ଗତ କିଛି ଦିନ ଧରି ବିଜେଡି ଉପରେ ଅସନ୍ତୋଷ ପ୍ରକାଶ କରୁଛନ୍ତି ଶ୍ରୀମୟୀ ମିଶ୍ର । ଯାହାକୁ ନେଇ ଦଳ ତାଙ୍କ ଉପରେ କିଛି କାର୍ଯ୍ୟାନୁଷ୍ଠାନ ଗ୍ରହଣ କରିପାରେ ବୋଲି ଚର୍ଚା ହେଉଛି । ଏହାରି ଭିତରେ ଶୀମୟୀଙ୍କ ସପକ୍ଷରେ ବାହାରିଛନ୍ତି ରାଜ୍ୟସଭା ସାଂସଦ ତଥା କଟକ-ବାରବାଟୀ ନିର୍ବାଚନମଣ୍ଡଳୀର ପୂର୍ବତନ ବିଧାୟକ ଦେବାଶିଷ ସାମନ୍ତରାୟ । ଶ୍ରୀମୟୀଙ୍କ କଟାକ୍ଷକୁ ନେଇ ସେ କହିଛନ୍ତି ଯେଉଁମାନେ ଦଳର ଭଲ ପାଇଁ କହୁଛନ୍ତି ତାଙ୍କ କଥା ଦଳ ଚିନ୍ତା କରିବା ଦରକାର । ଶ୍ରୀମୟୀଙ୍କ ସପକ୍ଷରେ ବାହାରିବା ସହ ଦେବାଶିଷ କହିଛନ୍ତି ଯେ ଶ୍ରୀମୟୀଙ୍କୁ ଦଳ ଅଣଦେଖା କରିଛି । ଶ୍ରୀମୟୀ ଦଳପାଇଁ ଅନେକ କାମ କରିଛନ୍ତି । ଦଳକୁ ନେଇ ଶ୍ରୀମୟୀ ଯେତେବେଳେ ଯାହା କହିଛନ୍ତି ଠିକ୍ କହିଛନ୍ତି । ଦେବାଶିଷ ଆହୁରି କହିଛନ୍ତି ଯେ ଦଳ ତାଙ୍କୁ ଟିକେଟ ଦେବାକୁ କହି ଟିକେଟ ଦେଲାନାହିଁ । ଦଳ ବିରୋଧରେ ମୁହଁ ଖୋଲିଲେ କିଛି ଅସୁବିଧା ନାହିଁ । ଏଭଳି ନେତାଙ୍କ ଉପରେ ଆକ୍ସନ ନେବା ଠିକ୍ ନୁହେଁ ।
ଦେବାଶିଷ ଆହୁରି କହିଛନ୍ତି ଯେ ପ୍ରଫୁଲ୍ଲ ମଲ୍ଲିକ, ଭାସ୍କର ରାଓ ସୁବିଧାବାଦୀ ନେତା ନୁହଁନ୍ତି । ସେମାନେ ଦଳ ପାଇଁ ଅନେକ କାର୍ଯ୍ୟ କରିଛନ୍ତି । ପ୍ରଫୁଲ୍ଲ ମଲ୍ଲିକ ଜଣେ ବରିଷ୍ଠ ନେତା, ବିଜେଡି ପାଇଁ ସେ ପରିଶ୍ରମ କରିଛନ୍ତି । ପ୍ରଫୁଲ୍ଲ ମଲ୍ଲିକଙ୍କୁ ଦଳରୁ ସସ୍ପେଣ୍ଡ କରିବା ଭୁଲ ନିଷ୍ପତ୍ତି । ଭାସ୍କର ରାଓ ଭଳି ପୁରୁଖା ନେତା ବିଜେଡି ଛାଡି ଚାଲି ଯାଇଛନ୍ତି । ଯାହା ଦଳକୁ ଅନେକ କ୍ଷତି ପହଞ୍ଚାଇପାରେ । ସମସ୍ତଙ୍କ କଥା ଦଳ ଶୁଣିବା କଥା । ମତେ ଦଳ ଯାହା କୁହେ ମୁଁ ଶୁଣେ । ମତେ କେବେ ବି ଦଳରେ ଅଣଦେଖା କରାଯାଇନାହିଁ କହିଛନ୍ତି ଦେବାଶିଷ ସାମନ୍ତରାୟ ।
ସେପଟେ ଦେବାଶିଷଙ୍କ ଏଭଳି ବୟାନ ଉପରେ ପ୍ରତିକ୍ରିୟା ରଖିଛନ୍ତି ବିଜେଡି ବିଧାୟିକା ତଥା ଦଳର ବରିଷ୍ଠ ନେତ୍ରୀ ପ୍ରମିଳା ମଲ୍ଲିକ । ପ୍ରମିଳା କହିଛନ୍ତି ଯେ କ୍ଷମତା ଉପଭୋଗ ପରେ ବୟାନବାଜି କରିବା ଦୁର୍ଭାଗ୍ୟଜନକ । ଦେବାଶିଷ ସାମନ୍ତରାୟ ବାରମ୍ବାର ଦଳ ବିରୋଧୀ ମନ୍ତବ୍ୟ ଦେଉଛନ୍ତି । ଦଳରେ କିଏ କଣ କରୁଛି ତାହା ଶୃଙ୍ଖଳା କମିଟି ଦେଖୁଛି । ଏ ବିଷୟରେ ଦଳର ସଭାପତି ମଧ୍ୟ ଅବଗତ ଅଛନ୍ତି । ସମସ୍ତେ ଦଳର ଶୃଙ୍ଖଳା ମାନି କାମ କରିବା ଉଚିତ । ଦଳ ବଡ଼ ବୋଲି ପ୍ରମିଳା ମଲ୍ଲିକ କହିଛନ୍ତି ।
