କାଟ ଖାଇଲା ମହିଳା ସଂରକ୍ଷଣ ବିଲ୍…ମିଳିଲା ନାହିଁ ଆବଶ୍ୟକ ଭୋଟ, ଆଗକୁ କଣ ହେବ ?

ମହିଳା ସଂରକ୍ଷଣ ସମ୍ବନ୍ଧୀୟ ସମ୍ବିଧାନ ସଂଶୋଧନ ବିଲ୍ ଲୋକସଭାରେ କାଟ ଖାଇଯାଇଛି। କେନ୍ଦ୍ର ସରକାରଙ୍କୁ ଏହି ସମ୍ବିଧାନ (୧୩୧ତମ ସଂଶୋଧନ) ବିଲ୍, ୨୦୨୬ ପାସ୍ କରିବା ପାଇଁ ଦୁଇ-ତୃତୀୟାଂଶ ସଂଖ୍ୟାଗରିଷ୍ଠତା ଦରକାର ଥିଲା, କିନ୍ତୁ ସରକାର ସେହି ସଂଖ୍ୟା ପୂରଣ କରିପାରିଲେ ନାହିଁ।

ଶୁକ୍ରବାର ଦିନ ଲୋକସଭାରେ ଭୋଟିଙ୍ଗ୍ ହୋଇଥିଲା। ଏହି ବିଲ୍ ସପକ୍ଷରେ ୨୯୮ ଜଣ ସାଂସଦ ଭୋଟ୍ ଦେଇଥିବା ବେଳେ ବିରୋଧରେ ୨୩୦ ଜଣ ଭୋଟ୍ ଦେଇଥିଲେ। ସମ୍ବିଧାନ ସଂଶୋଧନ ବିଲ୍ ପାସ୍ ହେବା ପାଇଁ ଉପସ୍ଥିତ ଓ ଭୋଟ୍ ଦେଉଥିବା ସଭ୍ୟଙ୍କ ମଧ୍ୟରୁ ଦୁଇ-ତୃତୀୟାଂଶ ସମର୍ଥନ ଆବଶ୍ୟକ ଥିଲା। ପ୍ରାୟ ୫୨୮ ଜଣ ସାଂସଦ ଭୋଟିଙ୍ଗ୍ରେ ଭାଗ ନେଇଥିଲେ ଏବଂ ଏଥିପାଇଁ କମ୍ ସେ କମ୍ ୩୫୨ ଭୋଟ୍ ଦରକାର ଥିଲା, ଯାହା ମିଳିଲା ନାହିଁ।

ଏହି ବିଲ୍ ମହିଳା ସଂରକ୍ଷଣ ଆଇନ୍ (ନାରୀ ଶକ୍ତି ବନ୍ଦନ ଅଧିନିୟମ୍)କୁ କାର୍ଯ୍ୟକାରୀ କରିବା ପାଇଁ ଡିଲିମିଟେସନ୍ (ଆସନ ପୁନର୍ବିନ୍ୟାସ) ସହିତ ଜଡ଼ିତ ଥିଲା। ଏହା ଲୋକସଭା ଓ ରାଜ୍ୟ ବିଧାନସଭାରେ ମହିଳାଙ୍କ ପାଇଁ ଏକ-ତୃତୀୟାଂଶ ଆସନ ସଂରକ୍ଷିତ କରିବାକୁ ଲକ୍ଷ୍ୟ ରଖିଥିଲା ଏବଂ ୨୦୨୯ ନିର୍ବାଚନ ପାଇଁ ଏହାକୁ କାର୍ଯ୍ୟକାରୀ କରିବାର ପ୍ରସ୍ତାବ ଥିଲା।ବିଲ୍ ବିଫଳ ହେବା ପରେ ଡିଲିମିଟେସନ୍ ଓ ଲୋକସଭା ଆସନ ସଂଖ୍ୟା ବୃଦ୍ଧି ସମ୍ବନ୍ଧୀୟ ଅନ୍ୟ ଦୁଇଟି ବିଲ୍ ମଧ୍ୟ ଭୋଟ୍ ପାଇଁ ଉପସ୍ଥାପିତ ହେଲା ନାହିଁ।

ସରକାର କହିଛନ୍ତି ଯେ ଏହି ତିନୋଟି ବିଲ୍ ପରସ୍ପର ସହିତ ଜଡ଼ିତ। ବିରୋଧୀ ଦଳଗୁଡ଼ିକ ଏହି ପ୍ରସ୍ତାବକୁ ବିରୋଧ କରିଥିଲେ ଏବଂ ଡିଲିମିଟେସନ୍ ପ୍ରକ୍ରିୟାକୁ ମହିଳା ସଂରକ୍ଷଣ ସହିତ ଯୋଡ଼ିବାକୁ ନିନ୍ଦା କରିଥିଲେ। ସରକାରଙ୍କ ପକ୍ଷରୁ କହାଯାଇଛି ଯେ ମହିଳାଙ୍କ ପ୍ରତିନିଧିତ୍ୱ ବଢ଼ାଇବା ପାଇଁ ଏହା ଏକ ପ୍ରୟାସ ଥିଲା।ଏହି ବିଫଳତା ପରେ ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି ଏବଂ ମହିଳା ସଂରକ୍ଷଣ ଆଇନ୍ କେବେ କାର୍ଯ୍ୟକାରୀ ହେବ ତାକୁ ନେଇ ପ୍ରଶ୍ନ ଉଠିଛି।