ବରିଷ୍ଠ ଆଇନଜୀବୀ ତଥା ଭାଜପା ନେତା ପୀତବାସ ପଣ୍ଡା ହତ୍ୟା ମାମଲାକୁ ନେଇ ରାଜନୀତି ସରଗରମ ରହିଛି । ଏହି ମାମଲାକୁ ନେଇ ବିଜେଡି-ବିଜେପି ଭିତରେ ବୟାନବାଜି ଚାଲିଛି । ହତ୍ୟା ଷଡ଼ଯନ୍ତ୍ର ମାମଲାରେ ବ୍ରହ୍ମପୁରର ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କୁ ଗିରଫ ପରେ ବିଜେଡି ଏହାକୁ ରାଜନୈତିକ ଉଦ୍ଦେଶ୍ୟ ଥିବା ଅଭିଯୋଗ କରିଛି। ଅନ୍ୟପକ୍ଷେ, ବିକ୍ରମଙ୍କ ପାଇଁ ୪୪ ଜଣ ଓକିଲ କୋର୍ଟରେ ମାମଲା ଲଢ଼ିବେ ବୋଲି ସୂଚନା ମିଳିଛି। ସେମାନେ ଲଢ଼ିବା ପାଇଁ କୋର୍ଟରେ ନିଜର ଦାବିପତ୍ର ଦାଖଲ କରିଛନ୍ତି। ଏହି ଓକିଲମାନେ କର୍ପୋରେଟର ମଳୟ ବିଷୋୟୀ ଓ ବିଜେଡି ନେତା ମଦନ ଦଳେଇଙ୍କ ପାଇଁ ମଧ୍ୟ ମାମଲା ଲଢ଼ିବେ। ସେମାନଙ୍କ ଜାମିନ ଆବେଦନ ବେଳେ ଏହି ଓକିଲମାନେ ବିକ୍ରମ ପଣ୍ଡାଙ୍କ ପାଇଁ ବଳିଷ୍ଟ ଯୁକ୍ତି ରଖିବେ । ତେବେ ସରକାରୀ ଓକିଲ କିପରି ଷଡ଼ଯନ୍ତ୍ର କରିବାର ଯୁକ୍ତି ରଖୁଛନ୍ତି ତାହା ଉପରେ ବିଚାରପତିଙ୍କ ନିଷ୍ପତ୍ତି ନିର୍ଭର କରିବ ।
ଏଠାରେ ସୂଚନାଯୋଗ୍ୟ ଯେ ଅକ୍ଟୋବର ୬ରେ ପୀତବାସଙ୍କୁ ଗୁଳିକରି ହତ୍ୟା କରାଯାଇଥିଲା। ଷଡ଼ଯନ୍ତ୍ରରେ ବିକ୍ରମ ପଣ୍ଡା, ପୂର୍ବତନ ମେୟର ଶିବ ଶଙ୍କର ଦାଶ (ପିଣ୍ଟୁ) ସମେତ ୧୨ ଜଣଙ୍କୁ ପୋଲିସ ଗିରଫ କରିଛି। ଏସପି ଡା. ସର୍ବଣା ବିବେକ ଏମ୍. କହିଛନ୍ତି, ହତ୍ୟା ପଛରେ ରାଜନୈତିକ, ବ୍ୟବସାୟିକ ଓ ବ୍ୟକ୍ତିଗତ ଶତ୍ରୁତା ମୁଖ୍ୟ କାରଣ ରହିଛି।
ବିକ୍ରମଙ୍କ ସହଯୋଗୀ ସୁନୀଲ ଏବଂ ସୁଦର୍ଶନକୁ ମଧ୍ୟ ଗିରଫ କରିଛି ପୋଲିସ ଗିରଫଦାରୀ ସଂଖ୍ୟା ୧୩କୁ ବଢ଼ିଛି। ତିନିଜଣ ଅଭିଯୁକ୍ତ ଫେରାର ଅଛନ୍ତି। ସେପଟେ ମାମଲାକୁ ସିବିଆଇକୁ ହସ୍ତାନ୍ତର କରିବାକୁ ମୁଖ୍ୟମନ୍ତ୍ରୀ ନିର୍ଦେଶ ଦେଇଛନ୍ତି । ମାମଲାରେ କିଛି ଅପରାଧି ରାଜ୍ୟ ବାହାରର ହୋଇଥିବାରୁ ସିବିଆଇକୁ ମାମଲା ଦିଆଯାଇଥିବା ବିଜେପି କହିଛି ।
ସେଦିନ ଥିଲା ୨୦୨୫ ଅକ୍ଟୋବର ୬ ତାରିଖ । କୁମାର ପୂର୍ଣ୍ଣିମା ରାତି ୧୦ଟାରେ ପୀତବାସ ପଣ୍ଡା ତାଙ୍କ ଚାମ୍ବରରୁ ଘରକୁ ଫେରିବା ବାଟରେ କିଛି ଖାଇବା ଜିନିଷ ନେଇ ଫେରୁଥିଲେ । ହଠାତ ତାଙ୍କ ସ୍କୁଟି ଆଗରେ ଦୁଇଜଣ ଅଜ୍ଞାତ ବ୍ୟକ୍ତି ତାଙ୍କୁ ଅଟକାଇଲେ । ପରିଚୟ ମାଗିଲେ । ନମସ୍କାର କରିବା ପରେ ଆତତାୟୀମାନେ ତାଙ୍କୁ ଗଳିମାରି ଫେରାର ହୋଇଯାଇଥିଲେ । ସେ ତଳେ ପଡ଼ିଯାଇ ଚିତ୍କାର କରିବା ବେଳେ ପାଖରେ ଥିବା ଲୋକ ତାଙ୍କୁ ମେଡିକାଲ ନେଇଥିଲେ । ସେତେବେଳକୁ ତାଙ୍କର ମୃତ୍ୟୁ ହୋଇଯାଇଥିଲା । ବୈଦନାଥପୁର ଥାନାରେ ମାମଲା ରୁଜୁ ପରେ ଅପରାଧିଙ୍କୁ ଧରିବା ପାଇଁ ପୁଲିସ୍ ୬ଟି ଟିମ୍ ଗଠନ କରି ତଦନ୍ତ କରିଥିଲା । ପୀତବାସଙ୍କ ଅଫିସରୁ ଘର ପର୍ଯ୍ୟନ୍ତ ରାସ୍ତାର ସବୁ ସିସିଟିଭି ଯାଞ୍ଚ କରାଯାଇଥିଲା । ସିସିଟିଭି ଫୁଟେଜରୁ କିଛି ଅଜଣା ବ୍ୟକ୍ତି ପୀତବାସ ପଣ୍ଡାଙ୍କ ଯିବା ଆସିବା ରାସ୍ତାରେ ରେକି କରୁଥିବା ଜଣାପଡ଼ିଥିଲା । ସେପ୍ଟେମ୍ବର ୧୦ରୁ ସେପ୍ଟେମ୍ବର ୧୪ ପର୍ଯ୍ୟନ୍ତ ରେକି କରୁଥିବା ଶିଶୁପାଳ କୁମାର ପାଶୱାନ, କୁନ୍ଦନ କୁମାର, ବିପିନ ସ୍ୱାଇଁ ଓ ସୀମାଞ୍ଚଳ ନାୟକଙ୍କୁ ଚିହ୍ନଟ ପରେ ପୁଲିସର ତଦନ୍ତ ଆଗକୁ ବଢ଼ିଥିଲା । ଉମା ଶଙ୍କର ବିଷୋୟୀ ଓ ଯୋଗେନ୍ଦ୍ର ରାଉତ ଏହି ୪ ଅପରାଧିଙ୍କୁ ବ୍ରହ୍ମପୁର ଡକାଇଥିଲେ । ଏହି ୪ ଅପରାଧି ମଳୟ ବିଷୋୟୀଙ୍କ ନିର୍ଦ୍ଦେଶରେ ଅଳକାପୁରୀର ଶୂନ୍ୟ ଚନ୍ଦ୍ର ଦାସଙ୍କ ଭଡ଼ା ଘରେ ରହୁଥିଲେ । ଶୂନ୍ୟଚନ୍ଦ୍ରଙ୍କୁ ମଳୟ କହିଥିଲେଯେ, ସେମାନେ ହସପିଟାଲ କାମରେ ଆସିଛନ୍ତି । ତେବେ ବିହାରର ଦୁଇ ଜଣଙ୍କୁ ଦେଖିବା ପରେ ମଳୟଙ୍କୁ ଶୂନ୍ୟଚନ୍ଦ୍ର ପ୍ରଶ୍ନ କରିଥିଲେ । ତେବେ ମେଡ଼ିକାଲ ଚିକିତ୍ସା ପାଇଁ ସେମାନେ ଏଠାରେ ରହିବେ ବୋଲି ସେ ବୁଝାଇ ଦେଇଥିଲେ । ସେପ୍ଟେମ୍ବର ୧୦ରୁ ୧୪ ପର୍ଯ୍ୟନ୍ତ ସେମାନେ ସେଠାରେ ରହୁଥିବାବେଳେ ଉମା ବିଷୋୟୀ ଓ ଯୋଗେନ୍ଦ୍ର ରାଉତ ସେମାନଙ୍କୁ ପ୍ରତିଦିନ ଭେଟିବା ସହ ବାଇକ୍, ଖାଦ୍ୟ ଆଦି ଯୋଗାଇ ଦେଉଥିଲେ । ସେପ୍ଟେମ୍ବର ୧୨ରେ ଏହି ୪ ବ୍ୟକ୍ତି ଯୋଗୀ ରାଉତଙ୍କ ସହ ପୀତବାସ ପଣ୍ଡାଙ୍କ ଅଫିସ୍ ଚାମ୍ବର ଆଗରେ ରେକି କରିଥିଲେ । ଯୋଗୀ ସେମାନଙ୍କୁ ପୀତବାସଙ୍କୁ ଚିହ୍ନାଇ ଦେଇଥିଲା ।
ପୀତବାସଙ୍କୁ ହତ୍ୟା କରିବା ପାଇଁ ଉମା ବିଷୋୟୀ ୨ଟି ବନ୍ଧୁକ ଓ ୧୦ ଲକ୍ଷ ଟଙ୍କା ଦେଇଥିଲା । ସେପ୍ଟେମ୍ବର ୧୪ରେ ହତ୍ୟା କରିବାକୁ ଯୋଜନା କରାଯାଇଥିଲା । ତେବେ ଶିଶୁପାଳ କୁମାର ପାଶୱାନର ସ୍ତ୍ରୀର ହଠାତ୍ ଗର୍ଭପାତ ହୋଇଥିଲା । ତେଣୁ ସେ ବିହାର ପଳାଇ ଯାଇଥିଲା । ପରେ ମଳୟ ବିଷୋୟୀର ନିର୍ଦ୍ଦେଶରେ ଉମା ବିଷୋୟୀ ଓ ଯୋଗୀ ରାଉତ ଆଉ ଏକ ଯୋଜନା କରିଥିଲେ । ବନ୍ଥପାଲୀର ଦୁଇ ଲୋକ କୁରୁପତି ଭୂୟାଁ ଓ ଚିଣ୍ଟୁ ପ୍ରଧାନଙ୍କୁ ହତ୍ୟାକାଣ୍ଡ ପାଇଁ ସୁପାରି ଦିଆଯାଇଥିଲା । ହତ୍ୟା ପାଇଁ କୁରୁପତି ନିଜ ଗାଁରୁ ଆସିଥିବାବେଳେ ଚିଣ୍ଟୁ ବାଙ୍ଗାଲୋରରୁ ବସରେ ଆସିଥିଲା । ବ୍ରହ୍ମପୁରରେ ଦି ଜଣ ପହଁଚିବା ପରେ କୁରୁପତି ଭୂୟାଁ ଓ ଚିଣ୍ଟୁ ପ୍ରଧାନ ପ୍ରଶାନ୍ତ ଆଣ୍ଡ କୋର ବାଚଲର ରୁମ୍ରେ ରହିଥିଲେ । ଯୋଗୀ ରାଉତ ଓ ଉମା ବିଷୋୟୀ ସେହି ଘର ବୁଝିଥିବାବେଳେ ସେମାନେ ସେପ୍ଟେମ୍ବର ୨୯ରୁ ସେଠାରେ ରହିଥିଲେ । ପରେ ଯୋଗୀ, ଚିଣ୍ଟୁ ଓ କୁରୁପଥି ମିଳିତ ଭାବେ ରେକି କରିଥିଲେ । ସେମାନେ ପୀତବାସ ପଣ୍ଡାଙ୍କ ଅଫିସ, ରୁଟ୍ ଓ ତାଙ୍କ ଘରକୁ ଅନୁଧ୍ୟାନ କରିଥିଲେ । ଏବେ ସମସ୍ତେ ପୋଲିସ ଜାଲରେ ପଡ଼ିଛନ୍ତି । କିନ୍ତୁ ହତ୍ୟା ଷଡ଼ଯନ୍ତ୍ର ସହ ବିକ୍ରମ ପଣ୍ଡାଙ୍କୁ କିପରି କୋର୍ଟରେ ପ୍ରମାଣିତ କରିପାରୁଛି ପୋଲିସ ତାହାକୁ ସମସ୍ତେ ଅପେକ୍ଷା କରିଛନ୍ତି । ଏହି ଓକିଲମାନେ କିନ୍ତୁ ବିକ୍ରମ ପଣ୍ଡାଙ୍କ ନିର୍ଦୋଷ ପାଇଁ ଯୁକ୍ତିକରିବେ । ତେବେ ସରକାରୀ ଓକିଲ କି ବଳିଷ୍ଟ ପ୍ରମାଣ ଦେବେ ତାହା ଜାମିନ ଆବେଦନ ବେଳେ ଜଣାପଡ଼ିବ ।
