ଦ୍ୱିତୀୟ ଦଫା ଶାନ୍ତି ଆଲୋଚନାକୁ କାହିଁକି ପ୍ରତ୍ୟାଖ୍ୟାନ କଲା ଇରାନ ?

ଯୁକ୍ତରାଷ୍ଟ୍ର ଆମେରିକା ସହ ଦ୍ୱିତୀୟ ଦଫା ଶାନ୍ତି ଆଲୋଚନାରେ ଭାଗ ନେବାକୁ ଇରାନ୍ ସ୍ପଷ୍ଟ ମନା କରିଦେଇଛି। ଇରାନର ଇସ୍‌ଲାମିକ୍ ରିପବ୍ଲିକ୍ ନ୍ୟୁଜ୍ ଏଜେନ୍ସି (ଆଇଆର୍‌ଏନ୍‌ଏ) କହିଛି ଯେ, ଇସ୍‌ଲାମାବାଦରେ ଦ୍ୱିତୀୟ ଦଫା ଆଲୋଚନା ବିଷୟରେ ପ୍ରଚାରିତ ଖବର ସମ୍ପୂର୍ଣ୍ଣ ଭୂଲ୍।

ଏନ୍‌ଡିଟିଭି ରିପୋର୍ଟ ଅନୁଯାୟୀ, ଇରାନ୍ ଯୁକ୍ତରାଷ୍ଟ୍ରକୁ ଯୁଦ୍ଧବିରାମ ବୁଝାମଣା ଉଲ୍ଲଙ୍ଘନ କରି ଜାରି ରହିଥିବା ନୌସେନା ଅବରୋଧ (ନୌବଳ ବ୍ଲକେଡ୍) ପାଇଁ ଦାୟୀ କରିଛି। ଏହି ପରିସ୍ଥିତିରେ ଫଳପ୍ରଦ ଆଲୋଚନାର କୌଣସି ସମ୍ଭାବନା ନାହିଁ ବୋଲି ତେହେରାନ୍ କହିଛି।

ଇରାନ୍ ଆହୁରି ଅଭିଯୋଗ କରିଛି ଯେ, ୱାଶିଙ୍ଗଟନ୍ ଇରାନ ଦ୍ୱିତୀୟ ଦଫା ଆଲୋଚନାରେ ଭାଗ ନେବା ବିଷୟରେ ମିଥ୍ୟା ପ୍ରଚାର କରୁଛି ଏବଂ ଦେଶ ଉପରେ ଚାପ ପକାଇବା ପାଇଁ blame game ଖେଳୁଛି। ଏହି ମିଥ୍ୟା ଖବର ଦ୍ୱାରା ଇରାନ୍ ଉପରେ ଅଧିକ ଚାପ ସୃଷ୍ଟି କରିବା ଉଦ୍ଦେଶ୍ୟ ରହିଛି ବୋଲି ତେହେରାନ୍ କହିଛି। ପ୍ରଥମ ଦଫା ଆଲୋଚନା ଗତ ଶନିବାର ପାକିସ୍ତାନରେ ଅନୁଷ୍ଠିତ ହୋଇଥିଲା। ତା’ପରେ ଯୁକ୍ତରାଷ୍ଟ୍ର ପ୍ରେସିଡେଣ୍ଟ ଡୋନାଲ୍ଡ ଟ୍ରମ୍ପ୍ ଆଲୋଚକମାନଙ୍କୁ ପାକିସ୍ତାନ ଯାତ୍ରା କରିବାକୁ ନିର୍ଦ୍ଦେଶ ଦେଇଥିଲେ।

କିନ୍ତୁ ଇରାନ୍ ଏହାକୁ ପ୍ରତ୍ୟାଖ୍ୟାନ କରି କହିଛି ଯେ, ଯୁକ୍ତରାଷ୍ଟ୍ରର ଅସଙ୍ଗତ ଦାବି ଓ ଯୁଦ୍ଧବିରାମ ଉଲ୍ଲଙ୍ଘନ ଯୋଗୁଁ ଆଲୋଚନା ସଫଳ ହେବାର ସମ୍ଭାବନା ନାହିଁ। ଇରାନ୍ ବିଦେଶ ମନ୍ତ୍ରାଳୟ ଓ ରାଜ୍ୟ ମିଡ଼ିଆ କହିଛନ୍ତି ଯେ, ଯୁକ୍ତରାଷ୍ଟ୍ରର ନୌସେନା ଅବରୋଧ ଯୁଦ୍ଧବିରାମ ବୁଝାମଣାର ସ୍ପଷ୍ଟ ଉଲ୍ଲଙ୍ଘନ ଅଟେ। ଏହା ସହିତ ଆଲୋଚନା ଆଗକୁ ବଢ଼ାଇବାର କୌଣସି ଯୁକ୍ତି ନାହିଁ। ଇରାନ ଏଭଳି ପ୍ରତ୍ୟାଖ୍ୟାନ ଯୁକ୍ତରାଷ୍ଟ୍ର ଓ ଇରାନ୍ ମଧ୍ୟରେ ଚାଲିଥିବା ଉତ୍ତେଜନାକୁ ଆହୁରି ବଢ଼ାଇଛି। ବର୍ତ୍ତମାନ ଯୁଦ୍ଧବିରାମର ସମୟସୀମା ଶେଷ ହେବାକୁ ଯାଉଛି ଏବଂ ଉଭୟ ପକ୍ଷ ନିଜ ନିଜ ଜିଦିରେ ଅଟଳ ରହିଛନ୍ତି।