ଓଡ଼ିଶାରେ ଗ୍ରୀଷ୍ମ ଋତୁର ପ୍ରକୋପ ଆରମ୍ଭ ହୋଇଛି। ଭୀଷଣ ଗ୍ରୀଷ୍ମ ଲହରୀ ରାଜ୍ୟର ବିଭିନ୍ନ ଜିଲ୍ଲାକୁ ପ୍ରଭାବିତ କରୁଛି। ଆଞ୍ଚଳିକ ପାଣିପାଗ କେନ୍ଦ୍ର ଭୁବନେଶ୍ୱର ପକ୍ଷରୁ ଜାରି ହୋଇଥିବା ସୂଚନା ଅନୁଯାୟୀ, ଆଗାମୀ ଦିନଗୁଡ଼ିକରେ ତାପମାତ୍ରା ଆହୁରି ୨ରୁ ୩ ଡିଗ୍ରୀ ସେଲସିୟସ୍ ବଢ଼ିବ ଏବଂ କେତେକ ସ୍ଥାନରେ ୪୦ ଡିଗ୍ରୀ ଉପରେ ପହଞ୍ଚିବ।
ଗତ କିଛି ଦିନ ଧରି ରାଜ୍ୟର ପଶ୍ଚିମ ଓ ଆଭ୍ୟନ୍ତରୀଣ ଜିଲ୍ଲାଗୁଡ଼ିକରେ ତୀବ୍ର ଗରମ ଅନୁଭୂତ ହେଉଛି। ଟିଟିଲାଗଡ଼ରେ ସର୍ବାଧିକ ୪୧.୫ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି। ବଲାଙ୍ଗୀର ଓ ଭବାନୀପାଟଣାରେ ୪୧ ଡିଗ୍ରୀ, ଝାରସୁଗୁଡ଼ାରେ ୪୦.୭ ଡିଗ୍ରୀ ଏବଂ ସମ୍ବଲପୁର, ହୀରାକୁଡ଼ରେ ୪୦ ଡିଗ୍ରୀ ଉପରେ ତାପମାତ୍ରା ରହିଛି। ଉପକୂଳ ଓଡ଼ିଶାରେ ମଧ୍ୟ ଗରମ ସହ ଆର୍ଦ୍ରତା ଯୋଗୁଁ ଅସହ୍ୟ ଗୁଳୁଗୁଳି ଅନୁଭୂତ ହେଉଛି।ଭାରତୀୟ ପାଣିପାଗ ବିଭାଗ (IMD) ପକ୍ଷରୁ ୧୦ରୁ ୧୧ଟି ଜିଲ୍ଲା ପାଇଁ ହିଟ୍ୱେଭ୍ ଆଲର୍ଟ ଜାରି କରାଯାଇଛି।
ଏହି ଆଲର୍ଟ ଏପ୍ରିଲ୍ ୨୧ ତାରିଖ ପର୍ଯ୍ୟନ୍ତ ଜାରି ରହିବ ବୋଲି ଆକଳନ କରାଯାଇଛି। ଆଗାମୀ ଦୁଇ ଦିନ ମଧ୍ୟରେ ଦିନ ତାପମାତ୍ରା ୨ରୁ ୩ ଡିଗ୍ରୀ ଏବଂ କେତେକ ସ୍ଥାନରେ ୪ରୁ ୬ ଡିଗ୍ରୀ ବଢ଼ିପାରେ ବୋଲି ସୂଚନା ଦିଆଯାଇଛି।ଗ୍ରୀଷ୍ମ ଲହରୀ ଯୋଗୁଁ ଲୋକଙ୍କ ଦୈନନ୍ଦିନ ଜୀବନ ପ୍ରଭାବିତ ହୋଇଛି। ବିଶେଷକରି ବାହାରେ କାମ କରୁଥିବା ଶ୍ରମିକ, କୃଷକ ଏବଂ ପରିବହନ କର୍ମଚାରୀମାନେ ଅଧିକ ଅସୁବିଧାର ସମ୍ମୁଖୀନ ହେଉଛନ୍ତି। ସ୍ୱାସ୍ଥ୍ୟ ବିଭାଗ ପକ୍ଷରୁ ହିଟ୍ ସ୍ଟ୍ରୋକ୍ ଏବଂ ଡିହାଇଡ୍ରେସନ୍ ରୋଗରୁ ରକ୍ଷା ପାଇବା ପାଇଁ ସତର୍କତା ଜାରି କରାଯାଇଛି।
ଲୋକଙ୍କୁ ଦିନ ୧୧ଟାରୁ ବିକାଳ ୪ଟା ମଧ୍ୟରେ ଘର ବାହାରକୁ ନ ବାହାରିବା ପାଇଁ ପରାମର୍ଶ ଦିଆଯାଇଛି। ପ୍ରଚୁର ପାଣି ପିଇବା, ଓଆର୍ଏସ୍ ସେବନ ଏବଂ ହାଲୁକା ପୋଷାକ ପରିଧାନ କରିବା ଉପରେ ଗୁରୁତ୍ୱ ଦିଆଯାଇଛି।ସ୍କୁଲ୍ ଓ କଲେଜ୍ ସମୟ ସୁଧାର କରାଯାଇଥିବା ସହ ସରକାରଙ୍କ ପକ୍ଷରୁ ଗ୍ରୀଷ୍ମ କାଳୀନ ସତର୍କତା ପାଇଁ ବିଭିନ୍ନ ପଦକ୍ଷେପ ନିଆଯାଇଛି। ପାଣିପାଗ ବିଭାଗ କହିଛି ଯେ, ଏପ୍ରିଲ୍-ଜୁନ୍ ମାସରେ ଓଡ଼ିଶାରେ ସାଧାରଣତଃ ଅଧିକ ଗ୍ରୀଷ୍ମ ଲହରୀ ଆଶଙ୍କା ରହିଛି।
