ଭୁବନେଶ୍ୱର: ବିଜେଡିର ବରିଷ୍ଠ ନେତା ବଦ୍ରିନାରାୟଣ ପାତ୍ର ପୁଣିଥରେ ନିଜ ବିସ୍ଫୋରକ ମନ୍ତବ୍ୟରେ ରାଜନୀତିକ ମହଲରେ ଚର୍ଚ୍ଚାର ବିଷୟ ପାଲଟିଛନ୍ତି। ନାଁ ନନେଇ ସେ ‘ପାଣ୍ଡିଆନ ଆଣ୍ଡ୍ କୋ’କୁ ଟାର୍ଗେଟ୍ କରିଛନ୍ତି। ବିଜେଡିର ନିର୍ବାଚନରେ ପରାଜୟର କାରଣ ବର୍ଣ୍ଣନା କରି ବଦ୍ରି କହିଛନ୍ତି ଯେ, ପାର୍ଟିର ପରାଜୟର ମୂଳ କାରଣ ହେଉଛି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଚାର ମଇଦାନକୁ ନନେବା। ଏହି ମନ୍ତବ୍ୟ ସହିତ ସେ ପରୋକ୍ଷରେ ପାର୍ଟିର କିଛି ନେତାଙ୍କୁ ଦାୟୀ କରିଛନ୍ତି।ବଦ୍ରି ପାତ୍ର କହିଛନ୍ତି, “ନବୀନ ପ୍ରଚାରକୁ ଗଲେ ନାହିଁ ବୋଲି ଆମ ଦଳ ହାରିଲା। ଏହା କ’ଣ ନବୀନଙ୍କ ଲୋକପ୍ରିୟତା ନୁହେଁ କି? ଲୋକେ ନବୀନଙ୍କୁ ଖୋଜିଲେ, ତାଙ୍କୁ ପାଇଲେ ନାହିଁ। ହେଲିକପ୍ଟରରେ ବୁଲିଲେ, ପେଣ୍ଡାଲରେ ଭାଷଣ ଦେଇ ନିଜକୁ ନବୀନ ଭାବିଲେ। ଏମାନେ ନବୀନଙ୍କର ଯେଉଁ ଅଭିନୟ କଲେ, ଲୋକେ ଅସନ୍ତୁଷ୍ଟ ହେଲେ। ଲୋକେ ଜଣାଇ ଦେଲେ ଯେ ନବୀନ ନାହିଁ ତ ଭୋଟ୍ ନାହିଁ। ଯେଉଁମାନେ ନବୀନଙ୍କୁ ବୁଲାଇଲେ ନାହିଁ, ପରାଜୟ ପାଇଁ ସେମାନେ ଦାୟୀ। ଯେଉଁମାନେ ନେତାଙ୍କୁ ଦୁର୍ବଳ କରିଥିଲେ ସେହି କଥା କହିବାକୁ ଚାହୁଁଛୁ।”ଏହି ମନ୍ତବ୍ୟ ପରୋକ୍ଷରେ ପୂର୍ବତନ ଆଇଏଏସ୍ ଅଧିକାରୀ ଭି.କେ. ପାଣ୍ଡିଆନ୍ଙ୍କୁ ଟାର୍ଗେଟ୍ କରିଥିବା ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି। ନିର୍ବାଚନ ପରେ ବିଜେଡିର ଅନ୍ତର୍ଦ୍ୱନ୍ଦ୍ୱ ପ୍ରକାଶ ପାଉଥିବା ଏହା ପ୍ରଥମ ଘଟଣା ନୁହେଁ। ବଦ୍ରିଙ୍କ ଏହି ବୟାନ୍ ପାର୍ଟିର ଆଭ୍ୟନ୍ତରୀଣ ରାଜନୀତିକୁ ଆହୁରି ଉତ୍ତପ୍ତ କରିବ ବୋଲି ଆକଳନ କରାଯାଉଛି। ଏହାର ପ୍ରତିକ୍ରିୟାରେ ପାର୍ଟିର ଅନ୍ୟ ନେତାମାନେ କ’ଣ କହିବେ, ତାହା ଉପରେ ସମସ୍ତଙ୍କ ନଜର ରହିଛି।
- Latest
- Trending
