ନ୍ୟୁୟର୍କ:ଇତିହାସ ରଚିଲେ ଭାରତୀୟ ବଂଶୋଦ୍ଭବ ଜୋହରାନ ମମ୍ଦାନୀ। ନ୍ୟୁୟର୍କ ମେୟର ପଦ ପାଇଁ ଡେମୋକ୍ରାଟିକ୍ ପାର୍ଟିରୁ ନିର୍ବାଚନ ଲଢ଼ି ବିଜୟ ହେଲେ ଜୋହରାନ୍। ଏହି ବିଜୟ ସହିତ ଜୋହରାନ ନ୍ୟୁୟର୍କର ପ୍ରଥମ ଭାରତୀୟ-ଆମେରିକୀୟ ମୁସଲିମ ମେୟର ହୋଇଛନ୍ତି। ୩୪ବର୍ଷୀୟ ଜୋହରାନ ପୂର୍ବତନ ରାଜ୍ୟପାଳ ଆଣ୍ଡ୍ରିୟୁ କୁଓମୋଙ୍କୁ ପରାସ୍ତ କରିଥିଲେ, ଯିଏ ସ୍ୱାଧୀନ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରିଥିଲେ। ଜୋହରାନ ୭ବର୍ଷ ବୟସରେ ନ୍ୟୁୟର୍କ ସହରରେ ରହିବା ଆରମ୍ଭ କରିଥିଲେ। ତାଙ୍କ ପିତା, ମହମୁଦ ମମଦାନୀ ଜଣେ ପ୍ରସିଦ୍ଧ ଉଗାଣ୍ଡା ଲେଖକ ଏବଂ ମାଆ ମୀରା ନାୟାର ପ୍ରସିଦ୍ଧ ଭାରତୀୟ ଚଳଚ୍ଚିତ୍ର ନିର୍ମାତା । ମୀରା ନାୟାରଙ୍କ ପୁଅ ଜୋହରାନ ମମଦାନୀ ୬୫୦,୦୦୦ରୁ ଅଧିକ ଭୋଟ, ପ୍ରାୟ ୫୧.୨ ପ୍ରତିଶତ ଭୋଟ ସହିତ ନିର୍ବାଚନରେ ବିଜୟୀ ହୋଇ ନ୍ୟୁୟର୍କର ପ୍ରଥମ ମୁସଲିମ ମେୟର ହୋଇଛନ୍ତି ।
ପ୍ରସିଦ୍ଧ ଫିଲ୍ମ ନିର୍ମାତା ମୀରା ନାୟାରଙ୍କ ପୁଅ ଜୋହରାନ୍ ମମଦାନୀ ନ୍ୟୁୟର୍କ ସହର ର ମେୟର ଭାବେ ନିର୍ବାଚିତ ହେବା ପରେ ତାଙ୍କୁ ନେଇ ସାରା ବିଶ୍ବରେ ଚର୍ଚା ଆରମ୍ଭ ହୋଇଛି । ବିଶେଷ କରି ଟ୍ରମ୍ପ ତାଙ୍କୁ ଭୋଟ ନଦେବା ପାଇଁ ଅନେକ ବାର କହିଥିଲେ ମଧ୍ୟ ତାହାର ପ୍ରଭାବ ପଡ଼ିନାହିଁ । ଏହି ପ୍ରତିଷ୍ଠିତ ପଦବୀରେ ଅବସ୍ଥାପିତ ହେବାରେ ସେ ପ୍ରଥମ ଭାରତୀୟ ବଂଶୋଦ୍ଭବ ମୁସଲମାନ । ୩୫ବର୍ଷୀୟ ଜୋହରାନଙ୍କ ଏହି ବିଜୟ ସମଗ୍ର ବିଶ୍ୱର ଦୃଷ୍ଟି ଆକର୍ଷଣ କରିଛି । ତାଙ୍କର ଓଡ଼ିଶା ସହିତ ଥିବା ନିବିଡ଼ ସମ୍ପର୍କ ମଧ୍ୟ ଚର୍ଚ୍ଚାକୁ ଆସିଛି । ନ୍ୟୁୟର୍କରେ ତାଙ୍କ ପୁଅ ଜୋହରାନଙ୍କ ବିଜୟ ପରେ, ଓଡ଼ିଶାର ଝିଅ ଭାବେ ମୀରା ନାୟାରଙ୍କ ପରିଚୟ ଅଧିକ ଗୌରବମୟ ହୋଇଛି । ୧୯୫୭ ମସିହାରେ ମୀରା ନାୟାରଙ୍କ ଜନ୍ମ ଓଡ଼ିଶାର ଶିଳ୍ପନଗରୀ ରାଉରକେଲାରେ ହୋଇଥିଲା । ସେ ତାଙ୍କର ବାଲ୍ୟ ଓ କୈଶୋର ଜୀବନର ମୋଟ୍ ପ୍ରାୟ ୧୮ବର୍ଷ ସୁନ୍ଦରଗଡ଼ ଏବଂ ଭୁବନେଶ୍ୱରରେ ଅତିବାହିତ କରିଛନ୍ତି । ତାଙ୍କର ପିଲାଦିନର ସମୟ ଅଧିକାଂଶ ସମୟ ଓଡ଼ିଶାର ଆଦିବାସୀ ସଂସ୍କୃତି ଓ ପ୍ରଶାସନିକ କାର୍ଯ୍ୟାଳୟ ମଧ୍ୟରେ କଟିଥିଲା, ଯାହା ତାଙ୍କର ଚଳଚ୍ଚିତ୍ର ନିର୍ମାଣ ଶୈଳୀକୁ ରୂପ ଦେଇଥିଲା ।
ଆମେରିକାର ରାଜନୀତିରେ ଏକ ଗୁରୁତ୍ୱପୂର୍ଣ୍ଣ ନିର୍ବାଚନରେ ଜୋହରାନଙ୍କ ବିଜୟ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଏକ ବଡ଼ ଝଟକା ଦେଇଛି। ଏହି ନିର୍ବାଚନକୁ ରାଜନୈତିକ ମହଲରେ ‘ମମଦାନୀ ବନାମ ଟ୍ରମ୍ପ’ ଯୁଦ୍ଧ ଭାବରେ ଦେଖାଯାଉଥିଲା। ଆମେରିକାର ସବୁଠାରୁ ବଡ଼ ସହର ନ୍ୟୁୟର୍କରେ ମମଦାନୀ ହାରନ୍ତୁ ବୋଲି ଡୋନାଲ୍ଡ ଟ୍ରମ୍ପ ଜୋରସୋରରେ ଚେଷ୍ଟା କରିଥିଲେ। ଟ୍ରମ୍ପ ଏତେ ମାତ୍ରାରେ ଏହି ନିର୍ବାଚନକୁ ନିଜର ପ୍ରତିଷ୍ଠାଗତ ପ୍ରସଙ୍ଗ କରିଥିଲେ ଯେ ସେ ମମଦାନୀଙ୍କ ବିରୋଧରେ ସୋସିଆଲ୍ ମିଡିଆରେ କ୍ୟାମ୍ପେନ୍ ମଧ୍ୟ କରିଥିଲେ। ଏହି ନିର୍ବାଚନରେ ମମଦାନୀଙ୍କ ବିଜୟ ଟ୍ରମ୍ପଙ୍କ ପାଇଁ ଅଧିକ ସମସ୍ୟା ସୃଷ୍ଟି କରିଛି, କାରଣ ଏହା ଟ୍ରମ୍ପଙ୍କ ପ୍ରବାସୀ ବିରୋଧୀ ନୀତିକୁ ସିଧାସଳଖ ଚ୍ୟାଲେଞ୍ଜ ଦେଇଛି। ନ୍ୟୁୟର୍କ ସିଟିକୁ ସମଗ୍ର ବିଶ୍ୱରେ ପ୍ରବାସୀଙ୍କ ସହର ଭାବରେ ଜଣାଯାଏ। ମମଦାନୀ ନିଜେ ଜଣେ ପ୍ରବାସୀ ହୋଇଥିବାରୁ, ତାଙ୍କ ବିଜୟ ପ୍ରବାସୀ ସମ୍ପ୍ରଦାୟ ଏବଂ ଉଦାରବାଦୀ ଚିନ୍ତାଧାରାର ଲୋକଙ୍କ ପାଇଁ ଏକ ବଡ଼ ସଙ୍କେତ ବହନ କରୁଛି। ପ୍ରବାସୀଙ୍କ ଦ୍ୱାରା ପରିପୂର୍ଣ୍ଣ ସହରରେ ଜଣେ ପ୍ରବାସୀ ପ୍ରାର୍ଥୀଙ୍କ ବିରୋଧରେ ଟ୍ରମ୍ପଙ୍କର ପ୍ରବଳ ପ୍ରଚାର ସତ୍ତ୍ୱେ ମମଦାନୀଙ୍କ ଜିତିବା, ଟ୍ରମ୍ପଙ୍କ ରାଜନୈତିକ ରଣନୀତି ଉପରେ ଗୁରୁତର ପ୍ରଶ୍ନବାଚୀ ସୃଷ୍ଟି କରିଛି ଏବଂ ପୂର୍ବତନ ରାଷ୍ଟ୍ରପତିଙ୍କୁ ଏକପ୍ରକାର ‘ଅକଲ ଗୁଡୁମ୍’ କରି ଦେଇଛି। ଏହି ଫଳାଫଳ ଆଗାମୀ ଦିନରେ ଆମେରିକାର ଜାତୀୟ ରାଜନୀତିରେ ପ୍ରବାସୀ ପ୍ରସଙ୍ଗର ପ୍ରଭାବକୁ ଦୃଢ଼ କରିବ ବୋଲି ଆଶା କରାଯାଉଛି।
