ଭୁବନେଶ୍ୱର: ଶୀତ ଦିନ ଆସିବା ମାତ୍ରେ ସାରା ଦେଶରେ ବାୟୁ ପ୍ରଦୂଷଣ ଏକ ଜାତୀୟ ସମସ୍ୟା ଭାବେ ଉଭା ହୋଇଛି। ଗୋଟିଏ ପଟେ ଦେଶର ରାଜଧାନୀ ଦିଲ୍ଲୀ ‘ଗ୍ୟାସ୍ ଚାମ୍ବର’ ପାଲଟି ନିଶ୍ୱାସରୁଦ୍ଧ କରୁଥିବା ବେଳେ, ଅନ୍ୟପଟେ ଓଡ଼ିଶାର ରାଜଧାନୀ ଭୁବନେଶ୍ୱରରେ ମଧ୍ୟ ବାୟୁର ଗୁଣବତ୍ତା ଦିନକୁ ଦିନ ଖରାପ ହେବାରେ ଲାଗିଛି।
ଦିଲ୍ଲୀରେ ବାୟୁ ପ୍ରଦୂଷଣ ସୂଚକାଙ୍କ ବା AQI ଅନେକ ସମୟରେ ୪୦୦ ରୁ ୫୦୦ ଅତିକ୍ରମ କରୁଛି, ଯାହା ‘Severe’ ବା ଅତ୍ୟନ୍ତ ଗୁରୁତର ଶ୍ରେଣୀଭୁକ୍ତ। ପଡ଼ୋଶୀ ରାଜ୍ୟରେ ନଡ଼ା ପୋଡ଼ି, ଯାନବାହନ ପ୍ରଦୂଷଣ ଏବଂ ଶୀତଦିନିଆ ପାଣିପାଗ ଯୋଗୁଁ ଧୂଳି ଓ ଧୂଆଁ ତଳ ସ୍ତରରେ ଜମି ରହୁଛି। ସ୍କୁଲ୍ ଛୁଟି, ନିର୍ମାଣ କାର୍ଯ୍ୟ ଉପରେ ରୋକ୍ ଏବଂ ଲୋକଙ୍କ ପାଇଁ ମାସ୍କ ବାଧ୍ୟତାମୂଳକ ହୋଇପଡ଼ିଛି। ଦିଲ୍ଲୀର ବାୟୁରେ ଶ୍ୱାସ ନେବା ଅର୍ଥ ଦିନକୁ ୨୦ ରୁ ୨୫ଟି ସିଗାରେଟ୍ ପିଇବା ସହ ସମାନ ବୋଲି ବିଶେଷଜ୍ଞମାନେ ମତ ଦେଉଛନ୍ତି।
ଦିଲ୍ଲୀ ତୁଳନାରେ ଭୁବନେଶ୍ୱରର ସ୍ଥିତି କିଛିଟା ଭଲ ଥିଲେ ମଧ୍ୟ ଏହା ଏବେ ବିପଦ ସୀମା ଭିତରକୁ ପଶିବା ଆରମ୍ଭ କଲାଣି। ଭୁବନେଶ୍ୱରର AQI ଏବେ ୧୫୦ ରୁ ୨୫୦ ମଧ୍ୟରେ ରହୁଛି, ଯାହା ‘Moderate’ ରୁ ‘Poor’ ଶ୍ରେଣୀରେ ଆସୁଛି। ସହରରେ ବଢୁଥିବା ନିର୍ମାଣ କାର୍ଯ୍ୟ, ପୁରୁଣା ଗାଡ଼ିରୁ ନିର୍ଗତ ଧୂଆଁ ଏବଂ ରାସ୍ତା କଡ଼ରେ ଜମୁଥିବା ଧୂଳିକଣା। ଯଦିଓ ସମୁଦ୍ର ନିକଟବର୍ତ୍ତୀ ହୋଇଥିବାରୁ ଏଠାରେ ବାୟୁ ପ୍ରବାହ ଭଲ ରହେ, ତଥାପି ବଢୁଥିବା କଂକ୍ରିଟ୍ ଜଙ୍ଗଲ ଓ ଗଛ କଟାଯିବା କାରଣରୁ ବାୟୁ ପ୍ରଦୂଷଣ ବଢୁଛି।
ଭୁବନେଶ୍ୱର ପାଇଁ ଏବେଠାରୁ ସତର୍କ ହେବା ଜରୁରୀ। ସ୍ମାର୍ଟ ସିଟି ମିଶନରେ କେବଳ ରାସ୍ତା ଘାଟ ନୁହେଁ, ବରଂ ବାୟୁର ଗୁଣବତ୍ତାକୁ ସୁଧାରିବା ପାଇଁ ସରକାର ଓ ପ୍ରଶାସନକୁ କଠୋର ପଦକ୍ଷେପ ନେବାକୁ ପଡ଼ିବ। ନଚେତ୍ ଭବିଷ୍ୟତରେ ମନ୍ଦିରମାଳିନୀ ସହର ମଧ୍ୟ ଦିଲ୍ଲୀ ଭଳି ଗ୍ୟାସ୍ ଚାମ୍ବରରେ ପରିଣତ ହେବାର ଆଶଙ୍କା ରହିଛି।
