ଢାକା: ବାଂଲାଦେଶରେ ସଂଖ୍ୟାଲଘୁ ହିନ୍ଦୁ ସମ୍ପ୍ରଦାୟଙ୍କ ପାଇଁ ସ୍ଥିତି ଦିନକୁ ଦିନ ଅଧିକ ଜଟିଳ ହେବାରେ ଲାଗିଛି। ସରକାରୀ ସ୍ତରରେ ସୁରକ୍ଷାର ପ୍ରତିଶ୍ରୁତି ଦିଆଯାଉଥିଲେ ମଧ୍ୟ ଗ୍ରାଉଣ୍ଡ ଜିରୋରେ ହିନ୍ଦୁଙ୍କ ଉପରେ ଆକ୍ରମଣ ଥମିବାର ନାଁ ନେଉନାହିଁ। ପୁଣି ଜଣେ ନିରୀହ ହିନ୍ଦୁ ବ୍ୟକ୍ତିଙ୍କୁ କିଛି ଦୁର୍ବୃତ୍ତ ମରଣାନ୍ତକ ଆକ୍ରମଣ କରିଥିବା ଖବର ସାମ୍ନାକୁ ଆସିଛି।
ମିଳିଥିବା ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ କିଛି ଦୁର୍ବୃତ୍ତ ଜଣେ ହିନ୍ଦୁ ବ୍ୟକ୍ତିଙ୍କ ଘରେ ପଶି ତାଙ୍କ ଉପରେ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ। ଆକ୍ରମଣ ଏତେ ଭୟଙ୍କର ଥିଲା ଯେ ପୀଡ଼ିତ ବ୍ୟକ୍ତି ଜଣକ ଗୁରୁତର ଭାବେ ଆହତ ହୋଇଛନ୍ତି ଏବଂ ତାଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି। ଆକ୍ରମଣର କାରଣ ସ୍ପଷ୍ଟ ହୋଇନଥିଲେ ମଧ୍ୟ ଏହା ଏକ ସାମ୍ପ୍ରଦାୟିକ ଉଦ୍ଦେଶ୍ୟ ରଖି କରାଯାଇଥିବା ସନ୍ଦେହ କରାଯାଉଛି।
ଲଗାତାର ଟାର୍ଗେଟ୍ ହେଉଛନ୍ତି ସଂଖ୍ୟାଲଘୁ
ବାଂଲାଦେଶରେ ସତ୍ତା ପରିବର୍ତ୍ତନ ପରଠାରୁ ହିନ୍ଦୁମାନଙ୍କ ଘର, ବ୍ୟବସାୟିକ ପ୍ରତିଷ୍ଠାନ ଏବଂ ମନ୍ଦିର ଉପରେ ଆକ୍ରମଣ ଜାରି ରହିଛି। ବିଶେଷ କରି ଇସ୍କନ (ISKCON) ନେତା ଚିନ୍ମୟ କୃଷ୍ଣ ଦାସଙ୍କ ଗିରଫଦାରୀ ପରେ ସ୍ଥିତି ଆହୁରି ଅଶାନ୍ତ ହୋଇପଡ଼ିଛି। ଅନେକ ସ୍ଥାନରେ ହିନ୍ଦୁଙ୍କ ଜମି ଓ ଘରକୁ ଜୋର ଜବରଦସ୍ତି ଦଖଲ କରାଯାଉଥିବା ଅଭିଯୋଗ ହେଉଛି। ମନ୍ଦିରରେ ଭଙ୍ଗାରୁଜା ଓ ମୂର୍ତ୍ତି ଅପବିତ୍ର କରିବା ଘଟଣା ସାଧାରଣ ହୋଇଗଲାଣି। ବାଂଲାଦେଶରେ ହିନ୍ଦୁଙ୍କ ଉପରେ ହେଉଥିବା ଏଭଳି ବର୍ବରୋଚିତ ଆକ୍ରମଣକୁ ନେଇ ଭାରତ ସରକାର ବାରମ୍ବାର ଚିନ୍ତା ପ୍ରକଟ କରିଛନ୍ତି। ବିଶ୍ୱର ବିଭିନ୍ନ ମାନବାଧିକାର ସଂଗଠନ ମଧ୍ୟ ବାଂଲାଦେଶର ଅନ୍ତରୀଣ ସରକାରଙ୍କୁ ସଂଖ୍ୟାଲଘୁଙ୍କ ସୁରକ୍ଷା ନିଶ୍ଚିତ କରିବାକୁ ନିବେଦନ କରିଛନ୍ତି। ମାତ୍ର ବାସ୍ତବରେ ଦୁର୍ବୃତ୍ତମାନେ ଆଇନକୁ ଫୁ’ କରି ଲଗାତାର ହିଂସାକାଣ୍ଡ ଘଟାଉଛନ୍ତି।
ସ୍ଥାନୀୟ ହିନ୍ଦୁଙ୍କ ମଧ୍ୟରେ କୋକୁଆ ଭୟ
ଏହି ନୂତନ ଆକ୍ରମଣ ପରେ ସମ୍ପୃକ୍ତ ଅଞ୍ଚଳର ହିନ୍ଦୁ ପରିବାରମାନେ ଭୟଭୀତ ଅବସ୍ଥାରେ ଅଛନ୍ତି। ନିଜ ଜନ୍ମମାଟିରେ ସେମାନେ ନିଜକୁ ଅସୁରକ୍ଷିତ ମଣୁଛନ୍ତି। ସ୍ଥାନୀୟ ପ୍ରଶାସନ ମାମଲା ରୁଜୁ କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ।
