ନୂଆଦିଲ୍ଲୀ : ଲୋକସଭାରେ ରାହୁଲଙ୍କ ଖୋଲା ବିତର୍କ ଆହ୍ବାନଙ୍କୁ ଶାହଙ୍କ ପ୍ରତ୍ୟାଖ୍ୟାନ । ସ୍ୱତନ୍ତ୍ର ଭୋଟର ତାଲିକା ସଂଶୋଧନ ପ୍ରକ୍ରିୟା (SIR) ଏବଂ ନିର୍ବାଚନୀ ସଂସ୍କାର ଉପରେ ଚାଲିଥିବା ଆଲୋଚନା ସମୟରେ ରାହୁଲ ଗାନ୍ଧୀ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ‘ଭୋଟ ଚୋରି’ ଅଭିଯୋଗ ଉପରେ ଖୋଲା ବିତର୍କ ପାଇଁ ଆହ୍ୱାନ ଦେଇଥିଲେ। ରାହୁଲ ଗାନ୍ଧୀଙ୍କ ଆହ୍ୱାନକୁ ଅମିତ ଶାହ ସିଧାସଳଖ ପ୍ରତ୍ୟାଖ୍ୟାନ କରିବା ସହ କଡ଼ା ଜବାବ ଦେଇଥିଲେ। ଶାହ ଉଚ୍ଚ ସ୍ବରରେ କହିଥିଲେ “ମୁଁ କ’ଣ କହିବି ତାହା ମୁଁ ନିଜେ ନିଷ୍ପତ୍ତି ନେବି, ତାହା ଆପଣ ନେଇପାରିବେ ନାହିଁ। ମୋର ଭାଷଣର କ୍ରମ ଆପଣ ଧାର୍ଯ୍ୟ କରିପାରିବେ ନାହିଁ। ଆପଣ ଧୈର୍ଯ୍ୟ ଧରିବା ଶିଖନ୍ତୁ,” ବୋଲି ଶାହ କହିଥିଲେ।
ଦେଶରେ ଅନୁପ୍ରବେଶ ରୋକିବା ପାଇଁ SIR ଜରୁରୀ । ଏହି ପ୍ରକ୍ରିୟାର ଆବଶ୍ୟକତା ଉପରେ ଆଲୋକପାତ କରି ଶାହ କହିଥିଲେ ଯେ SIR ରେ ଅନୁପ୍ରବେଶକାରୀ ଓ ଅଯୋଗ୍ୟ ଭୋଟରଙ୍କ ନାମ ବାଦ୍ ଦିଆଯାଉଥିବାରୁ ଏହା ବିରୋଧୀ ଦଳର କିଛି ନେତାଙ୍କୁ ସହ୍ୟ ହେଉନାହିଁ। ବିରୋଧୀ ଦଳମାନେ କେବଳ ଭୋଟ ବ୍ୟାଙ୍କ ହ୍ରାସ ପାଇବା ଭୟରେ SIR କୁ ବିରୋଧ କରୁଛନ୍ତି, ଯାହାକି ଗ୍ରହଣୀୟ ନୁହେଁ। ଏହା ଦେଶ ପାଇଁ ମଙ୍ଗଳ ହେବ ନାହିଁ ।
ଏହାପରେ ରାହୁଲ ଗାନ୍ଧୀ ଉଠି ଚଳିତ ବର୍ଷ ବିଭିନ୍ନ ରାଜ୍ୟରେ ବିଜେପି ଓ ନିର୍ବାଚନ କମିସନଙ୍କ ମିଳିତ ଷଡ୍ଯନ୍ତ୍ରରେ ‘ଭୋଟ ଚୋରି’ ହୋଇଛି ବୋଲି ଅଭିଯୋଗ କରିଥିଲେ । ତାଙ୍କର ‘ଭୋଟ୍ ଚୋରି ସାମ୍ବାଦିକ ସମ୍ମିଳନୀ’ ଉପରେ ବିତର୍କ କରିବାକୁ ଶାହଙ୍କୁ ଆହ୍ୱାନ ଦେଇଥିଲେ। ଯାହାକୁ ନେଇ କିଛି ସମୟ ହଟ୍ଟଗୋଳ ହୋଇଥିଲା ।
ରାହୁଲଙ୍କ ଆକ୍ଷେପର ଜବାବ ଦେବା ଅବସରରେ ଶାହ କଂଗ୍ରେସର ପୂର୍ବ ନେତୃତ୍ୱକୁ ନିଶାଣ କରିଥିଲେ। ସେ କହିଥିଲେ ଯେ ରାହୁଲଙ୍କ ‘ହାଇଡ୍ରୋଜେନ୍ ବୋମା’ ଓ ‘ଭୋଟ ଚୋରି’ କଥା କେବଳ ଦେଶରେ ବିଭ୍ରାନ୍ତି ସୃଷ୍ଟି କରିବା ପାଇଁ କହୁଛନ୍ତି । ଏହି ସମୟରେ ଶାହ କଂଗ୍ରେସ ଦଳର ଐତିହାସିକ ‘ଭୋଟ ଚୋରି’ର ତିନୋଟି ଉଦାହରଣ ଉପସ୍ଥାପନ କରିଥିଲେ।
ଅମିତ ଶାହ ଲୋକସଭାରେ କଂଗ୍ରେସର ପୂର୍ବତନ ନେତୃତ୍ୱକୁ ନିଶାଣ କରିଥିଲେ । ୧୯୭୫ ମସିହାରେ ଜରୁରୀକାଳୀନ ପରିସ୍ଥିତି କୁ ନେଇ ଶାହ କଂଗ୍ରେସକୁ ଟାର୍ଗେଟ କରିଥିଲେ । ଜରୁରୀକାଳୀନ ପରିସ୍ଥିତି ଘୋଷଣା କରି ଇନ୍ଦିରା ଗାନ୍ଧୀ ସରକାର ସମସ୍ତ ଗଣତାନ୍ତ୍ରିକ ଅଧିକାରକୁ କ୍ଷୁଣ୍ଣ କରିଥିଲେ। ଶାହଙ୍କ ଅନୁଯାୟୀ, ଗଣତାନ୍ତ୍ରିକ ପ୍ରକ୍ରିୟାକୁ ଏକପ୍ରକାର ନିଲମ୍ବିତ କରିବା ଏବଂ ବିରୋଧୀଙ୍କୁ ବନ୍ଦୀ କରି ରଖିବା ‘ଭୋଟ୍ ଚୋରି’ର ସବୁଠୁ ବଡ଼ ଐତିହାସିକ ଉଦାହରଣ। କାରଣ ଏହା ମାଧ୍ୟମରେ ସେତେବେଳେ ଜନମତକୁ ଦମନ କରାଯାଇଥିଲା।
ଏହା ପରେ ଶାହ କହିଥିଲେ ଯେ ୧୯୮୭ ଜାମ୍ମୁ ଓ କାଶ୍ମୀର ନିର୍ବାଚନରେ ଅନିୟମିତତା ହୋଇଥିଲା । ୧୯୮୭ ମସିହାରେ ଜାମ୍ମୁ ଓ କାଶ୍ମୀରରେ ହୋଇଥିବା ବିଧାନସଭା ନିର୍ବାଚନରେ କଂଗ୍ରେସ ଏବଂ ନ୍ୟାସନାଲ କନଫରେନ୍ସ ମିଳିତ ଭାବେ କ୍ଷମତାକୁ ଆସିଥିଲେ। କିନ୍ତୁ ଏହି ନିର୍ବାଚନରେ ବ୍ୟାପକ ରିଗିଂ ଓ ଅନିୟମିତତା ହୋଇଥିବା ଅଭିଯୋଗ ହୋଇଥିଲା। ଶାହଙ୍କ ଯୁକ୍ତି ହେଉଛି, ଏହି ନିର୍ବାଚନ ମାଧ୍ୟମରେ କାଶ୍ମୀର ଲୋକଙ୍କର ଗଣତନ୍ତ୍ର ଉପରୁ ବିଶ୍ୱାସ ତୁଟିଗଲା, ଯାହା ପରବର୍ତ୍ତୀ ସମୟରେ ଉଗ୍ରବାଦକୁ ଜନ୍ମ ଦେବାରେ ସହାୟକ ହେଲା। ଏହା କଂଗ୍ରେସ ସମୟର ‘ଭୋଟ ଚୋରି’ର ଏକ ବଡ଼ ଉଦାହରଣ।
ତୃତୀୟ ଉଦାହରଣ ଦେଇ ଶାହ କହିଥିଲେ, ୧୯୫୦ ଦଶକରେ ନିର୍ବାଚନ କମିସନରଙ୍କ ନିଯୁକ୍ତିରେ କ୍ଷମତାର ଅପବ୍ୟବହାର ନେହରୁଙ୍କ ସମୟରେ କରାଯାଉଥିଲା । ଶାହ ଇସାରା ଦେଇ କହିଥିଲେ ଯେ ସ୍ୱାଧୀନତା ପରବର୍ତ୍ତୀ ପ୍ରାରମ୍ଭିକ ବର୍ଷଗୁଡ଼ିକରେ , ନେହରୁଙ୍କ ସମୟରେ କଂଗ୍ରେସ ନିର୍ବାଚନ କମିସନଙ୍କ ନିଯୁକ୍ତିରେ କ୍ଷମତାର ଅପବ୍ୟବହାର କରିଥିଲା । ଯାହା ସାମ୍ବିଧାନିକ ସଂସ୍ଥାଗୁଡ଼ିକୁ କବ୍ଜା କରିବା ଦିଗରେ ପ୍ରଥମ ପଦକ୍ଷେପ ଥିଲା। ଯଦିଓ ଏହି ଉଦାହରଣ ନିର୍ଦ୍ଦିଷ୍ଟ ନିର୍ବାଚନର ‘ଭୋଟ୍ ଚୋରି’ ନୁହେଁ, ଏହା ନିର୍ବାଚନୀ ପ୍ରକ୍ରିୟାକୁ ପ୍ରଭାବିତ କରିବାର ଉଦାହରଣ ଥିଲା।
ଶାହ ଏହି ତିନୋଟି ଉଦାହରଣ ଦେଇ ଯୁକ୍ତି ବାଢ଼ିଥିଲେ ଯେ ବିଜେପି ଉପରେ ‘ଭୋଟ୍ ଚୋରି’ର ଅଭିଯୋଗ ଆଣିବା ପୂର୍ବରୁ କଂଗ୍ରେସକୁ ନିଜ ଦଳର ଐତିହାସିକ ଭୁଲ୍ ଗୁଡ଼ିକୁ ମନେ ପକାଇବା ଉଚିତ। ରାହୁଲଙ୍କ ‘ଖୋଲା ବିତର୍କ’ ଆହ୍ୱାନକୁ ଶାହଙ୍କ ପ୍ରତ୍ୟାଖ୍ୟାନ ଓ ପରସ୍ପର ଉପରେ ଐତିହାସିକ ତଥ୍ୟ ଆଧାରରେ ଆକ୍ଷେପ ଯୋଗୁଁ ଗୃହରେ ସରଗରମ ପରିବେଶ ସୃଷ୍ଟି ହୋଇଥିଲା।
