ଭୁବନେଶ୍ୱର: ରାଜ୍ୟ ଶାସନର ପେଣ୍ଠସ୍ଥଳୀ କୁହାଯାଉଥିବା ଲୋକସେବା ଭବନର ଗାରିମା ରକ୍ଷା ପାଇଁ ସରକାର ଏକ ବଡ଼ ପଦକ୍ଷେପ ନେଇଛନ୍ତି। ସଚିବାଳୟ ପରିସର ମଧ୍ୟରେ ସୋସିଆଲ ମିଡିଆ ପାଇଁ ଭିଡିଓ ବା ରିଲ୍ସ ସୁଟିଂ କରିବା ଉପରେ ରୋକ୍ ଲଗାଇଛନ୍ତି ରାଜ୍ୟ ସରକାର। ଏହି ନିୟମ ଉଲ୍ଲଙ୍ଘନ କଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଚେତାବନୀ ଦେଇଛନ୍ତି।
“ଲୋକସେବା ଭବନ କାମ ପାଇଁ, ମନୋରଞ୍ଜନ ପାଇଁ ନୁହେଁ”
ସୋସିଆଲ ମିଡିଆରେ ଲାଇକ୍ ଏବଂ ଭ୍ୟୁ ପାଇବା ନିଶାରେ ଉଭୟ କର୍ମଚାରୀ ଓ ବାହାରୁ ଆସୁଥିବା ଲୋକମାନେ ସଚିବାଳୟ ଭିତରେ ଭିଡିଓ ସୁଟିଂ କରୁଥିବା ଦେଖାଯାଉଥିଲା। ଏହା ସରକାରୀ ନିୟମ ଓ ସୁରକ୍ଷା ବ୍ୟବସ୍ଥାର ଖୋଲାଖୋଲି ଉଲ୍ଲଙ୍ଘନ ବୋଲି ମନ୍ତ୍ରୀ କହିଛନ୍ତି। ମନ୍ତ୍ରୀ ସ୍ପଷ୍ଟ ଭାବେ କହିଛନ୍ତି ଯେ, “ଲୋକସେବା ଭବନ କେବଳ କାମ କରିବା ପାଇଁ, ଏହା ମନୋରଞ୍ଜନ ପାଇଁ ଉଦ୍ଦିଷ୍ଟ ନୁହେଁ।”
କର୍ମଚାରୀଙ୍କ ଉପରେ ରହିବ ନଜର
ସରକାରୀ କର୍ମଚାରୀମାନେ ଅଫିସ ସମୟରେ କିମ୍ବା ଅଫିସ ପରିସର ମଧ୍ୟରେ ରିଲ୍ସ ପ୍ରସ୍ତୁତ କରିବା ଦ୍ୱାରା ସରକାରଙ୍କ ଭାବମୂର୍ତ୍ତି କ୍ଷୁଣ୍ଣ ହେଉଥିବାରୁ ଏହାକୁ ଗମ୍ଭୀରତାର ସହ ନିଆଯାଇଛି। ବାହାର ଲୋକଙ୍କ ସହ ଅଫିସ କର୍ମଚାରୀଙ୍କ ଉପରେ ମଧ୍ୟ କଡ଼ା ନଜର ରଖିବାକୁ ନିର୍ଦ୍ଦେଶ ଦିଆଯାଇଛି।
ସୁରକ୍ଷା ଓ ଶୃଙ୍ଖଳାକୁ ଅଗ୍ରାଧିକାର
ଲୋକସେବା ଭବନ ଏକ ଉଚ୍ଚ ସୁରକ୍ଷା ବଳୟ ଅଞ୍ଚଳ ହୋଇଥିବାରୁ ଏହାର ଭିତରର ଦୃଶ୍ୟ ସୋସିଆଲ ମିଡିଆରେ ସର୍ବସାଧାରଣ ହେବା ସୁରକ୍ଷା ଦୃଷ୍ଟିରୁ ବିପଜ୍ଜନକ ହୋଇପାରେ। ସରକାରୀ କାମରେ ଶୃଙ୍ଖଳା ଫେରାଇ ଆଣିବା ପାଇଁ ଆଇନମନ୍ତ୍ରୀଙ୍କ ଏହି କଡ଼ା ଆଭିମୁଖ୍ୟକୁ ସବୁ ମହଲରେ ସ୍ୱାଗତ କରାଯାଇଛି।
