କଟକ ମହାନଗର ନିଗମ (ସିଏମ୍ସି)ର ବିଜୁ ଜନତା ଦଳ (ବିଜେଡି) କର୍ପୋରେଟର୍ମାନେ ଆଜି ନବୀନ ନିବାସରେ ପହଞ୍ଚିଛନ୍ତି। କଟକ ବିଜେଡି ସଂଗଠନରେ ଚାଲିଥିବା ଅସନ୍ତୋଷ ଓ ଅନ୍ତର୍ଦ୍ୱନ୍ଦ୍ୱ ମଧ୍ୟରେ ନବୀନ ପଟ୍ଟନାୟକ ଏହି କର୍ପୋରେଟର୍ମାନଙ୍କୁ ଡାକି ଏକ ଗୁରୁତ୍ୱପୂର୍ଣ୍ଣ ବୈଠକ କରୁଛନ୍ତି ବୋଲି ଜଣାପଡ଼ିଛି।
ସୂତ୍ରରୁ ଜଣାପଡ଼ିଛି ଯେ କଟକରେ ବିଜେଡି କର୍ପୋରେଟର୍ମାନଙ୍କ ମଧ୍ୟରେ ଅସନ୍ତୋଷ ବଢ଼ୁଛି। କେତେକ କର୍ପୋରେଟର୍ ମେୟର ସୁବାସ ସିଂହଙ୍କ ବିରୋଧରେ ଏକାଠି ହୋଇଥିବା ବେଳେ କେହି କେହି ଦଳ ଛାଡ଼ିବାର ଧମକ ଦେଇଛନ୍ତି। ଏହି ପରିସ୍ଥିତିରେ ନବୀନ ପଟ୍ଟନାୟକ କଟକ କର୍ପୋରେଟର୍ମାନଙ୍କୁ ନବୀନ ନିବାସକୁ ଡାକି ସମସ୍ୟାର ସମାଧାନ ଓ ଦଳୀୟ ଏକତା ବଜାୟ ରଖିବା ପାଇଁ ଆଲୋଚନା କରୁଛନ୍ତି। ପୂର୍ବତନ ମନ୍ତ୍ରୀ ପ୍ରତାପ ଜେନାଙ୍କ ନେତୃତ୍ୱରେ କର୍ପୋରେଟରମାନେ ଯାଇଛନ୍ତି ।
ବୈଠକରେ କଟକ ବିଜେଡିର ସଂଗଠନ ମଜବୁତ୍ କରିବା, ଆଗାମୀ ନିର୍ବାଚନ ଓ ସ୍ଥାନୀୟ ସମସ୍ୟା ନେଇ ଆଲୋଚନା ହେବ ବୋଲି ଆଶା କରାଯାଉଛି। କେତେକ କର୍ପୋରେଟର୍ ନବୀନ ପଟ୍ଟନାୟକଙ୍କ ସମ୍ମୁଖରେ ସେମାନଙ୍କର ଅଭିଯୋଗ ଓ ଦାବି ରଖିବେ ବୋଲି ଜଣାପଡ଼ିଛି।ଏହା ପୂର୍ବରୁ ରାଜ୍ୟସଭା ନିର୍ବାଚନରେ କ୍ରସ୍ ଭୋଟିଙ୍ଗ୍ ଓ ଦଳୀୟ ବିଦ୍ରୋହ ପରେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଦଳର ବିଭିନ୍ନ ସ୍ତରର ନେତାଙ୍କୁ ନବୀନ ନିବାସରେ ଡାକି ଆଲୋଚନା କରୁଛନ୍ତି।
କଟକରେ ବିଜେଡିର ଦୁର୍ବଳତା ଓ ଅନ୍ତର୍ଦ୍ୱନ୍ଦ୍ୱ ଏକ ବଡ଼ ଚ୍ୟାଲେଞ୍ଜ ହୋଇଛି। କଟକ ମେୟର ସୁବାସ ସିଂହ ମଧ୍ୟ ସମ୍ପ୍ରତି କ୍ରସ୍ ଭୋଟିଙ୍ଗ୍ ବିରୋଧରେ ମତ ଦେଇଥିଲେ। ଏହି ପରିପ୍ରେକ୍ଷୀରେ ଆଜିର ବୈଠକକୁ ରାଜନୈତିକ ମହଲରେ ଗୁରୁତ୍ୱ ଦିଆଯାଉଛି। ବୈଠକ ପରେ କ’ଣ ନିଷ୍ପତ୍ତି ନିଆଯିବ, ତାହା ଦେଖିବାକୁ ବାକି ରହିଛି। ଏହା କଟକ ବିଜେଡିର ଭବିଷ୍ୟତ ପାଇଁ ନିର୍ଣ୍ଣାୟକ ହୋଇପାରେ ବୋଲି ବିଶ୍ଳେଷକମାନେ କହୁଛନ୍ତି।
