ବିଜୁ ଲିଗାସି ନିଆଁରେ ଘିଅ ଢାଳିଲେ ସୌମ୍ୟରଂଜନ…ବଢ଼ିଲା ଚର୍ଚ୍ଚା

ବିଜୁ ଲିଗାସି ନେଇ ପୁଣି ଥରେ ବିବାଦ ସୃଷ୍ଟି ହୋଇଛି। ବରିଷ୍ଠ ରାଜନେତା ସୌମ୍ୟ ରଞ୍ଜନ ପଟ୍ଟନାୟକ ନବୀନ ପଟ୍ଟନାୟକଙ୍କୁ କଟାକ୍ଷ କରି କହିଛନ୍ତି, “କେବଳ ପୁଅମାନେ କଣ ଲିଗାସି ନେବେ ? ଆଉ କେହି ନେଇ ପାରିବେ ନାହିଁ କି?”ସୌମ୍ୟ ପଟ୍ଟନାୟକ ଏକ କାର୍ଯ୍ୟକ୍ରମରେ ବକ୍ତବ୍ୟ ରଖି କହିଛନ୍ତି, “ଆମେ କାହିଁକି ବିଜୁ ଲିଗାସିକୁ ଚୋରି କରିବାକୁ ଉଦ୍ୟମ କରିବୁ? ବିଜୁ ଲିଗାସି କାହାର କଣ ଜାଗିରଦାରୀ କି? ଏହା କେବଳ ଗୋଟିଏ ପରିବାରର ସମ୍ପତ୍ତି ନୁହେଁ।

ବିଜୁ ବାବୁଙ୍କ ଲିଗାସି ସମଗ୍ର ଓଡ଼ିଶା ଓ ଓଡ଼ିଆ ଜାତିର।”ସେ ଆହୁରି କହିଛନ୍ତି ଯେ, ରାଜନୀତିରେ ଲିଗାସି କେବଳ ପୁତ୍ର କିମ୍ବା ପରିବାର ସଦସ୍ୟଙ୍କ ପାଇଁ ସଂରକ୍ଷିତ ନୁହେଁ। ଯେଉଁମାନେ ବିଜୁ ବାବୁଙ୍କ ଆଦର୍ଶ, ସେବା ଓ ଓଡ଼ିଶାର ବିକାଶକୁ ଆଗକୁ ବଢ଼ାଇବେ, ସେହିମାନେ ଲିଗାସିର ଉତ୍ତରାଧିକାରୀ ହୋଇପାରିବେ। ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି କେବଳ ପରିବାର କେନ୍ଦ୍ରିକ ହୋଇ ରହିଯିବା ଉଚିତ ନୁହେଁ ବୋଲି ସୌମ୍ୟ ପଟ୍ଟନାୟକ ସ୍ପଷ୍ଟ କରିଛନ୍ତି।

ସୌମ୍ୟଙ୍କ ଏହି ମନ୍ତବ୍ୟ ପରେ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଛି। ସୌମ୍ୟ ରଞ୍ଜନ ପଟ୍ଟନାୟକ ପୂର୍ବରୁ ଆମ ଓଡ଼ିଶା ପାର୍ଟି ଗଠନ କରି ପରେ ବିଜେଡିରେ ମିଶି ରାଜ୍ୟସଭା ସାଂସଦ ହୋଇଥିଲେ। ତାଙ୍କର ଏହି କଟାକ୍ଷକୁ ବିଜେଡି ନେତାମାନେ କିପରି ନେବେ ତାହା ଏବେ ଦେଖିବାକୁ ବାକି ରହିଛି।

ବିଜୁ ପଟ୍ଟନାୟକଙ୍କ ଲିଗାସି ନେଇ ପୂର୍ବରୁ ମଧ୍ୟ ବିଭିନ୍ନ ସମୟରେ ବିତର୍କ ହୋଇଛି। ନବୀନ ପଟ୍ଟନାୟକ ୨୪ ବର୍ଷ ଧରି ଓଡ଼ିଶାର ମୁଖ୍ୟମନ୍ତ୍ରୀ ଥିବା ସମୟରେ ପିତାଙ୍କ ଲିଗାସିକୁ ଆଗକୁ ବଢ଼ାଇବାର ଦାବି କରୁଥିଲେ। କିନ୍ତୁ ସୌମ୍ୟ ପଟ୍ଟନାୟକଙ୍କ ଏହି ମନ୍ତବ୍ୟ ପରେ ପ୍ରଶ୍ନ ଉଠିଛି ଯେ, ବିଜୁ ଲିଗାସି କେବଳ ଏକ ପରିବାରର ସମ୍ପତ୍ତି ନା ସମଗ୍ର ଓଡ଼ିଶାର ? ଏ ବିଷୟରେ ବିଜେଡି ବା ନବୀନ ପଟ୍ଟନାୟକଙ୍କ ପକ୍ଷରୁ ଏ ଯାଏଁ କୌଣସି ପ୍ରତିକ୍ରିୟା ଆସିନାହିଁ। ତେବେ ଏହି କଟାକ୍ଷ ଦଳ ଭିତରେ ନୂଆ ଆଲୋଚନା ଆରମ୍ଭ କରିଦେଇଛି।