ପ୍ରଥମ ପର୍ଯ୍ୟାୟରେ ୭ ଜଣ ଇସ୍ରାଏଲ ନାଗରିକଙ୍କୁ ହମାସ ଆତଙ୍କବାଦୀମାନେ ଛାଡିଛନ୍ତି । ସେମାନଙ୍କୁ ରେଡକ୍ରସ ହାତରେ ଦିଆଯାଇଥିଲା ପରେ ସେମାନେ ଇସ୍ରାଏଲ ଫେରିଛନ୍ତି । ଇସ୍ରାଏଲ ସହିତ ଯୁଦ୍ଧ ବନ୍ଦି ଚୁକ୍ତି ଅନୁସାରେ ଏହି ପଣବନ୍ଦୀଙ୍କୁ ମୁକ୍ତ କରିଛି ହମାସ। ହମାସ ଆତଙ୍କବାଦୀମାନେ 20 ଜଣ ଜୀବିତ ବନ୍ଧକଙ୍କୁ ରେଡକ୍ରସର ଅନ୍ତର୍ଜାତୀୟ କମିଟି (ICRC)କୁ ହସ୍ତାନ୍ତର କରିଛନ୍ତି । ଇସ୍ରାଏଲୀ ଅଧିକାରୀଙ୍କ ଅନୁଯାୟୀ, ପ୍ରଥମ ଗୋଷ୍ଠୀରେ ସାତ ଜଣ ଇସ୍ରାଏଲ ଫେରିଛନ୍ତି । ସେମାନେ ହେଲେ ଇତାନ ମୋର, ଗାଲି ବର୍ମାନ, ଜିଭ ବର୍ମାନ, ଓମରି ମିରାନ, ଆଲୋନ ଓହେଲ, ଗାଏ ଗିଲବୋଆ-ଡାଲାଲ ଏବଂ ମାଟାନ ଆଙ୍ଗରେଷ୍ଟ ।
ଦ୍ୱିତୀୟ ଦଫାରେ ବାର୍ କୁପରଷ୍ଟାଇନ୍, ଏଭିଆଟର ଡେଭିଡ୍, ଯୋସେଫ୍ ହାଇମ୍ ଓହାନା, ସେଗେଭ୍ ଖାଲଫନ୍, ଅଭିତା ଓର, ଏଲକାନା ବୋହବୋଟ୍, ମ୍ୟାକ୍ସିମ୍ ହାର୍କିନ୍, ନିମରୋଡ୍ କୋହେନ୍, ମାଟାନ ଜାଙ୍ଗୌକର, ଡେଭିଡ୍ କୁନିଓ, ଇତାନ ହର୍ଣ୍ଣ, ରୋମ୍ ବ୍ରାସ୍ଲାବସ୍କି ଏବଂ ଏରିଏଲ୍ କୁନିଓ ଅଛନ୍ତି।
ଯୁଦ୍ଧବିରତି ଚୁକ୍ତିନାମାର ଏକ କପି ଅନୁଯାୟୀ, ସମସ୍ତ ମୃତ ବନ୍ଧକଙ୍କ ମୃତଦେହ ସୋମବାର ଦିନ 2:30 (IST) ସୁଦ୍ଧା ହସ୍ତାନ୍ତର କରାଯିବା କଥା।
ଇସ୍ରାଏଲର ଜେଲରେ ବନ୍ଦୀ ଥିବା ୧୯୦୦ ପାଲେଷ୍ଟାଇନଙ୍କ ମୁକ୍ତି ବଦଳରେ ୨୦ ଜଣ ଇସ୍ରାଏଲୀ ନାଗରିକଙ୍କୁ ମୁକ୍ତ କରାଯିବ ବୋଲି ଚୁକ୍ତି ହୋଇଛି। ପ୍ରଥମ ପର୍ଯ୍ୟାୟରେ ୭ ଜଣଙ୍କୁ ଛାଡ଼ିବା ପରେ ସାରା ଇସ୍ରାଏଲରେ ଖେଳି ଯାଇଛି ଖୁସିର ଲହରୀ । ଦୁଇ ବର୍ଷ ପରେ ଏହି ପଣବନ୍ଦୀମାନେ ମୁକ୍ତି ପାଇଛନ୍ତି। ତେଣୁ ସେମାନେ ବି ବହୁତ ଖୁସି।
୨୦୨୩ ଅକ୍ଟୋବର ୭ ତାରିଖରେ ଇସ୍ରାଏଲ ଉପରେ ଅତର୍କିତ ଆକ୍ରମଣ କରିଥିଲା ହମାସ। ଏଥିରେ ୧୨୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା। ପ୍ରାୟ ୨୫୦ ଜଣଙ୍କୁ ଅପହରଣ କରି ନେଇଥିଲେ ହମାସ ଆତଙ୍କବାଦୀ । ଏବେ ସେମାନେ ଗାଜାରେ ଅଛନ୍ତି । ଏହା ପରେ ଇସ୍ରାଏଲ ସେନା ଆକ୍ରମଣରେ ପ୍ରାୟ ୭୦ ହଜାର ଲୋକ ନିହତ ହୋଇଥିବା ବେଳେ ୨ ଲକ୍ଷ ଲୋକ ଆହତ ହୋଇଛନ୍ତି। ୪ ଲକ୍ଷ ଲୋକ ପଳାୟନ କରିଛନ୍ତି। ଯୁଦ୍ଧର ଗଭୀର ପ୍ରଭାବ ପଡ଼ିଛି ଗାଜା ଉପରେ । ଯୁଦ୍ଧ ବନ୍ଦ କରିବାକୁ ଟ୍ରମ୍ପ ବହୁତ ଚେଷ୍ଟା କରିଥିଲେ। ଶେଷରେ ଉଭୟ ପକ୍ଷର ଅନେକ ସର୍ତ୍ତ ଅନୁସାରେ ଯୁଦ୍ଧ ବିରତି ହୋଇଛି। ଏଥିପାଇଁ ଇସ୍ରାଏଲ ଓ ଇଜିପ୍ଟ ଟ୍ରମ୍ପଙ୍କୁ ନିଜ ନିଜ ଦେଶର ସର୍ବୋଚ୍ଚ ବେସାମରିକ ପୁରସ୍କାର ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି। ହମାସ-ଇସ୍ରାଏଲ ଯୁଦ୍ଧ ବିରତି ସହିତ ମଧ୍ୟପ୍ରାଚ୍ୟରେ ଶାନ୍ତି ଫେରିବ ବୋଲି ଆଶା କରାଯାଉଛି।
