ବିଜେପି ସରକାରକୁ ଆସିବା ପରେ ନବୀନ ଏବେ ବିଶ୍ରାମ ନେଇଛନ୍ତି । ତାଙ୍କ ନିର୍ବାଚନମଣ୍ଡଳୀକୁ ବି ଅନେକ ଦିନ ଧରି ଯାଇନାହାଁନ୍ତି । ଗଂଜାମରେ ନବୀନଙ୍କ ରଥୀ, ମହାରଥୀ ଏଥର ନିର୍ବାଚନରେ ପରାସ୍ତ ହୋଇଛନ୍ତି । ଗଂଜାମ ଜିଲ୍ଲାର ତିନୋଟି ଲୋକସଭାମଣ୍ଡଳୀ ଏଥର ବିଜେପି ହାତକୁ ଚାଲିଯାଇଛି । ବ୍ରହ୍ମପୁର,ଆସ୍କା,କନ୍ଧମାଳ ଲୋକସଭା ଆସନରେ ବିଜେଡି ଏଥର ପରାସ୍ତ ହୋଇଛି । ଜିଲ୍ଲାର 13ଟି ବିଧାନସଭାରେ ବିଜେଡି ନେତାଙ୍କ ହାଲ ଏବେ ବେହାଲ ହୋଇଛି । ଭଞ୍ଜନଗର ,ପୋଲସରା ,କବିସୂର୍ଯ୍ୟନଗର ,ଖଲିକୋଟ ,ଛତ୍ରପୁର ,ଆସ୍କା ,ସୋରଡ଼ା, ସାନଖେମୁଣ୍ଡି ,ହିଞ୍ଜିଳି, ଗୋପାଳପୁର,ବ୍ରହ୍ମପୁର,ଦିଗପହଣ୍ଡି,ଚିକିଟି ରେ ବିଜେଡିର ଆଉ ଦମ୍ଭ ନାହିଁ । ନବୀନ ଗୋଟିଏ ଆସନରେ ଜିତିଥିଲେ ମଧ୍ୟ ସେ ଲୋକଙ୍କ ସହ ମିଶିପାରୁନାହାଁନ୍ତି । କର୍ମୀମାନେ ଏବେ ଛଟପଟ ହେଉଛନ୍ତି । ନେତାମାନେ ଆଉ କାମ ପାଉନାହାଁନ୍ତି ।
ବିଜେଡି ମୁଖିଆଙ୍କ ନିଜ ନିର୍ବାଚନ ମଣ୍ଡଳୀ ଗଞ୍ଜାମ ଜିଲ୍ଲା ଦିନେ ଏପରି ଅବସ୍ଥାକୁ ଆସିବ ଏହା କେବେ ଭାବିନଥିବେ ନବୀନ ପଟ୍ଟନାୟକ । ଦିନେ ବିଜେଡିର ବଡ଼ ଗଡ଼ ଥିବା ଗଞ୍ଜାମ ଏବେ ସଂପୂର୍ଣ୍ଣ ଭାବେ ଧୂଳି ଝଡ଼ରେ କ୍ଷତିଗ୍ରସ୍ତ ହୋଇ ବିଜେଡି ହାତରୁ ଚାଲିଯାଇଛି । ଆଉ ଲୋକେ ବିଜେଡି କଥା ଚର୍ଚା କରୁନାହାଁନ୍ତି । ସବୁଠି ବିଜେପି ଚର୍ଚ୍ଚା ଦେଖିବାକୁ ମିଳୁଛି । ନବୀନଙ୍କ ପରେ ଏବେ ଗଂଜାମରେ ବିଜେଡି ପାଇଁ ନେତୃତ୍ବ ନେବାକୁ କେହି ନାହାଁନ୍ତି । ବିଜେଡି ସଭାପତି ନବୀନ ପଟ୍ଟନାୟକଙ୍କ ନିଜ ନିର୍ବାଚନ ମଣ୍ଡଳୀ ବା ଗୃହ ଜିଲ୍ଲାର ଜିଲ୍ଲା ସଭାପତି ବିକ୍ରମ ପଣ୍ଡା ଏବେ ଜେଲରେ । ପୀତବାସ ପଣ୍ଡା ହତ୍ୟାକାଣ୍ଡରେ ସେ ଷଡ଼ଯନ୍ତ୍ର କରିଥିବା ଅଭିଯୋଗ ହୋଇଛି । ଏହି ମାମଲା ଅନେକ ଦିନ ଧରି ଚାଲିପାରେ । ଏହାରି ଭିତରେ ଦଳ କାହାକୁ ଜିଲ୍ଲା ଦାୟିତ୍ବ ନେବ ନିଷ୍ପତ୍ତି ନେଇପାରୁନାହିଁ । ଏପର୍ଯ୍ୟନ୍ତ ଅନ୍ୟ ନେତାଙ୍କୁ ଜିଲ୍ଲା ଦାୟିତ୍ବ ଦେଇପାରିନାହିଁ ।
ଗଂଜାମରେ ପୂର୍ବତନ ମନ୍ତ୍ରୀ ବିକ୍ରମ ଆରୁଖ ନିରବ ରହିଛନ୍ତି । ଡା. ରମେଶ ଚନ୍ଦ୍ର ଚ୍ୟାଉପଟ୍ଟନାୟକ ବିଶ୍ରାମ ନେଇଛନ୍ତି । ଗଞ୍ଜାମ ଜିଲ୍ଲାରେ ଯେଉଁ ବିଜେଡି ନେତାମାନେ ନବୀନ ସରକାର ଥିବା ସମୟରେ କ୍ଷମତା ଉପଭୋଗ କରୁଥିଲେ ଏବେ ସେମାନେ ସମସ୍ତେ ବିଶ୍ରାମ ନେଇଯାଇଛନ୍ତି । ସେମାନଙ୍କୁ ଆଉ ସଭାରେ ଦେଖିବାକୁ ମିଳୁନାହିଁ ।
ଗଞ୍ଜାମ ରାଜନୀତିରେ ନବୀନଙ୍କୁ ପ୍ରଥମେ ସହାୟତା କରୁଥିଲେ ସ୍ବର୍ଗତ ରାମକୃଷ୍ଣ ପଟ୍ଟନାୟକ, ପରେ ସୂର୍ଯ୍ୟ ପାତ୍ର ଆସିଥିଲେ । ସେମାନେ ଆଉ ନାହାଁନ୍ତି । ପ୍ରଦୀପ ପାଣିଗ୍ରାହୀ ବିଜେଡି ଛାଡି ଏବେ ବିଜେପି ସାଂସଦ ହୋଇଛନ୍ତି । ବିକ୍ରମ ଆରୁଖଙ୍କ ଦେଖାମିଳୁନି। କଂଗ୍ରେସରୁ ଆସି ମଙ୍ଗ ଧରିଥିବା ବିକ୍ରମ ପଣ୍ଡା ଏବେ ଜେଲରେ । ଚନ୍ଦ୍ରଶେଖର ସାହୁ କଂଗ୍ରେସରୁ ଆସିଛନ୍ତି, କିନ୍ତୁ ତାଙ୍କୁ ଦଳ ସେତେଟା ଗୁରୁତ୍ବ ଦେଉନି । ଚିକିଟିରେ ଉଷାଦେବୀ ନିରବ ରହିଛନ୍ତି । ଦଳ ଏଥର ତାଙ୍କ ପୁଅ ଶ୍ରୀରୂପଦେବଙ୍କୁ ଟିକେଟ ଦେଇଥିଲେ ବି ୬୫୨୨ ଭୋଟ୍ରେ ସେ ପରାସ୍ତ ହେଲେ। ସେପଟେ ପୋଲସରାରେ ଶ୍ରୀକାନ୍ତ ସାହୁଙ୍କ ଇମେଜ ଖରାପ, ସେ ବିବାଦୀୟ ହୋଇ ରହିଛନ୍ତି। ଛତ୍ରପୁରରେ ସୁବାସ ବେହେରା, ଦିଗପହଣ୍ଡିରେ ବିପ୍ଲବ ପାତ୍ରଙ୍କୁ ବି ୨୪ ନିର୍ବାଚନରେ ଭୋଟର ଗ୍ରହଣ କଲେନି। ଲତିକାଙ୍କ ଦଳବିରୋଧୀ ବୟାନକୁ ନେଇ ବିଜେଡି ଅସନ୍ତୋଷ ପ୍ରକାଶ କରିଛି । ଆସ୍କା, ସୋରଡ଼ା, ସାନଖେମୁଣ୍ଡି ଓ ଖଲ୍ଲିକୋଟରେ ମଧ୍ୟ ଦଳର ସ୍ଥିତି ଭଲ ନାହିଁ। ଗଂଜାମରୁ ଏଥର ଏକମାତ୍ର ବିଧାୟକ ଭାବେ ନବୀନ ଜିତିଛନ୍ତି, ଯିଏ ନିର୍ବାଚନମଣ୍ଡଳିକୁ ଯାଉନାହାନ୍ତି। କେବଳ ଅଦିନିଆ ବର୍ଷାବେଳେ କ୍ଷତିଗ୍ରସ୍ତ ଚାଷୀଙ୍କୁ ଭେଟିବାକୁ ନିଜ ଜିଲ୍ଲାକୁ ଯାଇଥିଲେ । ସେବେଠୁ ତାଙ୍କୁ ଦେଖିବାକୁ ପାଉନାହାଁନ୍ତି ଲୋକେ । ତେଣୁ ଗଂଜାମ ଜିଲ୍ଲାରେ ଆଗାମୀ ଦିନରେ ବିଜେଡି କିପରି ସଂଗଠନକୁ ସୁଦୃଢ଼ କରିବ ତାହାକୁ ନେଇ ଚର୍ଚା ଲାଗି ରହିଛି । ଯାହା ଆଲୋଚନା ହେଉଛି ପଂଚାୟତ ନିର୍ବାଚନରେ ମଧ୍ୟ ଏଥର ବିଜେପି ଭଲ କରିବ । କାରଣ ପଂଚାୟତରେ ପୂର୍ବରୁ ଜିତିଥିବା ବିଜେଡି ନେତାମାନେ ଏବେ ବିଜେପି ପାଇଁ କାମ କରୁଛନ୍ତି । ତେଣୁ ଆଗାମୀ ଦିନରେ ନବୀନଙ୍କୁ ନିଜ ଜିଲ୍ଲା ସଜାଡ଼ିବାକୁ ଝାଳ ବୁହାଇବାକୁ ପଡ଼ିପାରେ । ନଚେତ ଜିଲ୍ଲା ସବୁଦିନ ପାଇଁ ବିଜେପି ହାତକୁ ଚାଲିଯିବାର ସମ୍ଭାବନା ରହିଛି ।
