ବିଧାୟକଙ୍କ ଦରମା ବୃଦ୍ଧି ବିବାଦ: ପୁନଃବିଚାର ପାଇଁ ବଢ଼ିଲା ଚାପ

ଭୁବନେଶ୍ୱର: ରାଜ୍ୟ ବିଧାୟକମାନଙ୍କ ଦରମା ଓ ଭତ୍ତା ବୃଦ୍ଧିକୁ ନେଇ ଲାଗି ରହିଥିବା ବିବାଦ ଏବେ ଏକ ନୂଆ ମୋଡ଼ ନେଇଛି। ପ୍ରବଳ ଜନଅସନ୍ତୋଷ ଓ ବିରୋଧୀଙ୍କ ଆଭିମୁଖ୍ୟ ପରେ, ବର୍ଦ୍ଧିତ ଦରମା ନିଷ୍ପତ୍ତିର ପୁନଃବିଚାର ପାଇଁ ଶାସକ ଦଳ ମଧ୍ୟରେ ତତ୍ପରତା ପ୍ରକାଶ ପାଇଛି। ଗତ ୧୮ ତାରିଖରେ ବିଜେପି ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ବୈଠକ ପରେ ଏହି ବିବାଦର ଏକ ‘ସମ୍ମାନଜନକ ସମାଧାନ’ ବାହାରିବା ନେଇ ଆଶା ସୃଷ୍ଟି ହୋଇଛି।  ଗତ ଡିସେମ୍ବର ୯ ତାରିଖରେ ବିଧାନସଭାରେ ମୁଖ୍ୟମନ୍ତ୍ରୀ, ମନ୍ତ୍ରୀ ଓ ବିଧାୟକମାନଙ୍କ ଦରମା ବୃଦ୍ଧି ସମ୍ପର୍କିତ ଚାରୋଟି ସଂଶୋଧନ ବିଲ୍ ଅତି ଅଳ୍ପ ସମୟ ମଧ୍ୟରେ ପାରିତ ହୋଇଥିଲା। ଏହି ନିଷ୍ପତ୍ତି ଅନୁଯାୟୀ, ବିଧାୟକମାନଙ୍କ ଦରମା ଓ ଭତ୍ତା ୧ ଲକ୍ଷ ୧୧ ହଜାର ଟଙ୍କାରୁ ବୃଦ୍ଧି ପାଇ ୩ ଲକ୍ଷ ୪୫ ହଜାର ଟଙ୍କା ହେବାର ଥିଲା। ଏହି ବିଲ୍‌କୁ ବିଜେପି, ବିଜେଡି ଓ କଂଗ୍ରେସର ସମସ୍ତ ସଦସ୍ୟ ସମର୍ଥନ କରିଥିଲେ। କେବଳ ସିପିଆଇଏମ ର ବିଧାୟକ ବିରୋଧ କରିଥିବା ଜଣାପଡ଼ିଥିଲା । ଏହି ସମୟରେ ବଣାଇ ବିଧାୟକ ଲକ୍ଷ୍ମଣ ମୁଣ୍ଡା (CPI-M) ପ୍ରଥମେ ଏହି ବୃଦ୍ଧିକୁ ବିରୋଧ କରି ସମସ୍ତଙ୍କୁ ଚକିତ କରିଦେଇଥିଲେ।  ଦରମାରେ ଏଭଳି ଅପ୍ରତ୍ୟାଶିତ ବୃଦ୍ଧିକୁ ସାଧାରଣ ଜନତା ଓ ସାମାଜିକ ଗଣମାଧ୍ୟମରେ କଡ଼ା ସମାଲୋଚନା କରାଯାଇଥିଲା। ପରବର୍ତ୍ତୀ ସମୟରେ, ବିଜେପି ବିଧାୟକ ବାବୁ ସିଂ ତାଙ୍କର ବର୍ଦ୍ଧିତ ଦରମା ଗରିବଙ୍କୁ ଦାନ କରିବେ ବୋଲି ଘୋଷଣା କରିଥିଲେ । ବିରୋଧୀ ଦଳ ନେତା ନବୀନ ପଟ୍ଟନାୟକ ମଧ୍ୟ ସମାନ ପଦକ୍ଷେପ ନେଇ ମୁଖ୍ୟମନ୍ତ୍ରୀଙ୍କୁ ପତ୍ର ଲେଖିଥିଲେ। ସବୁଆଡୁ ସମାଲୋଚନା ଶରବ୍ୟ ହେବା ପରେ ବିଜେପି ବିଧାୟକମାନେ ଏକ ଗୁରୁତ୍ୱପୂର୍ଣ୍ଣ ବୈଠକ କରିଥିଲେ। ଏଥିରେ ବିଧାୟକମାନେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଭେଟି ଦରମା ବୃଦ୍ଧି ନିଷ୍ପତ୍ତିର ପୁନଃବିଚାର କରିବାକୁ ଅନୁରୋଧ କରିଛନ୍ତି।