ବିହାର ବିଧାନସଭା ନିର୍ବାଚନରେ ମହାଗଠବନ୍ଧନର ମୁଖ୍ୟମନ୍ତ୍ରୀ ପ୍ରାର୍ଥୀ ହୋଇଛନ୍ତି ତେଜସ୍ୱୀ ଯାଦବ । ସରକାର ଗଢ଼ିବା ପାଇଁ ପ୍ରତିଦିନ ଭୋଟରଙ୍କ ମନକୁ ଛୁଇଁବା ଭଳି ଘୋଷଣା କରୁଛନ୍ତି । ଇଣ୍ଡିଆ ଗଠବନ୍ଧନ ଯଦି ସରକାରକୁ ଆସେ, ତେବେ ରାଜ୍ୟର ପଞ୍ଚାୟତ ପ୍ରତିନିଧିଙ୍କ ପାଇଁ ପେନ୍ସନ୍ ବ୍ୟବସ୍ଥା କରିବାକୁ ଘୋଷଣା କରିଛନ୍ତି । ଏହାସହ ୫୦ ଲକ୍ଷ ଟଙ୍କାର ବୀମା କଭରେଜ୍ ଏବଂ ସମ୍ମାନରାଶି ଦୁଇଗୁଣ କରାଯିବ ବୋଲି କହିଛନ୍ତି। ରାଜ୍ୟର ପାରମ୍ପରିକ କାରୀଗର ଯେପରିକି ବଣିଆ, କୁମ୍ଭକାର ଏବଂ ବଢ଼େଇଙ୍କ ପାଇଁ ୫ ଲକ୍ଷ ଟଙ୍କାର ଏକକାଳୀନ ଋଣ ପ୍ରଦାନ କରାଯିବ ବୋଲି ଘୋଷଣା କରିଛନ୍ତି ।
ତେଜସ୍ୱୀ ଯାଦବ କହିଛନ୍ତି, “ବିହାରର ପଞ୍ଚାୟତ ନିର୍ବାଚିତ ପ୍ରତିନିଧିମାନେ ଦୀର୍ଘଦିନରୁ ଆର୍ଥିକ ସୁରକ୍ଷା ଏବଂ ସାମାଜିକ ସୁବିଧା ଦାବି କରୁଛନ୍ତି । ତାଙ୍କ ଦାବି ପୂରଣ କରାଯିବ। ବଣିଆ, କୁମ୍ଭକାର ଏବଂ ବଢ଼େଇ ସହ ଅନ୍ୟାନ୍ୟ ପାରମ୍ପରିକ କାରୀଗରମାନଙ୍କୁ ୫ ଲକ୍ଷ ଟଙ୍କାର ସୁଧମୁକ୍ତ ଏକକାଳୀନ ଋଣ ପ୍ରଦାନ କରାଯିବ, ଯାହା ସେମାନଙ୍କର ବ୍ୟବସାୟ ବିସ୍ତାରରେ ସାହାଯ୍ୟ କରିବ।
ପୂର୍ବରୁ ମହାଗଠବନ୍ଧନ ପକ୍ଷରୁ ତେଜସ୍ବୀ ଯୁବକଙ୍କ ପାଇଁ ୧୦ ଲକ୍ଷ ଚାକିରି ଦେବାକୁ ଘୋଷଣା କରିଛନ୍ତି । ମହିଳାଙ୍କୁ ୨,୫୦୦ ମାସିକ ସହାୟତା ଦେବାକୁ ଘୋଷଣା କରିଛନ୍ତି । କୃଷକଙ୍କ ଋଣ ଛାଡିବାକୁ କହିଛନ୍ତି । ବିହାର ଭଳି ଏକ ଗରିବ ରାଜ୍ୟର ଅର୍ଥନୀତି ଏତେ ସୁଦୃଢ଼ ନୁହେଁ । ଏସବୁ ଜାଣି ମଧ୍ୟ ବିରୋଧୀ ମେଂଟ ପକ୍ଷରୁ ନୀତିଶଙ୍କୁ ଟକ୍କର ଦେବାପାଇଁ ଏପରି ଲୋଭ ଭୋଟରଙ୍କୁ ଦେଖାଉଛନ୍ତି ।
ଖାଲି ସେତିକି ନୁହେଁ , ମହାଗଠବନ୍ଧନ ସରକାର ଗଠନ ହେଲେ ପ୍ରଥମ କ୍ୟାବିନେଟ୍ ବୈଠକରେ ୧୦ ଲକ୍ଷ ଯୁବକଙ୍କୁ ସରକାରୀ ଚାକିରି ଯୋଗାଇ ଦେବେ ବୋଲି ପ୍ରତିଶ୍ରୁତି ଦେଇଛନ୍ତି ତେଜସ୍ବୀ । ରାଜ୍ୟବାସୀଙ୍କ ବିଦ୍ୟୁତ୍ ବିଲ୍ ମାଫ୍ ଓ ଗ୍ୟାସ୍ ସିଲିଣ୍ଡର ୫୦୦ ଟଙ୍କାରେ ପ୍ରଦାନ କରାଯିବ ବୋଲି ଘୋଷଣା କରିଛନ୍ତି । ଏହା ପୂର୍ବରୁ ସେ ୧୭ ମାସ ସରକାରରେ ଥିବା ସମୟରେ ୫ ଲକ୍ଷରୁ ଅଧିକ ଚାକିରି ଦେଇଥିବା ସେ କହିଛନ୍ତି । ଧାନ କ୍ରୟ ମୂଲ୍ୟ ବୃଦ୍ଧିକରି ଧାନ କୁଇଣ୍ଟାଲ ପିଛା ୩,୧୦୦ ଟଙ୍କା MSP ଦେବେ ବୋଲି କହିଛନ୍ତି । କୃଷି ଯନ୍ତ୍ରପାତି ଉପରେ ୭୫% ସବସିଡି ଦେବାକୁ ଘୋଷଣା କରିଛନ୍ତି । ସମସ୍ତ ବିଦ୍ୟାଳୟରେ ମଧ୍ୟାହ୍ନ ଭୋଜନ ଓ ଇଉନିଫର୍ମ ମାଗଣା ଦେବାକୁ ଘୋଷଣା କରିଛନ୍ତି । ପ୍ରତି ବ୍ଲକ୍ରେ ନୂଆ ମେଡିକାଲ୍ କଲେଜ୍ ଓ ଆୟୁଷ୍ମାନ୍ ଭାରତ୍ କାର୍ଡ୍ ୧୦ ଲକ୍ଷରୁ ବଢ଼ାଇ ୨୫ ଲକ୍ଷ କରିବାକୁ କହିଛନ୍ତି। ବିଦ୍ୟାର୍ଥୀଙ୍କୁ ମାଗଣା ଲ୍ୟାପଟପ୍ ଓ ଇଣ୍ଟରନେଟ୍ ସୁବିଧା ଯୋଗାଇବାକୁ କହିଛନ୍ତି। ଯୁବକଙ୍କୁ ମାସିକ ୫,୦୦୦ ଟଙ୍କା ଚାକିରି ନ ମିଳିବା ପର୍ଯ୍ୟନ୍ତ ଦେବାକୁ ଏକ ଲୋଭନୀୟ ଅଫର ଦେଇଛନ୍ତି । ମାଓବାଦୀ ପ୍ରଭାବିତ ଅଞ୍ଚଳରେ ବିଶେଷ ବିକାଶ ପ୍ୟାକେଜ୍ ଦେବାକୁ ଘୋଷଣା କରିଛନ୍ତି। ସବୁଠୁ ବଡ଼ କଥା ହେଲା ,ସବୁ ଘୋଷଣାକୁ ବିଜେପି କଟାକ୍ଷ କରିଛି । ଯେହେତୁ ମହାଗଠବନ୍ଧନ ସପକ୍ଷରେ କୈାଣସି ସର୍ଭେ ସଂସ୍ଥା ସରକାର ଗଠନ କରିବା ନେଇ ତଥ୍ୟ ପ୍ରକାଶ କରୁନାହାଁନ୍ତି । ତେଣୁ ମହାଗଠବନ୍ଧନ ଏପରି ଲୋଭନୀୟ ଅଫର ଦେଉଥିବା ବିଜେପି ଅଭିଯୋଗ କରୁଛି । ୨୪୩ ସଦସ୍ୟ ବିଶିଷ୍ଟ ବିହାର ବିଧାନସଭା ନିର୍ବାଚନ ୬ ନଭେମ୍ବର ଏବଂ ୧୧ ନଭେମ୍ବର, ଦୁଇ ପର୍ଯ୍ୟାୟରେ ହେବ । ଫଳାଫଳ ୧୪ ନଭେମ୍ବରରେ ଘୋଷଣା ହେବ। ନୀତିଶ କୁମାରଙ୍କ ନେତୃତ୍ୱାଧୀନ ଏନଡିଏ (ଜେଡିୟୁ, ବିଜେପି, ଏଲଜେପି ଓ ଅନ୍ୟାନ୍ୟ) ରହିଛନ୍ତି । ଅନ୍ୟ ପଟରେ ତେଜସ୍ୱୀଙ୍କ ନେତୃତ୍ୱାଧୀନ ଆରଜେଡି, କଂଗ୍ରେସ, ଲେଫ୍ଟ୍ ଏବଂ ଭିଆଇପିର ମେଣ୍ଟକୁ ନେଇ ମହାଗଠବନ୍ଧନ ହୋଇଛି । ତେଜସ୍ବୀଙ୍କ ପ୍ରତିଶ୍ରୁତି ବିହାରର ମତାଧିକାରୀଙ୍କୁ କେତେ ଆକର୍ଷିତ କରିବାରେ ସଫଳ ହେବ ତାହା ସମୟ କହିବ । ତେବେ ତେଜସ୍ବୀଙ୍କ ଏହି ମାଗଣା ଯୋଜନାଗୁଡ଼ିକ ମତଦାନରେ କିପରି ପ୍ରଭାବ ପକାଇବ, ତାହା ଦେଖିବାକୁ ବାକି ରହିଲା।
