6 ବର୍ଷର ପୁଅକୁ ହୋଟେଲରେ ଛାଡ଼ି ପଳାଇଲା ମାଆ, ତାପରେ…

ଚୀନର ଜେଙ୍ଗଝୌ ସହରର ଏକ ହୋଟେଲରେ ଏକ ଛୋଟ ପିଲାର କାହାଣୀ ସମଗ୍ର ଦେଶର ହୃଦୟକୁ ସ୍ପର୍ଶ କରିଛି। ଛ’ ବର୍ଷର ଛୋଟ ଚେଙ୍ଗଚେଙ୍ଗ୍ ଦୁଇ ସପ୍ତାହରୁ ଅଧିକ ସମୟ ହୋଟେଲ କୋଠରୀରେ ଏକାକୀ ରହିଲା। ତା’ର ମା’ ତାକୁ ଛାଡ଼ି ଯାଇଥିଲେ। କିନ୍ତୁ ଏହି କଷ୍ଟକର ସମୟରେ ହୋଟେଲର କର୍ମଚାରୀମାନେ ତା’ର ପରିବାର ପରି ଯତ୍ନ ନେଲେ।

ପୁରା ଘଟଣାରୁ ପ୍ରକାଶଯେ, ଫେବୃଆରୀ ମାସରେ ଚେଙ୍ଗଚେଙ୍ଗ୍ ତା’ର ୨୫ ବର୍ଷୀୟ ମା’ ସହ ହୋଟେଲରେ ରହିବାକୁ ଆସିଥିଲା। ପ୍ରଥମେ ମା’ ବାହାରକୁ ଯାଇ ଫେରି ଆସୁଥିଲେ, କିନ୍ତୁ ମାର୍ଚ୍ଚ ମାସରେ ସେ ହଠାତ୍ ଅଦୃଶ୍ୟ ହୋଇଗଲେ। ଛୋଟ ଚେଙ୍ଗଚେଙ୍ଗ୍ କୋଠରୀରେ ଏକାକୀ ରହିଲା। ସେ କେବଳ କ୍ଲିନିଂ ଷ୍ଟାଫ୍‌ଙ୍କ ସହ କଥା ହେଉଥିଲା, ସେମାନଙ୍କୁ ଆଲିଙ୍ଗନ ମାଗୁଥିଲା ଏବଂ ଝରକା ପାଖରେ ବସି ବାହାରକୁ ଚାହୁଁଥିଲା।

ହୋଟେଲ କର୍ମଚାରୀମାନେ ଏହି ନିରୀହ ପିଲାକୁ ଦେଖି ଅସହାୟ ହୋଇ ପଡ଼ିଲେ। ସେଠି କାମକରୁଥିବା ଜଣେ ଆୟା ତା’ର ବିଶେଷ ଯତ୍ନ ନେଲେ – ଖାଦ୍ୟ କିଣି ଦେଉଥିଲେ, ତାସହ ଖେଳୁଥିଲେ ଏବଂ ପ୍ରତିଦିନ ତା’ ସହ ସମୟ କଟାଉଥିଲେ। ଚେଙ୍ଗଚେଙ୍ଗ୍ ଥରେ କୋଠରୀର ସ୍ମାର୍ଟ ସ୍ପିକର୍‌କୁ ପଚାରିଥିଲା, “ତୁମର ମା’ ବାପା ଅଛନ୍ତି କି?” ଏବଂ କହିଥିଲା, “ମୁଁ ମୋ ମା’କୁ ଫେରି ଆସିବାକୁ ଚାହୁଁଛି।”

ଦୁଇ ସପ୍ତାହରୁ ଅଧିକ ସମୟ ପରେ ମାର୍ଚ୍ଚ ୨୪ ତାରିଖରେ ମା’ ଫେରି ଆସିଲେ। ଚେଙ୍ଗଚେଙ୍ଗ୍ ତା’କୁ ଦେଖି କହିଲା, “ମା’, ମୁଁ ତୁମ ଉପରେ ରାଗୁ ନାହିଁ। ମୁଁ ଏକ ଛୋଟ ପିଲା ଏବଂ ନିଜର ଯତ୍ନ ନେଇପାରେ।” ଏହି କଥା ଶୁଣି ଆୟା ଆଖିରୁ ଲୁହ ବାହାରିଆସିଲା। ହୋଟେଲ ଷ୍ଟାଫ୍ ମା’ଙ୍କୁ କହିଲେ, “ଆଗକୁ ଚେଙ୍ଗଚେଙ୍ଗ୍‌କୁ ଛାଡ଼ି ଯାଅ ନାହିଁ। ଯଦି ଆସିବ, ତୁମେ ମାଗଣାରେ ରହିପାରିବ।”ଏହି ଘଟଣା ଚୀନରେ ଭାଇରାଲ୍ ହୋଇଛି। ଏହା ପିଲାଙ୍କ ଯତ୍ନ, ମା’ଙ୍କ ଦାୟିତ୍ୱ ଏବଂ ଅଜଣା ଲୋକଙ୍କ ଭଲପାଇବା ଉପରେ ବଡ଼ ବୟାନ ଦେଇଛି। ଛୋଟ ଚେଙ୍ଗଚେଙ୍ଗ୍ ଆଜି ମା’ଙ୍କ ସହ ଘରକୁ ଫେରିଛି, କିନ୍ତୁ ହୋଟେଲ କର୍ମଚାରୀଙ୍କ ଆଦର ଏବଂ ଯତ୍ନର ସ୍ମୃତି ତା’ର ହୃଦୟରେ ସବୁଦିନ ପାଇଁ ରହିବ।