ବିହାର ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ୨୦ଟି ଜିଲ୍ଲାର ୧୨୨ଟି ଆସନରେ ମତଦାନ ହେବାକୁ ଯାଉଛି। ପ୍ରଥମ ପର୍ଯ୍ୟାୟରେ ୧୮ଟି ଜିଲ୍ଲାର ୧୨୧ଟି ଆସନରେ ମତଦାନ ହୋଇଥିଲା।
୩.୭ କୋଟିରୁ ଅଧିକ ଭୋଟର ୧,୩୦୨ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ। ଏହି ପର୍ଯ୍ୟାୟରେ ଏନଡିଏ ଏବଂ ମହାଗଠବନ୍ଧନ ଉଭୟଙ୍କ ପାଇଁ ଏକ କଡ଼ା ଲଢ଼େଇ ଦେଖିବାକୁ ମିଳିଛି।
ପ୍ରଚାରର ଶେଷ ଦିନରେ ଏନଡିଏ ପକ୍ଷରୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ପ୍ରମୁଖ ସଭାଗୁଡ଼ିକୁ ସମ୍ବୋଧିତ କରି ‘ମହାଗଠବନ୍ଧନ’ର ଆଭ୍ୟନ୍ତରୀଣ କନ୍ଦଳକୁ ତୀବ୍ର ଟାର୍ଗେଟ କରିଥିଲେ। ଅନ୍ୟପକ୍ଷରେ, ମହାଗଠବନ୍ଧନର ମୁଖ୍ୟମନ୍ତ୍ରୀ ପ୍ରାର୍ଥୀ ତେଜସ୍ୱୀ ଯାଦବ ଏବଂ କଂଗ୍ରେସ ନେତା ରାହୁଲ ଗାନ୍ଧୀ ବେକାରୀ ଏବଂ ବିକାଶ ପ୍ରସଙ୍ଗ ଉଠାଇ ଭୋଟରଙ୍କୁ ଆକୃଷ୍ଟ କରିବାକୁ ଚେଷ୍ଟା କରିଥିଲେ।
ନିର୍ବାଚନ କମିଶନଙ୍କ ଦ୍ୱାରା ୪୫,୩୯୯ରୁ ଅଧିକ ପୋଲିଂ ଷ୍ଟେସନ୍ ସ୍ଥାପନ କରାଯାଇଛି ଏବଂ ଶାନ୍ତିପୂର୍ଣ୍ଣ ମତଦାନ ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ସମସ୍ତ ୨୪୩ଟି ଆସନର ଭୋଟ୍ ଗଣନା ଆସନ୍ତା ନଭେମ୍ବର ୧୪ ତାରିଖରେ ହେବ। ବିହାରର ଜନତା କାହାକୁ କ୍ଷମତାକୁ ଫେରାଇ ଆଣୁଛନ୍ତି, ତାହା ମଙ୍ଗଳବାରର ମତଦାନ ପରେ ସ୍ପଷ୍ଟ ହେବ।
ଦ୍ବିତୀୟ ପର୍ଯ୍ୟାୟରେ, ୧୩୬ (ପ୍ରାୟ ୧୦ ପ୍ରତିଶତ) ମହିଳା ଅଛନ୍ତି। ୪୫,୩୯୯ଟି କେନ୍ଦ୍ରରେ ମତଦାନ ହେବ ଏବଂ ଯୋଗ୍ୟ ଭୋଟରଙ୍କ ସଂଖ୍ୟା ୩.୭୦ କୋଟି ରହିଛି, ଯେଉଁଥିରେ ୧.୯୫ କୋଟି ପୁରୁଷ ଓ ୧.୭୪ କୋଟି ମହିଳା ଅଛନ୍ତି। ୨୦୨୦ ନିର୍ବାଚନରେ ଏହି ୧୨୨ଟି ଆସନରୁ ବିଜେପି ୪୨ଟି ଆସନରେ ବିଜୟୀ ହୋଇଥିବା ବେଳେ ଆର୍ଜେଡି ୩୩ଟି, ଜେଡିୟୁ ୨୦ଟି, କଂଗ୍ରେସ ୧୧ ଓ ବାମପନ୍ଥୀ ୫ଟି ଆସନରେ ବିଜୟୀ ହୋଇଥିଲା। ୨୦୧୫ ନିର୍ବାଚନରେ ଯେତେବେଳେ ଜେଡିୟୁ ଓ ଆର୍ଜେଡି ସହଯୋଗୀ ଥିଲେ, ସେତେବେଳେ ଏହି ୧୨୨ଟି ଆସନରୁ ସେମାନେ ୮୦ଟିରେ ଜିତିଥିଲେ।
