୍ତ୍ର ଧରି ସଂଗ୍ରାମ କରିବା ସମ୍ଭବ ନୁହେଁ । ଅସ୍ତ୍ର ପାଇଁ ଆମେ ବହୁତ କିଛି ହରାଇଛୁ, ଅନେକ କ୍ଷତି ସହିଛୁ । ସେପଟେ ଓଡ଼ିଶା ସୀମାରେ ପୁଣି ୭ଜଣ ମାଓବାଦୀ ନିପାତ ହୋଇଛନ୍ତି। ଆନ୍ଧ୍ର ପ୍ରଦେଶ ପୁଲିସ ମାଓବାଦୀଙ୍କ ବିରୋଧରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ପୁଲିସ ଏବଂ ମାଓବାଦୀଙ୍କ ମଧ୍ୟରେ ଗୁଳି ବିନିମୟରେ ସାତ ଜଣ ମାଓବାଦୀ ନିହତ ହୋଇଛନ୍ତି। ଆନ୍ଧ୍ର ପ୍ରଦେଶ ପୁଲିସ କୃଷ୍ଣା, ଏଲୁରୁ, ଏନଟିଆର ବିଜୟୱାଡା, କାକିନାଡା ଏବଂ ଡକ୍ଟର ବିଆର ଆମ୍ବେଦକର କୋନାସୀମା ଜିଲ୍ଲାରୁ ୫୦ ଜଣ ସିପିଆଇ (ମାଓବାଦୀ) କର୍ମୀଙ୍କୁ ଗିରଫ କରିଛି, ଯାହା ସଂଗଠନର ଦକ୍ଷିଣ ବସ୍ତର ଏବଂ ଦଣ୍ଡକାରଣ୍ୟ ନେଟୱାର୍କକୁ ଏକ ବଡ଼ ଧକ୍କା ଦେଇଛି। ଆନ୍ଧ୍ର ପ୍ରଦେଶ ପୁଲିସ କହିଛି ଯେ ଅଟକ ମାଓବାଦୀଙ୍କ ମଧ୍ୟରେ ବରିଷ୍ଠ ମାଓ ନେତା, ଲଜିଷ୍ଟିକ୍ସ ବିଶେଷଜ୍ଞ, ଯୋଗାଯୋଗ କର୍ମୀ ଏବଂ ସଶସ୍ତ୍ର ପ୍ଲାଟୁନ ସଦସ୍ୟ, ଦଳୀୟ ସଦସ୍ୟ ଅଛନ୍ତି, ଯେଉଁମାନଙ୍କ ମଧ୍ୟରୁ ଅନେକ ସିପିଆଇ ମାଓବାଦୀ ଦଳର କେନ୍ଦ୍ରୀୟ କମିଟି ସଦସ୍ୟ ମାଡଭି ହିଡମାଙ୍କ ସହିତ ଘନିଷ୍ଠ ଭାବରେ ଜଡିତ ଥିଲେ।
ପୁଣି ୭ ମାଓବାଦୀ ନିପାତ, ଆତ୍ମସମର୍ପଣ ପାଇଁ ଭୂପତି କଲେ ଅପିଲ୍
