NDA ସରକାରର ତୃତୀୟ କାର୍ଯ୍ୟକାଳକୁ ୨ ବର୍ଷ ପୂର୍ଣ୍ଣ ହେବାକୁ ଯାଉଥିବା ବେଳେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମନ୍ତ୍ରିପରିଷଦ ବୈଠକ କରିବେ। ଏହି ବୈଠକରେ ବିଭିନ୍ନ ମନ୍ତ୍ରଣାଳୟର କାର୍ଯ୍ୟକଳାପର ସମୀକ୍ଷା ସହ ଆଗାମୀ ଦିନ ପାଇଁ ରୋଡମ୍ୟାପ ପ୍ରସ୍ତୁତ କରାଯିବ। ପଶ୍ଚିମ ଏସିଆ ସଙ୍କଟ ମଧ୍ୟରେ ଏହି ବୈଠକକୁ ବହୁତ ଗୁରୁତ୍ୱପୂର୍ଣ୍ଣ ବୋଲି ଦେଖାଯାଉଛି।
୪ଟି ମୁଖ୍ୟ ବିଷୟରେ ହେବ ସମୀକ୍ଷା
ମନ୍ତ୍ରିପରିଷଦ ବୈଠକରେ ସମସ୍ତ ମନ୍ତ୍ରୀ ଯୋଗଦେବେ। ସମସ୍ତ ବିଭାଗର କାମକୁ ମୁଖ୍ୟତଃ ୪ଟି ବିଷୟ ଆଧାରରେ ସମୀକ୍ଷା କରାଯିବ। ସେଗୁଡିକ ହେଲା—
- ଆଇନଗତ ପରିବର୍ତ୍ତନ
- ନିୟମ ଓ ପ୍ରକ୍ରିୟାର ସରଳିକରଣ
- ନୀତିଗତ ସଂଶୋଧନ
- ପ୍ରଶାସନିକ ସୁଧାର
ଏହି ଆଧାରରେ ମନ୍ତ୍ରଣାଳୟଗୁଡିକର କାମକୁ ପରଖାଯିବ ଏବଂ ଆଗାମୀ ଯୋଜନା ତିଆରି ହେବ।
କେତେକ ମନ୍ତ୍ରଣାଳୟ ଦେବେ ପ୍ରେଜେଣ୍ଟେସନ
ବୈଠକରେ କୃଷି, ପେଟ୍ରୋଲିୟମ, ବନ ଓ ପରିବେଶ, ବାଣିଜ୍ୟ, ବିଦ୍ୟୁତ ଏବଂ ଆଟୋମିକ ଏନର୍ଜି ସହିତ ପ୍ରାୟ ଏକ ଡଜନ ମନ୍ତ୍ରଣାଳୟ ପକ୍ଷରୁ ପ୍ରେଜେଣ୍ଟେସନ ଦିଆଯିବ। ସେଥିରେ ବିଭାଗମାନଙ୍କର କାମ ଓ ହୋଇଥିବା ସୁଧାର ବିଷୟରେ ସୂଚନା ଦିଆଯିବ।
ସୁଶାସନ ଓ ସୁଧାର ଏଜେଣ୍ଡାରେ ସରକାରର ଫୋକସ
ସୂତ୍ର ଅନୁସାରେ, ଏହି ବୈଠକର ମୁଖ୍ୟ ଫୋକସ ରହିବ ଜନକେନ୍ଦ୍ରିକ ସୁଧାର ଏବଂ ଶାସନ ବ୍ୟବସ୍ଥାକୁ ସରଳ କରିବା ଉପରେ। ଗତ ୨ ବର୍ଷ ମଧ୍ୟରେ ବିଭିନ୍ନ ବିଭାଗରେ ହୋଇଥିବା ସୁଧାର ସମ୍ପର୍କରେ ମନ୍ତ୍ରୀମାନଙ୍କୁ ଅବଗତ କରାଯିବ। ସରକାର ଆଗାମୀ ରାଜନୈତିକ ଓ ଆର୍ଥିକ ଲକ୍ଷ୍ୟକୁ ଧ୍ୟାନରେ ରଖି ସୁଶାସନ ଓ ସୁଧାର କାର୍ଯ୍ୟକ୍ରମକୁ ଆହୁରି ତେଜ କରିବା ପାଇଁ ପ୍ରସ୍ତୁତି କରୁଛି।
ମନ୍ତ୍ରଣାଳୟମାନଙ୍କୁ ରିପୋର୍ଟ ମାଗିଥିଲେ ପ୍ରଧାନମନ୍ତ୍ରୀ
କିଛି ଦିନ ପୂର୍ବରୁ ପ୍ରଧାନମନ୍ତ୍ରୀ ସମସ୍ତ ମନ୍ତ୍ରଣାଳୟରୁ କାର୍ଯ୍ୟର ରିପୋର୍ଟ ମାଗିଥିଲେ। ପରେ ସମସ୍ତ ବିଭାଗ ପକ୍ଷରୁ ପ୍ରଧାନମନ୍ତ୍ରୀ କାର୍ଯ୍ୟାଳୟକୁ ରିପୋର୍ଟ ପଠାଯାଇଥିଲା। ଏପରି ସମୟରେ ମୋଦୀ ସରକାରର ମନ୍ତ୍ରିମଣ୍ଡଳ ବିସ୍ତାର ନେଇ ମଧ୍ୟ ଚର୍ଚ୍ଚା ବଢ଼ିଥିବାରୁ ଆଜିର ବୈଠକ ଉପରେ ସମସ୍ତଙ୍କ ନଜର ରହିଛି।
