ଭୁବନେଶ୍ୱର: ଓଡ଼ିଶାର ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବର୍ଦ୍ଧିତ ଦରମା ନ ନେବା ପ୍ରସଙ୍ଗକୁ ନେଇ ରାଜନୀତି ଜୋର ଧରିଛି । ବିଜେପି ଏବଂ କଂଗ୍ରେସ ଏହାକୁ ନେଇ କଟାକ୍ଷ କରିଛନ୍ତି । ଯାହା ରାଜ୍ୟ ରାଜନୀତିରେ ତୀବ୍ର ହଟଚମଟ ସୃଷ୍ଟି କରିଛି। ଏହି ପ୍ରସଙ୍ଗରେ ଉଭୟ ବିଜେପି ଏବଂ କଂଗ୍ରେସ ନବୀନ ପଟ୍ଟନାୟକ ଏବଂ ବିଜେଡି ର ଦୋମୁଁହା ନୀତି ଅବଲମ୍ବନ କରିଥିବା ଅଭିଯୋଗ କରି କଡ଼ା ସମାଲୋଚନା କରିଛନ୍ତି। ଏହି କଥାକୁ ନେଇ ଉପମୁଖ୍ୟ ମନ୍ତ୍ରୀ କେଭି ସିଂହଦେଓ ବିରୋଧୀ ଦଳ ନେତା ନବୀନଙ୍କୁ କଟାକ୍ଷ କରି କହିଛନ୍ତି ଯେ ନବୀନଙ୍କ ବର୍ଦ୍ଧିତ ଦରମା ନ ନେବା ନିଷ୍ପତ୍ତି କିଛି ନୁହେଁ, ବରଂ ଏହା ଏକ ରାଜନୈତିକ ଗୋଟି ଚାଳନା। ସେ ପ୍ରଶ୍ନ କରିଛନ୍ତି ଯେ ବିଧାନସଭାରେ ବିଲ୍ ପାରିତ ହେବା ସମୟରେ ନବୀନଙ୍କ ପାଖରେ ନିଜର ମତ ରଖିବାର ସୁଯୋଗ ଥିଲା। ତେବେ ସେ କାହିଁକି ଗୃହକୁ ଆସିଲେ ନାହିଁ କିମ୍ବା ନିଜର ମତ ରଖିଲେ ନାହିଁ?
ସେହିପରି, ବରିଷ୍ଠ ବିଜେପି ବିଧାୟକ ଜୟନାରାୟଣ ମିଶ୍ର ଏହି ପ୍ରସଙ୍ଗକୁ ଏକ ‘ଡ୍ରାମା’ ବୋଲି ଅଭିହିତ କରିଛନ୍ତି। ମିଶ୍ରଙ୍କ ମତରେ, “ନବୀନ ବାବୁ ବହୁତ ଧନୀ ଲୋକ। ତାଙ୍କର ଦରମାର ଆବଶ୍ୟକତା ନାହିଁ। ଏସବୁ ଡ୍ରାମା।” ସେ ଆହୁରି ମଧ୍ୟ କହିଛନ୍ତି ଯେ ଯଦି ବିରୋଧୀ ଦଳ ଗୃହରେ ଏହି ଦରମା ବୃଦ୍ଧିକୁ ବିରୋଧ କରିଥାନ୍ତେ, ତେବେ ସରକାରୀ ଦଳ ଏହାକୁ ପ୍ରତ୍ୟାହାର କରିଥାନ୍ତେ। କିନ୍ତୁ ବିଧାନସଭାରେ ବିରୋଧ ନକରି ବର୍ତ୍ତମାନ ଏଭଳି ବୟାନ ଦେବାକୁ କେହି ଗ୍ରହଣ କରିବେ ନାହିଁ।
କଂଗ୍ରେସ ନେତା ପବିତ୍ର ସାଉଁନ୍ତା ନବୀନ ପଟ୍ଟନାୟକଙ୍କ ଏହି ନିଷ୍ପତ୍ତିକୁ ବିଜେଡିର ଦୋମୁଁହା ନୀତି ବୋଲି କହି ତୀବ୍ର ସମାଲୋଚନା କରିଛନ୍ତି। ସେ ପ୍ରଶ୍ନ କରିଛନ୍ତି ଯେ, “ଯଦି ବିରୋଧୀ ଦଳ ନେତାଙ୍କ ଦରମା ନେବାର ନ ଥିଲା, ତେବେ ବିଧାନସଭାରେ ବିଜେଡି ଏହି ବିଲକୁ କାହିଁକି ସମର୍ଥନ କଲା?” ସାଉଁନ୍ତା ଦର୍ଶାଇଛନ୍ତି ଯେ ବିଲ୍ ପାରିତ ହେବା ସମୟରେ ବିଜେଡିର ସବୁ ସଦସ୍ୟ ଏବଂ ବିରୋଧୀ ଦଳ ମୁଖ୍ୟ ସଚେତକ ମଧ୍ୟ ଉପସ୍ଥିତ ରହି ଦରମା ବୃଦ୍ଧି ବିଲକୁ ସମର୍ଥନ କରିଥିଲେ।
କଂଗ୍ରେସ ବିଧାୟକ ପବିତ୍ର ସାଉଁନ୍ତା ଆହୁରି ମଧ୍ୟ କହିଛନ୍ତି ଯେ ନବୀନ ପଟ୍ଟନାୟକଙ୍କ ପାଖରେ ଅଧିକ ସମ୍ପତ୍ତି ଅଛି ଏବଂ ସେ ୨୪ ବର୍ଷ ଧରି ମୁଖ୍ୟମନ୍ତ୍ରୀ ଥିଲେ। ତାଙ୍କ ପିତା ମଧ୍ୟ ମୁଖ୍ୟମନ୍ତ୍ରୀ ଥିଲେ, ତେଣୁ ସେ ଦରମା ନ ନେବା ସ୍ୱାଭାବିକ। କିନ୍ତୁ ପୂର୍ବତନ ବିଧାୟକମାନେ ଯେଉଁ ସମସ୍ୟାରେ ବଞ୍ଚୁଥିଲେ, ସେମାନଙ୍କ ପାଇଁ ଏହି ବର୍ଦ୍ଧିତ ଦରମା ଏକ ବରଦାନ ସଦୃଶ।
ସାଉଁନ୍ତାଙ୍କ ମତରେ, ନବୀନ ବାବୁ ଦୋମୁଁହା ନୀତି ନକରି ସରକାରଙ୍କ ଏହି ନିଷ୍ପତ୍ତିକୁ ସ୍ୱାଗତ କଲେ ଭଲ ହେବ। ସେ ବିଜେଡି ଭିତରେ ଦ୍ବନ୍ଦ୍ବ ଥିବା କଥା ମଧ୍ୟ ଉଠାଇଛନ୍ତି, କାରଣ ଗୋଟିଏ ପଟେ ନବୀନ ବର୍ଦ୍ଧିତ ଦରମା ନେବେ ନାହିଁ କହୁଥିବା ବେଳେ, ତାଙ୍କ ଦଳ ବିଲକୁ ସମର୍ଥନ ଦେଇଛି ଏବଂ ତାଙ୍କ ଦଳର ନେତାମାନେ ଦରମା ବଢ଼ିବା ଠିକ୍ ହୋଇଛି ବୋଲି କହୁଛନ୍ତି।
