ମୃତ୍ୟୁ ଏମିତି ଆସେ । ଯାହା କାହାକୁ ଜଣାନଥାଏ । ଅକାଳରେ ହଠାତ ଚାଲିଗଲେ ସାର ଆରପାରିକୁ । ପିଲାମାନେ ବୁଝିବା ଆଗରୁ ଛାଡ଼ି ଗଲେ ଅନେକ ସ୍ମୃତି। ସୁରଭିର ସୁଗନ୍ଧରେ ମିଶିଗଲା ସାର ମୃତ୍ୟୁଞ୍ଜୟଙ୍କ ଆତ୍ମା । ଏଭଳି ଅଘଟଣ ଘଟିଛି କଟକ ଜିଲ୍ଲାର ବାଙ୍କୀ ଶିମିଳିପୁର ଉଚ୍ଚପ୍ରାଥମିକ ବିଦ୍ୟାଳୟରେ କ୍ଲଷ୍ଟର୍ ସ୍ତରୀୟ ‘ସୁରଭି’ କାର୍ଯ୍ୟକ୍ରମରେ । ବରଗାଁ ସରକାରୀ ପ୍ରାଥମିକ ବିଦ୍ୟାଳୟର ଶିକ୍ଷକ ମୃତ୍ୟୁଞ୍ଜୟ ମନ୍ତ୍ରୀଙ୍କ ଅଚାନକ ପରଲୋକ ଘଟିଛି। ୪୭ ବର୍ଷୀୟ ଅବିବାହିତ ମୃତ୍ୟୁଞ୍ଜୟ ସାର ଶିକ୍ଷକ ଭାବେ କାର୍ଯ୍ୟ କରୁଥିଲେ । ପୂର୍ବରୁ ସେ ସିଆରସିସି (କ୍ଲଷ୍ଟର୍ ରିସୋର୍ସ୍ ସେଣ୍ଟର୍ କୋଆର୍ଡିନେଟର୍) ଭାବେ କାମ କରିଥିଲେ । ସ୍ଥାନୀୟ ଅଞ୍ଚଳରେ ସେ ଜଣେ ଜଣାଶୁଣା କବି ମଧ୍ୟ ଥିଲେ । ତେବେ ଅପରାହ୍ଣ ୨ଟା ସମୟରେ ସୁରଭି କାର୍ଯ୍ୟକ୍ରମ ଚାଲିଥିବା ବେଳେ ମୃତ୍ୟୁଞ୍ଜୟ ସାର ହଠାତ୍ ଅସୁସ୍ଥ ହୋଇ ପଡ଼ିଯାଇଥିଲେ। ସେ ଅସୁସ୍ଥ ଥିବାରୁ ତାଙ୍କୁ ସଙ୍ଗେ ସଙ୍ଗେ ବାଙ୍କୀ ଉପଖଣ୍ଡ ଚିକିତ୍ସାଳୟ ନିଆଯାଇଥିଲା । କିନ୍ତୁ ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ମୃତ୍ୟୁଞ୍ଜୟ ସାରଙ୍କ ପରଲୋକ ପରେ ଛାତ୍ରଛାତ୍ରୀ, ଶିକ୍ଷକ-ଶିକ୍ଷୟିତ୍ରୀ ଓ ଅଭିଭାବକମାନେ ମନଦୁଃଖରେ ଘରକୁ ଫେରି ଯାଇଥିଲେ ।
ଦିବଂଗତ ମୃତ୍ୟୁଞ୍ଜୟ ସାରଙ୍କ ଘର ଡମପଡ଼ା ବ୍ଲକ୍ର ଭେଡ଼ାରାମଚନ୍ଦ୍ରପୁରରେ। ସେ ଏକ ନିଷ୍ଠାବାନ୍ ଶିକ୍ଷକ ଥିଲେ, ଯିଏ ପିଲାମାନଙ୍କୁ ଶିକ୍ଷା ସହିତ ଭାରତୀୟ ସଂସ୍କୃତି ବିଷୟରେ ଶିକ୍ଷା ପ୍ରଦାନ କରୁଥିଲେ । ତାଙ୍କ କବିତା ପାଇଁ ସେ ପ୍ରଶଂସିତ ହେଉଥିଲେ । ମୃତ୍ୟୁଞ୍ଜୟ ସାରଙ୍କ ଅକାଳ ମୃତ୍ୟୁରେ ସମଗ୍ର ଶିକ୍ଷକ ସମାଜ ଗଭୀର ଶୋକ ପ୍ରକାଶ କରିଛନ୍ତି । ଏହାସହ ଡମପଡ଼ା ବ୍ଲକ୍ ଶିକ୍ଷା ଅଧିକାରୀ କାମରାଜ ସାହୁ, ସହକାରୀ ଶିକ୍ଷା ଅଧିକାରୀ ପ୍ରଫୁଲ୍ଲ କୁମାର ବେହେରା ଓ କାର୍ତ୍ତିକ ବେହେରା, ପ୍ରାଥମିକ ଶିକ୍ଷକ ସଂଘର ସଭାପତି ସରୋଜ କୁମାର ମହାପାତ୍ର, ଶିକ୍ଷକ ସଂଘ ଉପଦେଷ୍ଟା ବିଦ୍ୟାଧର ଖଟୁଆ, ମାନସ କୁମାର ନନ୍ଦ ଓ ସନ୍ତୋଷ କୁମାର ପରମଗୁରୁ ସମେତ ଅନେକ ଶିକ୍ଷକ-ଶିକ୍ଷୟିତ୍ରୀ ଡାକ୍ତରଖାନାରେ ପହଞ୍ଚି ଶେଷ ଦର୍ଶନ କରିଥିଲେ। ମୃତ୍ୟୁଞ୍ଜୟ ସାରଙ୍କ ଅକାଳ ବିୟୋଗରେ ସ୍ଥାନୀୟ ଅଞ୍ଚଳରେ ଗଭୀର ଶୋକ ପ୍ରକାଶ ପାଇଛି ।
