ଘରୁ ଟଙ୍କା ମିଳିବାର ବର୍ଷେ ପରେ ଇସ୍ତଫା ଦେଲେ ଜଷ୍ଟିସ ଯଶୱନ୍ତ ବର୍ମା

ଦିଲ୍ଲୀ ହାଇକୋର୍ଟର ପୂର୍ବତନ ନ୍ୟାୟାଧୀଶ ଯଶୱନ୍ତ ବର୍ମାଙ୍କ ଘରୁ ବିପୁଳ ପରିମାଣର ଟଙ୍କା ଉଦ୍ଧାର ଘଟଣାର ପ୍ରାୟ ଏକ ବର୍ଷ ପରେ ସେ ଇସ୍ତଫା ଦେଇଛନ୍ତି। ଏହି ଇସ୍ତଫା ବିବାଦୀୟ ପରିସ୍ଥିତି ମଧ୍ୟରେ ଆସିଥିବାରୁ ବିଚାରପତିଙ୍କ ଉତ୍ତରଦାୟିତ୍ୱ ନେଇ ପୁଣି ପ୍ରଶ୍ନ ଉଠିଛି।

୨୦୨୫ ମାର୍ଚ୍ଚ ୧୪ ତାରିଖରେ ଦିଲ୍ଲୀର ତୁଘଲକ୍ କ୍ରେସେଣ୍ଟସ୍ଥିତ ନ୍ୟାୟାଧୀଶ ବର୍ମାଙ୍କ ବାସଭବନରେ ଲାଗିଥିବା ଅଗ୍ନିକାଣ୍ଡ ସମୟରେ ଅଗ୍ନିଶମ ବାହିନୀ ଓ ପୋଲିସ୍ ଏକ ଭଣ୍ଡାର ଘରୁ ଅନେକ ପୋଡ଼ିଯାଇଥିବା ଓ ଅଧାପୋଡ଼ା ଟଙ୍କା ଉଦ୍ଧାର କରିଥିଲେ। ଏହି ଘଟଣା ପରେ ସୁପ୍ରିମ୍ କୋର୍ଟ ଏକ ଇନ୍-ହାଉସ୍ ତଦନ୍ତ କମିଟି ଗଠନ କରିଥିଲେ । କମିଟି ରିପୋର୍ଟରେ ନ୍ୟାୟାଧୀଶ ବର୍ମାଙ୍କ ଉପରେ ଅଭିଯୋଗର ଯଥେଷ୍ଟ ପ୍ରମାଣ ମିଳିଥିବା ଜଣାପଡ଼ିଥିଲା।ଏହା ପରେ ନ୍ୟାୟାଧୀଶଙ୍କୁ ଇସ୍ତଫା ଦେବାକୁ ପରାମର୍ଶ ଦିଆଯାଇଥିଲା ଏବଂ ତାଙ୍କ କାର୍ଯ୍ୟ ପ୍ରତ୍ୟାହାର କରାଯାଇଥିଲା।

କିନ୍ତୁ ସେ ଇସ୍ତଫା ଦେବାକୁ ମନା କରିଥିଲେ। ଫଳରେ ଇମ୍ପିଚମେଣ୍ଟ ପ୍ରକ୍ରିୟା ଆରମ୍ଭ ହୋଇଥିଲା ଏବଂ ଲୋକସଭା ସ୍ପିକର୍ ଏକ ତଦନ୍ତ କମିଟି ଗଠନ କରିଥିଲେ। ସୁପ୍ରିମ୍ କୋର୍ଟ ମଧ୍ୟ ନ୍ୟାୟାଧୀଶ ବର୍ମାଙ୍କ ଆବେଦନ ଖାରଜ କରି ଇମ୍ପିଚମେଣ୍ଟ ପ୍ରକ୍ରିୟାକୁ ସମର୍ଥନ କରିଥିଲେ।

ଏହି ପରିପ୍ରେକ୍ଷୀରେ ନ୍ୟାୟାଧୀଶ ଯଶୱନ୍ତ ବର୍ମା ଏବେ ଇସ୍ତଫା ଦେଇଛନ୍ତି। ଏହା ଦ୍ୱାରା ସଂସଦରେ ଇମ୍ପିଚମେଣ୍ଟ ପ୍ରକ୍ରିୟା ସ୍ଥଗିତ ହୋଇପାରେ। କିନ୍ତୁ ଏହି ଘଟଣା ବିଚାରପତିଙ୍କ ନୈତିକତା ଓ ଉତ୍ତରଦାୟିତ୍ୱ ନେଇ ପୁଣି ଥରେ ବିତର୍କ ଆରମ୍ଭ କରିଛି।ନ୍ୟାୟାଧୀଶଙ୍କ ଇସ୍ତଫା ପରେ ପରବର୍ତ୍ତୀ ପଦକ୍ଷେପ କ’ଣ ହେବ ତାହା ଏବେ ଦେଖିବାକୁ ବାକି ରହିଛି। ଏହି ଘଟଣା ବିଚାର ବ୍ୟବସ୍ଥାର ସ୍ୱଚ୍ଛତା ଓ ବିଶ୍ୱାସଯୋଗ୍ୟତା ଉପରେ ପ୍ରଶ୍ନ ଉଠାଇଛି।