ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଏଥର ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ଭାରତୀୟ ଜନତା ପାର୍ଟି ପ୍ରଥମ ଥର ପାଇଁ ରାଜ୍ୟରେ ସରକାର ଗଠନ କରିବାକୁ ଯାଉଛି। ପଶ୍ଚିମବଙ୍ଗରେ ପ୍ରାୟ ୧୫ ବର୍ଷ ଧରି ମମତା ବାନାର୍ଜୀ ଓ ତୃଣମୂଳ କଂଗ୍ରେସର ଦବଦବା ଥିବା ସତ୍ତ୍ୱେ ବିଜେପି ଏହି ଦୁର୍ଗକୁ ଭେଦିବାରେ ସଫଳ ହୋଇଛି। ଯାହାକୁ ନେଇ ଏବେ ସାରା ଦେଶରେ ଚର୍ଚ୍ଚା। ତେବେ ଏଥର ନିର୍ବାଚନରେ କେବଳ ସଭା, ରାଲି ଓ ରୋଡ୍ ଶୋ ନୁହେଁ, ସୋସିଆଲ ମିଡିଆ ମଧ୍ୟ ବଡ ଭୂମିକା ନେଇଥିବା କୁହାଯାଉଛି। ତେବେ ଆସନ୍ତୁ ଜାଣିବା କେମିତି ମମତାଙ୍କ ପରାଜୟ ପଛରେ ସୋସିଆଲ ମିଡିଆ ଏକ ବଡ଼ ଭୂମିକା ନିର୍ବାହ କରିଥିଲା।
ସୋସିଆଲ ମିଡିଆରେ ଚାଲିଥିଲା ଡିଜିଟାଲ ଯୁଦ୍ଧ
ପାରମ୍ପରିକ ନିର୍ବାଚନ ପ୍ରଚାର ସହିତ ଏଥର ଡିଜିଟାଲ ପ୍ରଚାରକୁ ମଧ୍ୟ ବହୁତ ଗୁରୁତ୍ୱ ଦିଆଯାଇଥିଲା। ମିଡିଆ ରିପୋର୍ଟ ଅନୁସାରେ ବିଜେପିର ଡିଜିଟାଲ ଟିମ୍ ନିର୍ବାଚନର ପ୍ରାୟ ୪ ମାସ ପୂର୍ବରୁ ରାଜ୍ୟର ବିଭିନ୍ନ ୪ ଓ ୫ ଷ୍ଟାର ହୋଟେଲରୁ କାମ ଆରମ୍ଭ କରିଥିଲେ। ଏହିଠାରୁ ହିଁ ସୋସିଆଲ ମିଡିଆ ପାଇଁ ଭିଡିଓ, ଗ୍ରାଫିକ୍ସ ଓ ପଲିଟିକାଲ ସ୍ଲୋଗାନ ପ୍ରସ୍ତୁତ କରାଯାଉଥିଲା। ଏହି କଣ୍ଟେଣ୍ଟ ମାଧ୍ୟମରେ ଲୋକମତକୁ ପ୍ରଭାବିତ କରିବା ଓ ଅନଲାଇନରେ ଦଳର ଉପସ୍ଥିତିକୁ ମଜବୁତ କରିବା ପ୍ରମୁଖ ଲକ୍ଷ୍ୟ ଥିଲା।
ଅମିତ ମାଲବୀୟଙ୍କ ନେତୃତ୍ୱ
ରିପୋର୍ଟ ଅନୁସାରେ ଏହି ଡିଜିଟାଲ ଅଭିଯାନର ନେତୃତ୍ୱ ନେଇଥିଲେ ଅମିତ ମାଲବୀୟ। ତାଙ୍କ ନେତୃତ୍ୱରେ ବିଜେପି ଏକ ଶକ୍ତିଶାଳୀ ଅନଲାଇନ ନେଟୱର୍କ ତିଆରି କରିଥିଲା। ପାରମ୍ପରିକ ମିଡିଆ ଉପରେ ନିର୍ଭର ନ ହୋଇ ଦଳ ସ୍ମାର୍ଟଫୋନ ଓ ସୋସିଆଲ ମିଡିଆ ମାଧ୍ୟମରେ ସିଧାସଳଖ ଭାବେ ଭୋଟରଙ୍କ ପାଖକୁ ପହଞ୍ଚିବାକୁ ଚେଷ୍ଟା କରିଥିଲା।
୩୦୦୦ରୁ ଅଧିକ ଇନ୍ଫ୍ଲୁଏନ୍ସରଙ୍କ ନେଟୱର୍କ
ଏହି ଅଭିଯାନର ସବୁଠାରୁ ବଡ ଦିଗ ଥିଲା ସମଗ୍ର ରାଜ୍ୟରେ ୩୦୦୦ରୁ ଅଧିକ ସୋସିଆଲ ମିଡିଆ ଇନ୍ଫ୍ଲୁଏନ୍ସରଙ୍କୁ ଯୋଡ଼ିବା। ଏଥିରେ ଫେସବୁକ୍, ଇନ୍ଷ୍ଟାଗ୍ରାମ ଓ ୟୁଟ୍ୟୁବରେ ଏକ୍ଟିଭ ଛୋଟ ଓ ବଡ କଣ୍ଟେଣ୍ଟ କ୍ରିଏଟରମାନେ ଥିଲେ। ରିପୋର୍ଟ ଅନୁସାରେ ଏହି ଇନ୍ଫ୍ଲୁଏନ୍ସରମାନଙ୍କ ପାଖରେ କମ୍ ସେ କମ୍ ୫୦୦୦ ଫଲୋଅର ଥିବା ଆବଶ୍ୟକ ଥିଲା। ସେମାନଙ୍କ କାମ ଥିଲା ପଲିଟିକାଲ ସ୍ଲୋଗାନ ପ୍ରଚାର କରିବା ଓ ଅନଲାଇନ ଚର୍ଚ୍ଚାକୁ ଏକ୍ଟିଭ ରଖିବା।
ଯୁବ ଭୋଟରଙ୍କୁ ଟାର୍ଗେଟ
ବିଜେପିର ସବୁଠାରୁ ବଡ ସଫଳତା ଥିଲା ଯୁବ ଭୋଟର ଓ ସୋସିଆଲ ମିଡିଆ ବ୍ୟବହାରକାରୀଙ୍କ ସହ ଯୋଡ଼ିହେବା। ଇନ୍ଫ୍ଲୁଏନ୍ସରମାନଙ୍କ ମାଧ୍ୟମରେ ପ୍ରଚାରିତ କଣ୍ଟେଣ୍ଟ ଲୋକଙ୍କୁ ଅଧିକ ନିଜସ୍ୱ ଓ ସହଜ ଲାଗୁଥିଲା।ଲଗାତାର ଅନଲାଇନରେ ଏକ୍ଟିଭ ରହି ବିଜେପି ରାଜନୈତିକ ଚର୍ଚ୍ଚାରେ ନିଜ ଦବଦବା ରଖିବା ସହିତ ନିଜ ବାର୍ତ୍ତାକୁ ପୁଣି ଭୋଟରଙ୍କ ପାଖକୁ ପହଞ୍ଚାଇବାରେ ସଫଳ ହୋଇଥିବା କୁହାଯାଉଛି। ଯାହା ମମତାଙ୍କ ବିରୋଧରେ ଏକ ଜନମତ ସୃଷ୍ଟି କରିବାରେ ଏକ ବଡ଼ ଭୂମିକା ନିର୍ବାହ କରିଥିବା କୁହାଯାଇଛି।
