ଭୁବନେଶ୍ୱର: ରାଜଧାନୀ ଉପକଣ୍ଠ ଚନ୍ଦକା ଅଭୟାରଣ୍ୟ ନିକଟସ୍ଥ ଏକ ଫାର୍ମହାଉସ୍ରେ ଦେଖିବାକୁ ମିଳିଛି ହେଭିୱେଟ୍ ନେତାଙ୍କ ଭିଡ଼। ବିଜେଡିର ଏକାଧିକ ପୂର୍ବତନ ବିଧାୟକ ଏବଂ ବରିଷ୍ଠ ନେତାଙ୍କ ଏହି ମେଳି ଏବେ ରାଜ୍ୟ ରାଜନୀତିରେ ହଟଚମଟ ସୃଷ୍ଟି କରିଛି। ଏହି ବନ୍ଧୁମିଳନରେ ରାଜେନ୍ଦ୍ର ସାହୁ, ପୁଷ୍ପେନ୍ଦ୍ର ସିଂହଦେଓ, ପ୍ରୀତିରଞ୍ଜନ ଘଡ଼ାଇ, ପ୍ରଣବ ବଳବନ୍ତରାୟ ଏବଂ ଉମା ସାମନ୍ତରାୟଙ୍କ ଭଳି ଟାଣୁଆ ନେତାମାନେ ଉପସ୍ଥିତ ଥିଲେ। କେବଳ ପୂର୍ବତନ ବିଧାୟକ ନୁହଁନ୍ତି, ବରଂ ଗତ ନିର୍ବାଚନରେ ପରାଜିତ ହୋଇଥିବା କିଛି ନୂଆ ପ୍ରାର୍ଥୀଙ୍କୁ ମଧ୍ୟ ଏହି ଭୋଜିରେ ଦେଖିବାକୁ ମିଳିଥିଲା। ଗଣମାଧ୍ୟମ ପ୍ରତିନିଧିମାନେ ସେଠାରେ ପହଞ୍ଚିବା ପରେ ନେତାମାନେ ଏହାକୁ ଏକ ‘ବ୍ୟକ୍ତିଗତ ବନ୍ଧୁମିଳନ’ କହି ଏଡ଼ାଇ ଯାଇଥିଲେ। “ଏଥିରେ କୌଣସି ରାଜନୈତିକ ଉଦ୍ଦେଶ୍ୟ ନାହିଁ” ବୋଲି ସେମାନେ ସଫେଇ ଦେଇଥିଲେ ମଧ୍ୟ ସାମ୍ପ୍ରତିକ ରାଜନୈତିକ ସ୍ଥିତିରେ ଏହାକୁ ସ୍ୱାଭାବିକ ଭାବେ ଗ୍ରହଣ କରାଯାଉନାହିଁ। ସୂଚନାଯୋଗ୍ୟ ଯେ, ଗତ ବର୍ଷ ଏହିଭଳି ଏକ ‘ହୋଟେଲ୍ ଡିନର୍’ରେ କିଛି ବରିଷ୍ଠ ନେତା ଏକାଠି ହୋଇଥିବା ବେଳେ ଦଳର ସଭାପତି ନବୀନ ପଟ୍ଟନାୟକ ଏହାକୁ କଡ଼ା ଭାଷାରେ ନାପସନ୍ଦ କରିଥିଲେ। ଦଳୀୟ ଅନୁଶାସନ ବାହାରେ ଏଭଳି ଏକାଠି ହେବାକୁ ‘ଗୋଷ୍ଠୀ କନ୍ଦଳ’ ବା ‘ବିଦ୍ରୋହ’ର ଆଭାସ ବୋଲି କୁହାଯାଉଛି।
ବିଜେଡି ନେତାଙ୍କ ବନ୍ଧୁମିଳନ : ଏକାଠି ହେଲେ ୪୦ରୁ ଅଧିକ ପୂର୍ବତନ ବିଧାୟକ
