ଓଡ଼ିଶାର ଅତି ପ୍ରାଚୀନ ଓ ଗୌରବମୟ ସାମୁଦ୍ରିକ ଉତ୍ସବ ବାଲିଯାତ୍ରା ବ୍ରିଟେନରେ ପାଳନ କରାଯାଇଛି । ବ୍ରିଟେନ ସଂସଦର ସମ୍ମାନଜନକ ‘ହାଉସ୍ ଅଫ୍ ଲର୍ଡସ୍’ ଗୃହରେ ‘ଗ୍ଲୋବାଲ ସାଉଥ୍ ମେରିଟାଇମ୍ ହେରିଟେଜ୍ ସମିଟ୍ ୨୦୨୫’ର ଏକ ଅଂଶ ଭାବରେ ପାଳନ କରାଯାଇଛି।
ଏହି କାର୍ଯ୍ୟକ୍ରମଟି ଓଡ଼ିଶା ସୋସାଇଟି ଅଫ୍ ଦି ୟୁନାଇଟେଡ୍ କିଙ୍ଗଡମ୍ (OSUK) ଦ୍ୱାରା ଆୟୋଜିତ ହୋଇଥିଲା । ଆୟୋଜକ ଦଳରେ କ୍ୟାପ୍ଟେନ ଅରୁଣ କର, ଡ. ବିଭୂତି ଭୂଷଣ ପଟ୍ଟନାୟକ , ପାର୍ଥ ସାରଥୀ ପଣ୍ଡା ଏବଂ ଶ୍ୱେତା ମହାନ୍ତି ପ୍ରମୁଖ ସାମିଲ୍ ଥିଲେ। ଏହି ଦୁଇ ଦିନିଆ କାର୍ଯ୍ୟକ୍ରମ ବ୍ରିଟେନ ସଂସଦରେ ଆରମ୍ଭ ହୋଇ ଏକ ଐତିହାସିକ ସଂପର୍କର ସେତୁ ସୃଷ୍ଟି କରିଥିଲା ।
ଏଥିରେ ୧୧୫ ଜଣ ସମ୍ମାନିତ ଅତିଥି ଯୋଗ ଦେଇଥିଲେ । ଯେଉଁମାନଙ୍କ ମଧ୍ୟରେ ଲର୍ଡ ରାମି ରେଞ୍ଜର, ଲର୍ଡ ରୋଜର ଇଭାନ୍ସ, ୟୁକେ ସାଂସଦ ଲୁଇ ଫ୍ରେଞ୍ଚ, ଖେଳ ଓ ସଂସ୍କୃତି ମନ୍ତ୍ରୀ, କେମ୍ବ୍ରିଜ୍ ଜଜ୍ ବିଜନେସ୍ ସ୍କୁଲ୍ ନିର୍ଦ୍ଦେଶକ ପ୍ରଫେସର ସୈୟଦ୍ କାମିଆର ମୋହାଦ୍ଦେସ ଆର୍ଦେବିଲି ଏବଂ ଅକ୍ସଫୋର୍ଡ ୟୁନିଭର୍ସିଟିର କୃତ୍ରିମ ବୁଦ୍ଧିମତା (AI) ନିର୍ଦ୍ଦେଶକ ପ୍ରଫେସର ଅଜିତ ବିଜୟ କୁମାର ଜାଓକର ପ୍ରମୁଖ ସାମିଲ ଥିଲେ।
ଏଥିସହ ପୂର୍ବତନ ସାଂସଦ, କଞ୍ଜରଭେଟିଭ୍ ଏବଂ ଲେବର ପାର୍ଟିର କାଉନସିଲର ଏବଂ ଲଣ୍ଡନ ଆସେମ୍ବ୍ଲିର ସଦସ୍ୟମାନେ ମଧ୍ୟ ଉପସ୍ଥିତ ଥିଲେ। ଶ୍ରୀଲଙ୍କା, ମାଲେସିଆ, ଇଣ୍ଡୋନେସିଆ, ଭାରତ ସମେତ ନାଇଜେରିଆ, ସ୍ପେନ୍, ଆମେରିକା, ଚୀନ୍, ଇଟାଲୀ ଓ ୟୁକେର ପ୍ରତିନିଧିମାନେ ଏହି ଉତ୍ସବରେ ମଧ୍ୟ ଯୋଗ ଦେଇଥିଲେ।
ଏହି ସମ୍ମିଳନୀରେ ୟୁକେର ସାଂସଦ, ଭାରତର କିଛି ନେତା ଏବଂ ଗ୍ଲୋବାଲ ସାଉଥ୍ର ପ୍ରତିନିଧିମାନେ ଉଦ୍ବୋଧନ ଦେଇଥିଲେ। ସେମାନେ ଦେଶ ଦେଶ ମଧ୍ୟରେ ଅର୍ଥନୀତି ବିକାଶ , ସ୍ଥାୟୀ ଉଦ୍ଭାବନ ହାସଲ କରିବାରେ ସହଯୋଗର ଗୁରୁତ୍ୱ ଉପରେ ଜୋର ଦେଇଥିଲେ। ଏହି କାର୍ଯ୍ୟକ୍ରମ ଭାରତର ନେତୃତ୍ୱ ଏବଂ ୟୁକେର ଉଦ୍ଭାବନ ପ୍ରତି ପ୍ରତିବଦ୍ଧତା ଦ୍ୱାରା ପରିଚାଳିତ ଗ୍ଲୋବାଲ ସାଉଥ୍ ଦେଶଗୁଡ଼ିକ ମଧ୍ୟରେ ଏକ ନୂତନ ଆଲୋଚନାର ଆରମ୍ଭକୁ ଚିହ୍ନିତ କରିଥିଲା। ଏହା କେବଳ ଓଡ଼ିଶାର ଗୌରବମୟ ସାମୁଦ୍ରିକ ଅତୀତକୁ ସମ୍ମାନ ଦେଇନଥିଲା, ବରଂ ଏକ ନୂତନ ଭବିଷ୍ୟତ ଆଡକୁ ରାସ୍ତା ବଢ଼ାଇ ଆଲୋକିତ କରିଥିଲା।
ସମ୍ମିଳନୀର ଆରମ୍ଭରେ ଶ୍ରୀ ଅବିରୂପ ସେନଗୁପ୍ତା ଏବଂ ତାଙ୍କ ଛାତ୍ରୀ କୁମାରୀ ଅଦ୍ୱିତୀ ତ୍ରିପାଠୀ ପଟ୍ଟନାୟକଙ୍କ ଦ୍ୱାରା ଏକ ମନୋରମ ଓଡ଼ିଶୀ ନୃତ୍ୟ ପରିବେଷଣ କରାଯାଇଥିଲା। ଏହା ପରେ OSUK CIC ମୁଖପାତ୍ର ଶ୍ରୀମତୀ ମହାନ୍ତିଙ୍କ ନେତୃତ୍ୱରେ ସମସ୍ତ ପ୍ରତିନିଧି ଠିଆ ହୋଇ ପରମ୍ପରା, ସଂସ୍କୃତିକୁ ଆଗକୁ ନେବା ପାଇଁ ଶପଥ ନେଇଥିଲେ। ସମସ୍ତେ ଏକ ସ୍ବରରେ କହିଥିଲେ- ଆମେ, ଗ୍ଲୋବାଲ ସାଉଥର ନାଗରିକ ତଥା ବନ୍ଧୁଗଣ, ଆମର ପ୍ରାଚୀନ ସାମୁଦ୍ରିକ ସମ୍ପର୍କକୁ ସମ୍ମାନ ଦେବାକୁ ପ୍ରତିଜ୍ଞା କରୁଛୁ, ଯାହା ଏକଦା ବାଣିଜ୍ୟ, ସଂସ୍କୃତି ଏବଂ ମିଳିତ ମୂଲ୍ୟବୋଧ ମାଧ୍ୟମରେ ଆମର ସଭ୍ୟତାକୁ ଯୋଡ଼ିଥିଲା। ଆମେ ଆସନ୍ତା ପିଢ଼ି ପାଇଁ ସ୍ଥାୟୀତ୍ୱ, ସମାବେଶୀତା ଏବଂ ଉଦ୍ଭାବନକୁ ଅନୁସରଣ କରି ଏହି ଐତିହ୍ୟକୁ ସଂରକ୍ଷଣ ଓ ଆଗକୁ ବଢ଼ାଇବାକୁ ପ୍ରତିଜ୍ଞା କରୁଛୁ।”
ସମ୍ମିଳନୀର ମୁଖ୍ୟ ଆକର୍ଷଣ ଥିଲା ଆୟୋଜକ ସଚିବ ଡ. ପଟ୍ଟନାୟକଙ୍କ ଦ୍ୱାରା “ଗ୍ଲୋବାଲ ସାଉଥ୍ କରିଡର” ସ୍ଥାପନ କରିବା ପାଇଁ ଯୋଜନା ଘୋଷଣା। ଏହାର ଲକ୍ଷ୍ୟ ହେଉଛି ଗ୍ଲୋବାଲ ସାଉଥ୍ ଦେଶଗୁଡ଼ିକ ମଧ୍ୟରେ ପ୍ରାଚୀନ ଅର୍ଥନୈତିକ ଏବଂ ସାଂସ୍କୃତିକ ସମ୍ପର୍କକୁ ପୁନର୍ଜୀବିତ ଓ ମଜବୁତ କରିବା।
ଡ. ପଟ୍ଟନାୟକ ଏହା ମଧ୍ୟ ଉଲ୍ଲେଖ କରିଥିଲେ ଯେ ବାଲିଯାତ୍ରାକୁ ପୂର୍ବରୁ ସଙ୍ଗୀତ ନାଟକ ଏକାଡେମୀ ଦ୍ୱାରା ଇଣ୍ଟାଞ୍ଜିବଲ୍ କଲଚରାଲ୍ ହେରିଟେଜ୍ର ରାଷ୍ଟ୍ରୀୟ ତାଲିକାରେ ସାମିଲ କରାଯାଇଛି ଏବଂ ଓଡ଼ିଶା ସରକାର ୟୁନେସ୍କୋ ସ୍ୱୀକୃତି ପାଇଁ ସକ୍ରିୟ ଭାବରେ କାର୍ଯ୍ୟ କରୁଛନ୍ତି। ସେ ସମଗ୍ର ବିଶ୍ୱକୁ ଏହି ପ୍ରୟାସରେ ସହଯୋଗ କରିବାକୁ ନିବେଦନ କରିଥିଲେ।
ଅନ୍ୟ ଜଣେ ଆୟୋଜକ ସଚିବ ଶ୍ରୀ ପାର୍ଥ ସାରଥୀ ପଣ୍ଡା କହିଥିଲେ ଯେ ଯୁକ୍ତରାଜ୍ୟରେ ପ୍ରାୟ ୧୨,୦୦୦ ଓଡ଼ିଆ ଡାଏସପୋରା ରହିଛନ୍ତି, ଯେଉଁମାନେ ଡାକ୍ତର, ବୈଜ୍ଞାନିକ ଓ ଇଞ୍ଜିନିୟର ଭାବେ ୟୁକେ ଓ ଭାରତୀୟ ଅର୍ଥନୀତିରେ ଗୁରୁତ୍ୱପୂର୍ଣ୍ଣ ଅବଦାନ ଦେଉଛନ୍ତି। ସେମାନେ ସାମାଜିକ ଓ ପରିବେଶ କାର୍ଯ୍ୟକ୍ରମରେ ମଧ୍ୟ ସକ୍ରିୟ ଅଛନ୍ତି ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ “ଏକ ପେଡ୍ ମାଁ କେ ନାମ” ଅଭିଯାନକୁ ସମର୍ଥନ କରି ଭାରତରେ ବୃକ୍ଷରୋପଣ କରୁଛନ୍ତି।
ସମ୍ମିଳନୀରେ ସ୍ଥାୟୀତ୍ୱ ଉପରେ ପ୍ରଫେସର ଜାଓରକର, ପ୍ରଫେସର କାମିଆର ଏବଂ ସାମୁଦ୍ରିକ ବିଶେଷଜ୍ଞ କମାଣ୍ଡର ବିଶ୍ୱଜିତ ନାୟକଙ୍କୁ ନେଇ ଏକ ଗୁରୁତ୍ୱପୂର୍ଣ୍ଣ ପ୍ୟାନେଲ୍ ଆଲୋଚନା କରାଯାଇଥିଲା।
ଏହା ପରେ ଏକ ପୁରସ୍କାର ବିତରଣୀ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଭିନ୍ନ ଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ବ୍ୟକ୍ତିବିଶେଷ ଓ ଅନୁଷ୍ଠାନକୁ ସମ୍ମାନିତ କରାଯାଇଥିଲା।
ଡିଷ୍ଟିଙ୍ଗୁଇଶ୍ଡ ଓଭରସିଜ୍ ସିଟିଜେନ୍ଶିପ୍ ଆୱାର୍ଡ: ରମେଶ ଆରୋରା
ଗ୍ଲୋବାଲ ସାଉଥ୍ ସସ୍ଟେନେବିଲିଟି ଆୱାର୍ଡ: ଟାଇମ୍ ଫର୍ ଆଫ୍ରିକା
ଗ୍ଲୋବାଲ ସାଉଥ୍ ବିଜନେସ୍ ଲିଡରସିପ୍ ଆୱାର୍ଡ: ଜୀବନ ପରିଡା
ଆଉଟ୍ଷ୍ଟାଣ୍ଡିଂ କମ୍ୟୁନିଟି ଇମ୍ପାକ୍ଟ ଆୱାର୍ଡ: ଉତ୍ସବ, ଅରପିଙ୍ଗଟନ୍
ଓମେନ୍ ଏଣ୍ଟ୍ରିପ୍ରିନିଅର୍ ଲିଡରସିପ୍ ଆୱାର୍ଡ: କାରୁବାକୀ
ଇନ୍ସପାୟରିଂ ୟଙ୍ଗ ଟାଲେଣ୍ଟ ଆୱାର୍ଡ: ଆଶକା ସୁନୀଲ ଗୋୟଲ
କ୍ଲାଇମେଟ୍ ଚେଞ୍ଜ ଲିଡରସିପ୍ ଆୱାର୍ଡ (ୟୁକେ ଓ ୟୁରୋପ): ଆର୍ଥନେଷ୍ଟ
ଏକ୍ସିଲେନ୍ସ ଇନ୍ ସୋସିଆଲ୍ ସର୍ଭିସ୍ ଆୱାର୍ଡ: ଚିନୁ କିଶୋର
ଆଉଟ୍ଷ୍ଟାଣ୍ଡିଂ ୟୁକେ ବିଜନେସ୍ ଆୱାର୍ଡ – ଟେକ୍ନୋଲୋଜି ଓ ଇନୋଭେସନ୍: ଆଇଟି ବଜ୍ ଲିମିଟେଡ୍
ଡିଜିଟାଲ୍ ପାୟୋନିୟର୍ ଆୱାର୍ଡ – ସ୍କିଲ୍ସ ଡେଭଲପମେଣ୍ଟ: ଷ୍ଟେପ୍ ୮ ଅପ୍ ଲିମିଟେଡ୍
ଆଉଟ୍ଷ୍ଟାଣ୍ଡିଂ ୟୁକେ ବିଜନେସ୍ ଆୱାର୍ଡ – ଲାଇଫ୍ଷ୍ଟାଇଲ୍: ଭେଲ୍ କସ୍ମେଟିକ୍ସ
ଆଉଟ୍ଷ୍ଟାଣ୍ଡିଂ ୟୁକେ ବିଜନେସ୍ ଆୱାର୍ଡ – ମିଡିଆ: ପ୍ରିମିୟମ୍ ନ୍ୟୁଜ୍ ୱାୟାର
ଆଉଟ୍ଷ୍ଟାଣ୍ଡିଂ ୟୁକେ ବିଜନେସ୍ ଆୱାର୍ଡ – ଟ୍ରାଭେଲ୍: ଡ୍ରିମ୍ଲ୍ୟାଣ୍ଡ ଟ୍ରିପ୍ସ
ପରଦିନ, ବାଲିଯାତ୍ରା ଉତ୍ସବରେ ୫୦ରୁ ଅଧିକ ଜୀବନ୍ତ ଷ୍ଟଲ୍ରେ ସୁସ୍ୱାଦୁ ଖାଦ୍ୟ, ଅଳଙ୍କାର, ଜାତିଗତ ପୋଷାକ, ବହି ଏବଂ ୟୁକେ ଏବଂ ଆନ୍ତର୍ଜାତୀୟ ଅଂଶଗ୍ରହଣକାରୀଙ୍କ ହସ୍ତଶିଳ୍ପ ପ୍ରଦର୍ଶିତ ହୋଇଥିଲା। ପ୍ରାୟ ୨୬ଟି ସମ୍ପ୍ରଦାୟ ଏହି ଉତ୍ସବକୁ ସମର୍ଥନ କରିବା ସହ ଅଂଶଗ୍ରହଣ କରିଥିଲେ । ୬୦୦ରୁ ଅଧିକ ଲୋକ ଏହି ସାଂସ୍କୃତିକ ବାତାବରଣକୁ ଉପଭୋଗ କରିଥିଲେ। ଏହି କାର୍ଯ୍ୟକ୍ରମରେ ପ୍ରାମାଣିକ ଓଡ଼ିଆ ଖାଦ୍ୟ, ମେହେନ୍ଦୀ କଳା, ଫେସ୍ ପେଣ୍ଟିଂ ଏବଂ ବିଭିନ୍ନ କାର୍ଯ୍ୟକଳାପ ସାମିଲ ଥିଲା। ସାଂସ୍କୃତିକ କାର୍ଯ୍ୟକ୍ରମରେ ଓଡ଼ିଶୀ, ସମ୍ବଲପୁରୀ, ଛଉ ଏବଂ ବଲିଉଡ୍ ନୃତ୍ୟର ମନୋରମ ପରିବେଷଣ କରାଯାଇଥିଲା। ଲୋକପ୍ରିୟ ବଲିଉଡ୍ ଗାୟକ ଅସିତ ତ୍ରିପାଠୀ ତାଙ୍କ ଗୀତରେ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲେ ଏବଂ ପଞ୍ଜାବୀ ଢୋଲ୍ର ତାଳରେ ସମସ୍ତେ ନାଚିଥିଲେ। ବାଲିଯାତ୍ରା ଉତ୍ସବକୁ ୟୁକେ ଭିତ୍ତିକ ଓଡ଼ିଆ ଉଦ୍ୟୋଗୀ ତଥା ପରୋପକାରୀ କ୍ୟାପ୍ଟେନ ଅରୁଣ କରଙ୍କ ନେତୃତ୍ୱରେ ସଫଳ ଆୟୋଜନ କରାଯାଇଥିଲା।
